வீட்டில் எத்தனை பாட்டில் மது வைத்திருக்கலாம்? பாண்டிச்சேரி மதுவுக்குத் தமிழ்நாட்டில் அதிரடித் தடை!

வீட்டில் மது பாட்டில்களை அடுக்கிக் வைப்பது பலருக்கும் வழக்கமாக இருந்தாலும், இந்திய எக்ஸைஸ் சட்டங்களின்படி ஒவ்வொரு மாநிலத்திலும் இதற்குத் தனித்தனியான கட்டுப்பாடுகள் விதிக்கப்பட்டுள்ளன என்பது பலருக்குத் தெரியாது. அளவுக்கு அதிகமாக மதுவை வீட்டில் சேமித்து வைப்பதோ அல்லது வேறு மாநிலங்களில் இருந்து அனுமதி இல்லாமல் கொண்டு வருவோ சட்டப்படி குற்றமாகும்!

தமிழ்நாடு: வீட்டில் எவ்வளவு சரக்கு வைக்கலாம்? தமிழ்நாடு மதுவிலக்கு மற்றும் ஆயத்தீர்வைச் சட்டத்தின் கீழ் (Tamil Nadu Liquor Possession for Personal Consumption Rules, 1996), ஒரு நபர் தனது சொந்த உபயோகத்திற்காக வீட்டில் அதிகபட்சமாக 4.5 லிட்டர் இந்திய தயாரிப்பு வெளிநாட்டு மதுபானங்களை (IMFL) வைத்திருக்கலாம். இது தோராயமாக 750 மி.லி அளவுள்ள 6 பாட்டில்கள் ஆகும். அதேபோல், பீர் வகைகளைப் பொறுத்தவரை 7.8 லிட்டர் (தோராயமாக 12 பாட்டில்கள்) வரை வீட்டில் வைத்திருக்க அனுமதி உண்டு.

பாண்டிச்சேரி சரக்குக்கு தமிழ்நாட்டில் ஆப்பு! தமிழ்நாட்டைப் பொறுத்தவரை இதில் மிக முக்கியமாகக் கவனிக்க வேண்டிய விதி என்னவென்றால், இந்த 4.5 லிட்டர் விலக்கு என்பது தமிழ்நாட்டின் அதிகாரப்பூர்வ டாஸ்மாக் (TASMAC) கடைகளில் வாங்கப்பட்ட மதுபானங்களுக்கு மட்டுமே பொருந்தும் என உயர் நீதிமன்றம் தெளிவுபடுத்தியுள்ளது! புதுச்சேரி அல்லது கர்நாடகா போன்ற பக்கத்து மாநிலங்களில் வரிகள் குறைவு என்பதால், அங்கிருந்து மதுபானங்களை வாங்கி வந்து தமிழ்நாட்டில் சேமிப்பதோ அல்லது காரில் கடத்தி வருவதோ முற்றிலும் சட்டவிரோதமானது. முறையான எக்ஸைஸ் அனுமதிச் சீட்டு (Transit Permit) இல்லாமல் பாண்டிச்சேரி மதுவை வைத்திருப்பது கண்டுபிடிக்கப்பட்டால், வாகனம் பறிமுதல் செய்யப்படுவதோடு, ஜாமீனில் வர முடியாத பிரிவுகளில் வழக்குப் பதிவு செய்யப்படும்!

பிற மாநிலங்களில் உள்ள எக்ஸைஸ் சலுகைகள்:

• டெல்லி: டெல்லியில் ஒரு நபர் தனது வீட்டில் 9 லிட்டர் மதுபானங்கள் (தோராயமாக 12 பாட்டில்கள்) மற்றும் 18 லிட்டர் ஒயின் அல்லது பீர் வைத்திருக்க அரசு அனுமதி அளிக்கிறது.

• ஹரியானா: ஹரியானாவில் 18 பாட்டில்கள் வரை வீட்டில் வைக்கலாம். மேலும் ‘L-50’ என்ற சிறப்பு உரிமம் பெறுவதன் மூலம் கூடுதல் பாட்டில்களையும் சட்டப்பூர்வமாகச் சேமிக்க முடியும்.

• கர்நாடகா: கர்நாடகாவில் 4.6 லிட்டர் மதுபானங்கள் (6 பாட்டில்கள்) மற்றும் 18.2 லிட்டர் பீர் வரை எந்தவித சிறப்பு அனுமதியும் இன்றி சேமிக்கலாம்.

• மகாராஷ்டிரா: மகாராஷ்டிராவில் மது அருந்தவும், வைத்திருக்கவும் தனிநபர் மது உரிமம் (Personal Liquor Permit) கட்டாயமாகும்.

சுங்கத் துறை விதிகள்: வெளிநாடுகளிலிருந்து விமானம் மூலம் இந்தியா திரும்பும் பயணிகள், சுங்கத் துறை (Customs) விதிகளின்படி வரி விலக்குடன் அதிகபட்சமாக 2 லிட்டர் வெளிநாட்டு மதுபானங்களை மட்டுமே கொண்டு வர அனுமதி உண்டு. எந்த மாநிலமாக இருந்தாலும், வீட்டில் வைத்திருக்கும் மதுபானங்களுக்கான அதிகாரப்பூர்வ ரசீதை (Bill) பாதுகாப்பாக வைத்திருப்பது சட்டப்பூர்வச் சிக்கல்களில் இருந்து உங்களைக் காப்பாற்றும்.