மத்திய கிழக்கு நாடான ஈரானுக்கும் அமெரிக்காவிற்கும் இடையே ரகசியமாக நடைபெற்று வந்த அமைதிப் பேச்சுவார்த்தைகள் முற்றிலுமாக முறிந்ததைத் தொடர்ந்து, உலகையே உலுக்கும் வகையில் சர்வதேச கச்சா எண்ணெய் வர்த்தகப் பாதையான ‘ஹோர்முஸ் ஜலசந்தியை’ (Strait of Hormuz) ஈரான் ராணுவம் தற்காலிகமாக மூடியுள்ளது. ஈரானின் இஸ்லாமிய புரட்சிகர காவல்படை (IRGC) வெளியிட்டுள்ள அதிரடி அறிவிப்பில், இரண்டு முக்கிய நிபந்தனைகள் நிறைவேற்றப்படும் வரை இந்த கடல் வழிப்பாதை திறக்கப்படாது என்று திட்டவட்டமாகக் கூறப்பட்டுள்ளது. இஸ்ரேல் உடனடியாக லெபனானில் இருந்து தனது படைகளைத் திரும்பப் பெற வேண்டும், மற்றும் அமெரிக்கப் படைகள் பெர்சிய வளைகுடா உள்ளிட்ட ஒட்டுமொத்த மத்திய கிழக்குப் பிராந்தியத்தை விட்டும் வெளியேற வேண்டும் என்பதே அந்த இரண்டு நிபந்தனைகளாகும்.
இந்த அறிவிப்பு வெளியான சில மணி நேரங்களிலேயே, ஹோர்முஸ் ஜலசந்தி வழியாக எந்தவொரு சர்வதேச கப்பல்களும் பயணிக்கக் கூடாது என்றும், இந்த உத்தரவை மீறி வரும் கப்பல்கள் மீது ஏவுகணைத் தாக்குதல்கள் நடத்தப்படும் என்றும் ஐஆர்ஜிசி எச்சரித்துள்ளது. மேலும், அந்தப் பாதையைக் கடக்க முயன்ற சில வணிகக் கப்பல்களை நோக்கி ஈரான் கடற்படை எச்சரிக்கை துப்பாக்கிச்சூடு நடத்தியதாக ஈரான் நாட்டு ஊடகவியலாளர்கள் அதிர்ச்சித் தகவல்களை வெளியிட்டுள்ளனர். லெபனானில் ராணுவ ஆக்கிரமிப்பை இஸ்ரேல் நிறுத்த வேண்டும் மற்றும் எல்லையில் மோதல்கள் தீவிரமடையக் கூடாது என்ற தூதரக ரீதியிலான ஒப்பந்தங்களை அமெரிக்கா மீறிவிட்டதாகக் குற்றம் சாட்டியே ஈரான் இப்பேச்சுவார்த்தையை ரத்து செய்துள்ளது.
இதேவேளையில், அமெரிக்கத் துணை அதிபர் ஜே.டி.வென்ஸ் (J. D. Vance) இந்த விவகாரம் குறித்துப் பேசுகையில், இரு நாடுகளுக்கும் இடையே ஒரு முக்கியப் பேச்சுவார்த்தை உடன்பாட்டை எட்டவிருந்த தருணத்தில், லெபனான் தலைநகர் பெய்ரூட்டில் உள்ள பொதுமக்கள் குடியிருப்பு பகுதியில் நடத்தப்பட்ட பயங்கர குண்டுவெடிப்பில் ஹெஸ்புல்லா அமைப்புடன் தொடர்பில்லாத அப்பாவி மக்கள் கொல்லப்பட்டது தான் இந்த தூதரக முறிவுக்குக் காரணம் என்று வருத்தத்துடன் தெரிவித்துள்ளார். லெபனான் போர்க்களத்தில் தற்பொழுது மோதல்கள் உச்சகட்டத்தை எட்டியுள்ளன. தெற்கு லெபனானில் ஹெஸ்புல்லா அமைப்பினர் நடத்திய அதிரடித் தாக்குதலில், இஸ்ரேலின் புகழ்பெற்ற 52-வது பட்டாலியன் படைத்தளபதி உட்பட 4 இஸ்ரேலிய வீரர்கள் சம்பவ இடத்திலேயே உடல் சிதறிப் பலியாகியுள்ளனர்.
இதற்கிடையே, இஸ்ரேலின் தேசிய பாதுகாப்பு அமைச்சர் இத்தாமர் பென் கிர் (Itamar Ben-Gvir), “லெபனான் தேசம் முழுவதும் எரிய வேண்டும், இஸ்ரேல் தனது கட்டுப்பாடுகளைத் தளர்த்திவிட்டு மத்திய கிழக்கில் போரை வென்றெடுக்க வெறித்தனமாக மாற வேண்டும்” என்று சர்ச்சைக்குரிய வகையில் பேசியுள்ளார். இவரது இந்த இனவெறிப் பேச்சு சர்வதேச அளவில் ஐநா சபை உட்பட பல நாடுகளிடம் கடுமையான கண்டனங்களைப் பெற்றுள்ளது. வாஷிங்டன் மற்றும் ஈரான் இடையே ஏற்படவிருந்த வரலாற்றுச் சிறப்புமிக்க அமைதி ஒப்பந்தத்தை இஸ்ரேல் திட்டமிட்டே சீர்குலைக்கிறதா என்ற கேள்விகள் எழுந்துள்ள நிலையில், ஹோர்முஸ் ஜலசந்தி மூடப்பட்டிருப்பது உலகளவில் கச்சா எண்ணெய் விலையை அசுர வேகத்தில் உயர்த்தக்கூடும் என்று பொருளாதார வல்லுநர்கள் எச்சரித்துள்ளனர்.