கூகுள் நிறுவனம் தனது ஆண்ட்ராய்டு இயங்குதளத்திற்கான குரோம் பிரவுசரில் ஜெமினி 3.1 தொழில்நுட்பம் மூலம் இயங்கும் புதிய ஏஐ அப்டேட்டை அடுத்த மாதம் அறிமுகம் செய்கிறது. ஜூன் மாத இறுதியில் வெளியாகவுள்ள இந்த மேம்படுத்தப்பட்ட பதிப்பில் இணையதளங்களை தானாகவே கையாளும் ‘ஆட்டோ பிரவுஸ்’ உள்ளிட்ட பல முக்கிய வசதிகள் இடம்பெறவுள்ளன.
இந்த புதிய அப்டேட்டில் குரோம் பிரவுசருக்குள் நிரந்தரமான ஏஐ உதவியாளர் ஒன்று சேர்க்கப்படவுள்ளது. இது பயனர்கள் பார்க்கும் இணையப் பக்கங்களில் உள்ள தகவல்களைச் சுருக்கமாக வழங்குவதோடு, கூகுள் கேலெண்டர் மற்றும் ஜிமெயில் போன்ற சேவைகளிலிருந்து தகவல்களைத் திரட்டித் தரும். இதன் மூலம் சிக்கலான கட்டுரைகளை எளிதாகப் புரிந்துகொள்ள முடியும்.
இவற்றுடன் ‘நானோ பனானா’ எனும் புதிய இமேஜ் எடிட்டிங் கருவியும் குரோம் பிரவுசரில் ஒருங்கிணைக்கப்படவுள்ளது. இது இணையப் பக்கங்களில் உள்ள படங்களை நேரடியாக எடிட் செய்யவும், தேவைக்கேற்ப மாற்றியமைக்கவும் உதவும். குறிப்பாக, ஒரு சாதாரணப் புகைப்படத்தை தகவல் வரைபடமாக (Infographic) மாற்றும் திறன் இதற்கு வழங்கப்பட்டுள்ளது.
தொழில்நுட்ப ரீதியாகப் பார்க்கையில் ‘ஆட்டோ பிரவுஸ்’ என்பது மிகவும் முக்கியமான மாற்றமாகக் கருதப்படுகிறது. இது பயனரின் உத்தரவின் பேரில் இணையதளங்களில் படிவங்களை நிரப்புவது, பணப் பரிவர்த்தனைகளைத் தொடங்குவது போன்ற பல கட்டப் பணிகளைத் தானாகவே செய்யும். இது ஏஐ தொழில்நுட்பத்தை வெறும் அரட்டை வசதியிலிருந்து அடுத்த கட்டத்திற்கு எடுத்துச் செல்கிறது.
இந்த ஏஐ முகவர் (AI Agent) வசதியானது ஆரம்பக் கட்டத்தில் அமெரிக்காவில் உள்ள ஆண்ட்ராய்டு 12 மற்றும் அதற்கு மேற்பட்ட பதிப்புகளைக் கொண்ட சாதனங்களுக்கு வழங்கப்படவுள்ளது. குறிப்பாக ஏஐ ப்ரோ மற்றும் அல்ட்ரா சந்தாதாரர்களுக்கு மட்டுமே இந்த வசதி தொடக்கத்தில் கிடைக்கும் என்று கூகுள் நிறுவனம் அதிகாரப்பூர்வமாகத் தெரிவித்துள்ளது.
தகவல் பாதுகாப்பைப் பொறுத்தவரை இந்த ஆட்டோ பிரவுஸ் வசதி நிறுவனங்களுக்குப் புதிய சவால்களை ஏற்படுத்தும் என எதிர்பார்க்கப்படுகிறது. பிரவுசர் தானாகவே இணையதளங்களில் தகவல்களைப் பதிவிடுவதால், தரவு மேலாண்மை மற்றும் பாதுகாப்பு விதிகளை நிறுவனங்கள் மறுபரிசீலனை செய்ய வேண்டிய அவசியம் ஏற்பட்டுள்ளதாகத் தொழில்நுட்ப வல்லுநர்கள் எச்சரித்துள்ளனர்.
இந்த ‘பர்சனல் இன்டெலிஜென்ஸ்’ வசதி பயனர்களின் தேடல் பழக்க வழக்கங்களுக்கு ஏற்பச் செயல்படும் என்பது குறிப்பிடத்தக்கது. கூகுள் நிறுவனம் இதில் பாதுகாப்பு அம்சங்களைச் சேர்த்திருந்தாலும், முக்கியப் பரிவர்த்தனைகளுக்குப் பயனரின் உறுதிப்படுத்தல் அவசியம் என்று கூறப்பட்டுள்ளது. இணைய உலாவித் துறையில் இது ஒரு புதிய ஏஐ போரைத் தொடங்கி வைத்துள்ளது.
