இந்திய ஆட்டோமொபைல் சந்தையில் ரெட்ரோ கிளாசிக் பைக்குகளின் ராஜாவாகத் திகழும் ராயல் என்பீல்ட் (Royal Enfield) நிறுவனம், தனது புகழ்பெற்ற 650சிசி பிரிவில் புதிய மைல்கல்லாக ‘புல்லட் 650’ (Bullet 650) மாடலை இந்தியாவில் அதிகாரப்பூர்வமாக விற்பனைக்கு அறிமுகம் செய்துள்ளது. கடந்த ஆண்டு நடைபெற்ற EICMA சர்வதேச அரங்கில் உலகளவில் காட்சிப்படுத்தப்பட்ட இந்த பைக், தற்பொழுது இந்திய வாடிக்கையாளர்களின் நீண்ட நாள் எதிர்பார்ப்பை பூர்த்தி செய்யும் வகையில் மாஸ் என்ட்ரி கொடுத்துள்ளது.
இந்த புதிய மாடலானது ராயல் என்பீல்ட் நிறுவனத்தின் 650சிசி பேரலல்-ட்வின் (Parallel-twin) இன்ஜின் வரிசையில் இணையும் 7-வது பைக் மாடலாகும் என்பது குறிப்பிடத்தக்கது.
ராயல் என்பீல்ட் புல்லட் 350 மற்றும் கிளாசிக் 350 பைக்குகளுக்கு இடையே உள்ள அதே ஸ்டைலிங் ஒற்றுமைகள், இந்த புதிய புல்லட் 650 மற்றும் கிளாசிக் 650 ட்வின் மாடல்களுக்கு இடையேயும் தொடர்கிறது. எனினும், புல்லட் 650 மாடலில் பாரம்பரிய புல்லட் டிசைனைப் பிரதிபலிக்கும் வகையில், அதன் எரிபொருள் தொட்டியில் (Fuel tank) கைகளால் வரையப்பட்ட பாரம்பரிய பின்ஸ்ட்ரைப்ஸ் (Hand-painted pinstripes) மற்றும் மெட்டல் டேங்க் பேட்ஜிங் ஆகியவை பிரத்யேகமாக வழங்கப்பட்டுள்ளன.
மேலும், கிளாசிக் 650 மாடலுடன் ஒப்பிடும்போது, இதன் பின்புற ஃபெண்டர் சற்றே சதுர வடிவில் (Squared-off rear fender) கம்பீரமாக வடிவமைக்கப்பட்டுள்ளது.
மிக முக்கியமாக, கிளாசிக் 650 மாடலில் உள்ள கழற்றக்கூடிய பில்லியன் சீட்டுக்கு மாறாக, புதிய புல்லட் 650 பைக்கில் மிகவும் வசதியான சிங்கிள்-பீஸ் ஸ்டெப்டு சீட் (Single-piece stepped seat) கொடுக்கப்பட்டுள்ளது. இது பின்னால் அமர்ந்து பயணிப்பவருக்கு மிகச்சிறந்த மற்றும் சொகுசான பயண அனுபவத்தை வழங்கும். இவற்றுடன் டிஜி-அனலாக் இன்ஸ்ட்ரூமென்ட் கிளஸ்டர் மற்றும் பாலிஷ் செய்யப்பட்ட அலுமினியம் ஸ்விட்ச்கியர் ஆகிய பிரீமியம் அம்சங்களும் இதில் இடம்பெற்றுள்ளன.
புதிய புல்லட் 650 பைக்கின் இதயமாக 648சிசி பேரலல்-ட்வின், ஏர்/ஆயில்-கூல்டு இன்ஜின் பொருத்தப்பட்டுள்ளது. இது அதிகபட்சமாக 47hp பவரையும், 52Nm டார்க் திறனையும் வெளிப்படுத்தக்கூடியது. இந்த எஞ்சின் 6-ஸ்பீடு கியர்பாக்ஸ் உடன் இணைக்கப்பட்டுள்ளது.
இதன் சஸ்பென்ஷன் பணிகளுக்கு முன்பக்கத்தில் 120மிமீ டிராவல் கொண்ட சோவா டெலிஸ்கோபிக் ஃபோர்க்கும் (Showa telescopic fork), பின்பக்கத்தில் 90மிமீ டிராவல் கொண்ட ட்வின் ஷாக் அப்சார்பர்களும் கச்சிதமாகக் கொடுக்கப்பட்டுள்ளன.
இந்தியாவில் இந்த பைக் ‘கேனான் பிளாக்’ (Canon Black) மற்றும் ‘பேட்டில்ஷிப் புளூ’ (Battleship Blue) ஆகிய இரண்டு அட்டகாசமான வண்ண விருப்பங்களில், ஒரே ஒரு சிங்கிள் வேரியண்ட்டில் மட்டுமே கிடைக்கிறது. இதன் எக்ஸ்-ஷோரூம் விலை ரூ.3.65 லட்சம் என நிர்ணயம் செய்யப்பட்டுள்ளது.
கிளாசிக் 650 ட்வின் குரோம் மாடலை விட இது ரூ.14,000 வரை விலை குறைவாகும். இதன் மூலம் சூப்பர் மீட்டியார் 650, ஷாட்கன் 650 போன்ற லாங்-வீல்பேஸ் (Long-wheelbase) பிளாட்ஃபார்மில் வெளியான பைக்குகளிலேயே மிகக் குறைந்த விலையில் கிடைக்கும் மிக மலிவான 650சிசி பைக் என்ற பெருமையை இந்த ராயல் என்பீல்ட் புல்லட் 650 தட்டிச் சென்றுள்ளது.
