பணமதிப்பிழப்பு நடவடிக்கை ஒரு வரலாற்றுத் தவறு! பத்தாம் ஆண்டு நிறைவில் பாஜக அரசை வெளுத்து வாங்கிய காங்கிரஸ்!

மத்திய பாஜக அரசு கடந்த 2016 ஆம் ஆண்டு நவம்பர் 8 ஆம் தேதி கொண்டுவந்த பணமதிப்பிழப்பு நடவடிக்கை அமல்படுத்தப்பட்டு 10 ஆண்டுகள் நிறைவடைந்துள்ள நிலையில், நாட்டின் பொருளாதாரத்தையும் ஜனநாயகத்தையும் இந்த முடிவு முற்றிலுமாகச் சீரழித்துவிட்டதாக காங்கிரஸ் கட்சி கடுமையாகச் சாடியுள்ளது.

பொருளாதாரத்தைச் சீரழித்த பணமதிப்பிழப்பு

இதுகுறித்து காங்கிரஸ் கட்சியின் பொதுச்செயலாளர் ஜெய்ராம் ரமேஷ் வெளியிட்டுள்ள கண்டனப் பதிவில், 500 மற்றும் 1000 ரூபாய் நோட்டுகள் தடை செய்யப்பட்ட அந்தத் தீர்மானம் நாட்டின் பொருளாதாரத்தைப் படுபாடாய்ப் படுத்திய மிகப்பெரிய பேரிடர் எனக் குறிப்பிட்டுள்ளார். கறுப்புப் பணத்தை ஒழிப்பது மற்றும் கள்ளநோட்டுகளைத் தடுப்பது போன்ற எந்தவொரு இலக்கையும் இந்த நடவடிக்கை எட்டவில்லை என்பது தற்போது உறுதியாகியுள்ளது. ரிசர்வ் வங்கி தரவுகளின்படி, தடை செய்யப்பட்ட நோட்டுகளில் 99.3 சதவீதத்திற்கும் அதிகமானவை மீண்டும் வங்கி அமைப்புக்கே திரும்பிவிட்டன.

சிறு மற்றும் குறு தொழில் நிறுவனங்கள் (MSMEs), தினக்கூலி தொழிலாளர்கள் மற்றும் விவசாயிகள் இந்த நடவடிக்கையால் கடுமையாகப் பாதிக்கப்பட்டுள்ளனர். அரசின் இந்தத் தவறான பொருளாதாரக் கொள்கை காரணமாக இந்தியாவின் மொத்த உள்நாட்டு உற்பத்தி வளர்ச்சி வேகம் பின்தங்கியுள்ளது என்றும் அவர் புள்ளிவிவரங்களுடன் சுட்டிக்காட்டினார்.

ஜனநாயகத்தின் மீதான தாக்குதல்

பொருளாதாரத்தைச் சிதைத்தது மட்டுமின்றி, தேர்தல் மற்றும் அரசியல் அமைப்புகளைத் தனது கட்டுப்பாட்டுக்குள் கொண்டுவர பாஜக அரசு முயன்று வருவதாகவும் ஜெய்ராம் ரமேஷ் குற்றம்சாட்டியுள்ளார். தேர்தல் ஆணையம், சிபிஐ மற்றும் அமலாக்கத்துறை போன்ற தன்னாட்சி அமைப்புகளைத் தன்வசப்படுத்தி எதிர்க்கட்சிகளை ஒடுக்கும் வேலையில் மத்திய அரசு ஈடுபட்டு வருவதாகவும், இது நாட்டின் ஒட்டுமொத்த ஜனநாயகக் கட்டமைப்பையே பலவீனப்படுத்துவதாகவும் காங்கிரஸ் கட்சி எச்சரித்துள்ளது.