கூகுள் நிறுவனம் தனது இலவச கிளவுட் ஸ்டோரேஜ் சேவையில் மிகப்பெரிய மாற்றத்தைச் செய்துள்ளது.இதுவரை புதிய ஜிமெயில் கணக்கு தொடங்கும் அனைவருக்கும் வழங்கப்பட்டு வந்த 15ஜிபி இலவச ஸ்டோரேஜ், தற்போது 5ஜிபி ஆகக் குறைக்கப்பட்டுள்ளது. இந்த மாற்றம் 2026 மே மாதம் முதல் அதிகாரப்பூர்வமாக நடைமுறைக்கு வந்துள்ளது.இது ஜிமெயில் (Gmail), கூகுள் டிரைவ் (Drive) மற்றும் கூகுள் போட்டோஸ் (Photos) ஆகிய மூன்றிற்கும் பொதுவானது.
இந்த அதிரடி மாற்றத்தினால் புதிய பயனர்கள் தங்களின் தரவுகளைச் சேமிப்பதில் சிக்கலைச் சந்திக்கக்கூடும். குறிப்பாக அதிக மெயில்கள் மற்றும் புகைப்படங்களைச் சேமிப்பவர்களுக்கு 5ஜிபி என்பது மிகக் குறைந்த அளவாகும்.இருப்பினும், கூகுள் ஒரு சிறிய நிபந்தனையுடன் மீண்டும் பழைய 15ஜிபி அளவை வழங்கத் தயாராக உள்ளது.
புதிய விதிகளின்படி, ஒரு பயனர் தனது கூகுள் கணக்குடன் கைபேசி எண்ணை (Phone Number) இணைத்து சரிபார்ப்பு (Verification) செய்தால் மட்டுமே முழுமையான 15ஜிபி ஸ்டோரேஜ் கிடைக்கும்.கணக்கை உருவாக்கும் போதே “Unlock 15 GB storage at no cost by using your phone number” என்ற வசதியைத் தேர்வு செய்து உங்கள் எண்ணை உறுதிப்படுத்த வேண்டும். அவ்வாறு செய்யத் தவறினால் உங்களுக்கு 5ஜிபி மட்டுமே ஒதுக்கப்படும்.
ஒரே நபர் பல பெயர்களில் போலி கணக்குகளை உருவாக்கி, கூகுளின் இலவச ஸ்டோரேஜை தவறாகப் பயன்படுத்துவதைத் தடுக்கவே இந்த நடவடிக்கை எடுக்கப்பட்டுள்ளதாகத் தெரிகிறது. “ஒரு நபருக்கு ஒரு 15ஜிபி” என்ற கொள்கையை உறுதிப்படுத்தவே போன் நம்பர் சரிபார்ப்பு கட்டாயமாக்கப்பட்டுள்ளது. இது மெமரி மற்றும் ஸ்டோரேஜ் ஹார்டுவேர் செலவுகள் அதிகரித்து வருவதையும் கணக்கில் கொண்டு எடுக்கப்பட்ட முடிவாகப் பார்க்கப்படுகிறது.
ஏற்கனவே பயன்பாட்டில் உள்ள பழைய கூகுள் கணக்குகளுக்கு இப்போதைக்கு இந்த மாற்றம் பொருந்தாது எனக் கூறப்படுகிறது.இருப்பினும், கூகுள் தனது உதவிப் பக்கங்களில் (Support Pages) “15ஜிபி கிடைக்கும்” என்பதற்குப் பதிலாக “15ஜிபி வரை கிடைக்கும்” (Up to 15GB) என வாசகங்களை மாற்றியுள்ளது. எனவே, வரும் காலங்களில் பழைய பயனர்களுக்கும் ஏதேனும் நிபந்தனைகள் விதிக்கப்படலாம்.
புதிய ஜிமெயில் கணக்கு தொடங்குபவர்கள், போதிய ஸ்டோரேஜ் கிடைக்க வேண்டுமெனில், பாதுகாப்பான முறையில் தங்களின் கைபேசி எண்ணை இணைத்துக் கொள்வதே சிறந்தது. இதன் மூலம் எவ்விதக் கட்டணமுமின்றி பழைய 15ஜிபி ஸ்டோரேஜ் வசதியைத் தொடர்ந்து பெற முடியும்.
