இந்தியா மற்றும் நியூசிலாந்து அணிகளுக்கு இடையேயான 5 போட்டிகள் கொண்ட விறுவிறுப்பான டி20 தொடர் வியாழக்கிழமை முதல் தொடங்குகிறது. நீண்ட இடைவெளிக்குக் பிறகு சர்வதேசக் களத்திற்குத் திரும்பியுள்ள அனுபவமிக்க ஸ்விங் மன்னன் புவனேஷ்வர் குமார், இளம் புயல் அர்ஷ்தீப் சிங் மற்றும் சுழற்பந்து வீச்சாளர் குல்தீப் யாதவ் ஆகிய மூவருக்கும் இந்தத் தொடர் வெறும் ரன் வேட்டைக்கானது மட்டுமல்ல; தங்களது பெயர்களை வரலாற்றுப் புத்தகத்தில் தங்க எழுத்துக்களால் பொறித்துக்கொள்வதற்கான மாபெரும் வாய்ப்பு!
100 விக்கெட் சதம் அடிக்கக் காத்திருக்கும் ‘புவி’: இந்திய அணிக்காக இதுவரை 87 டி20 போட்டிகளில் விளையாடி 90 விக்கெட்டுகளைக் கைப்பற்றியுள்ள புவனேஷ்வர் குமார், இந்தத் தொடரில் இன்னும் 10 விக்கெட்டுகளை வீழ்த்தினால், சர்வதேச டி20 போட்டிகளில் 100 விக்கெட்டுகளை வீழ்த்திய 5-வது இந்திய பந்துவீச்சாளர் என்ற மாபெரும் சாதனையைப் படைப்பார். ஏற்கனவே அர்ஷ்தீப் சிங் (145), ஜஸ்பிரித் பும்ரா (126), ஹர்திக் பாண்டியா (114) மற்றும் அக்சர் படேல் (113) ஆகியோர் மட்டுமே இந்த 100 விக்கெட் மைல்கல்லை எட்டியுள்ளனர். அதுமட்டுமின்றி, அனைத்து வடிவ கிரிக்கெட்டையும் சேர்த்து சர்வதேச அளவில் 300 விக்கெட்டுகளை எட்ட புவிக்கு இன்னும் 6 விக்கெட்டுகளே தேவையாக உள்ளது (தற்போது 294 விக்கெட்டுகள்).
முன்னணி பௌலராக உருவெடுக்கும் அர்ஷ்தீப் சிங்: மறுபுறம், இந்திய டி20 அணியின் நம்பிக்கை நட்சத்திரமாக உருவெடுத்துள்ள அர்ஷ்தீப் சிங், முதலிடத்தைச் கெட்டியாகப் பிடித்துள்ளார். இதுவரை 145 விக்கெட்டுகளைக் குவித்து, இந்தியாவின் அதிக விக்கெட் வீழ்த்திய பந்துவீச்சாளராக இருக்கும் அர்ஷ்தீப், இன்னும் 5 விக்கெட்டுகளை எடுத்தால் டி20 கிரிக்கெட்டில் 150 விக்கெட்டுகளைச் சாய்த்த முதல் இந்தியர் என்ற வரலாற்றுச் சாதனையைத் தன் வசமாக்குவார். மேலும், நியூசிலாந்துடனான முதல் போட்டி அர்ஷ்தீப்பின் கேரியரில் 100-வது டி20 போட்டியாக அமையவுள்ளது. ரோஹித் சர்மாவுக்குப் (150 போட்டிகள்) பிறகு 100 போட்டிகளைக் கடக்கும் 7-வது இந்திய வீரர் என்ற பெருமையையும் அவர் பெறவுள்ளார்.
இரண்டே விக்கெட்டில் குல்தீப் யாதவின் சதம்: சீனா மேன் சுழற்பந்து வீச்சாளர் குல்தீப் யாதவும் இந்த வேட்டையில் சளைத்தவர் அல்ல. இதுவரை 56 போட்டிகளில் 98 விக்கெட்டுகளைச் சாய்த்துள்ள குல்தீப், இந்தத் தொடரில் இன்னும் இரண்டே இரண்டு விக்கெட்டுகளை வீழ்த்தினால் சர்வதேச டி20-யில் தனது 100-வது விக்கெட்டைக் கைப்பற்றிப் புதிய உச்சத்தைத் தொடுவார்.
அனுபவமும் இளமையும் கலந்த இந்திய பந்துவீச்சுப் படை, நியூசிலாந்து பேட்டர்களைத் திணறடித்து இந்த மைல்கற்களைச் அசால்ட்டாக எட்டுமா என்பதைப் பொறுத்திருந்து பார்ப்போம்!