உலக நாடுகள் அனைத்தும் கச்சா எண்ணெய் விலை உயர்வால் அலறித் துடித்துக் கொண்டிருக்கும் வேளையில், அமெரிக்க அதிபர் டொனால்ட் டிரம்ப் ஈரானைத் தற்காலிகமாகத் தாக்கப் போவதில்லை என்ற ‘கருணை உள்ளம் கொண்ட’ முடிவை எடுத்துள்ளார். வழக்கம் போலத் தனது ‘ட்ரூத் சோஷியல்’ தளத்தில் ஒரு பதிவைப் போட்டுவிட்டு, உலகப் பொருளாதாரம் முழுவதும் தனது ஒற்றை விரல் சொடுக்கில் தான் இயங்குகிறது என்பதை அவர் மீண்டும் ஒருமுறை நிரூபித்துள்ளார்.
பிப்ரவரி இறுதியில் தொடங்கிய இந்த மோதலால் ஜூலை மாதத்தில் மட்டும் பிரெண்ட் கச்சா எண்ணெய் விலை 24 சதவீதம் வரை உயர்ந்து, உலகெங்கிலும் உள்ள பொதுமக்கள் பெட்ரோல் பங்குகளில் கண்ணீர் வடித்துக் கொண்டிருக்கிறார்கள். ஆனால் டிரம்ப்போ, “உலகின் எதிர்கால நன்மைக்காகவும், ஈரானின் நல்வாழ்வுக்காகவும்” தாம் இந்தத் தாக்குதலை ஒத்திவைப்பதாக மிக தாராள மனப்பான்மையுடன் அறிவித்துள்ளார். தாக்குதலைத் தொடங்குவதும் அவரே, பின்னர் உலகின் நன்மைக்காக அதைத் தற்காலிகமாக நிறுத்தி வைப்பதாகப் பெருமை பேசிக் கொள்வதும் அவரே என்பது தான் இதில் இருக்கும் ஆகச்சிறந்த அரசியல் முரண்.
ஹோர்மூஸ் நீரிணையை மீண்டும் திறந்து, அணுஆயுத அச்சுறுத்தலை முடிக்க ஈரான் முன்வந்தால் மட்டுமே இந்தத் “தற்காலிகக் கருணை” நீடிக்கும் என்றும் அவர் நிபந்தனை விதித்துள்ளார். மறுபுறம், சவுதி அரேபியா, குவைத் மற்றும் ஐக்கிய அரபு எமிரேட்ஸ் ஆகிய நாடுகள் தங்கள் எண்ணெய் வயல்களும், கப்பல்களும் சாம்பலாகி விடுமோ என்ற பீதியில் டிரம்பை உடனடியாகத் தொடர்புகொண்டு “தெளிவு” கேட்கும் நிலைக்குத் தள்ளப்பட்டுள்ளன.
“ஈரானியர்கள் வார்த்தையைக் காப்பாற்றுவதில்லை” என்று புலம்பும் டிரம்ப், பேச்சுவார்த்தை மேசையையும், போர் மேடையையும் ஒரே நேரத்தில் கையிலெடுத்து விளையாடி வருகிறார். ஒரு நாள் அச்சுறுத்தல், அடுத்த நாள் அமைதி ஒப்பந்தப் பேச்சு என அதிபரின் ஒவ்வொரு ட்வீட்டிற்கும் உலகக் கச்சா எண்ணெய் சந்தை ஏறி இறங்கிக் கொண்டிருக்கும் நிலையில், இந்த “ஒப்பந்தக் கலை” நாடகத்தின் அடுத்த அத்தியாயத்தைக் கண்டு உலக நாடுகள் பெருமூச்சுடன் கவனித்து வருகின்றன.
