Pondicherry University PG Admission: மாணவர்களுக்கு அதிரடி வாய்ப்பு… புதுச்சேரி மத்திய பல்கலைக்கழக முதுநிலை படிப்புகளுக்கான விண்ணப்ப காலக்கெடு நீட்டிப்பு… புதிய தேதி இதோ!
புதுச்சேரி மத்திய பல்கலைக்கழகத்தில் (Pondicherry University) 2026-2027 ஆம் கல்வியாண்டிற்கான பல்வேறு முதுநிலைப் படிப்புகள் (PG Programmes) மற்றும் முதுநிலைப் பட்டயப் படிப்புகளில் (PG Diploma Programmes) சேருவதற்கான இணையவழி விண்ணப்ப செயல்முறை தற்பொழுது நீட்டிக்கப்பட்டுள்ளது.
இப்பல்கலைக்கழகத்தில் சேர்க்கை பெறுவதற்கு ஆன்லைன் மூலம் விண்ணப்பிப்பதற்கான காலக்கெடு நேற்றுடன் (ஜூன் 11, 2026) நிறைவடைந்திருந்தது. இந்த நிலையில், குறிப்பிட்ட காலத்திற்குள் தங்களது விண்ணப்பங்களைச் சமர்ப்பிக்க முடியாத மாணவர்களின் நலனைக் கருத்தில் கொண்டும், தகுதியுள்ள விண்ணப்பதாரர்களுக்கு மீண்டும் ஒரு நல்வாய்ப்பை வழங்கும் பொருட்டும் பல்கலைக்கழக நிர்வாகம் இந்த அதிரடி முடிவை எடுத்துள்ளது.
அதன்படி, தகுதியான மாணவர்கள் வரும் ஜூன் 15 ஆம் தேதி வரை ஆன்லைன் மூலமாகத் தங்களது விண்ணப்பங்களைச் சமர்ப்பிக்கலாம் எனப் பல்கலைக்கழகத்தின் துணைப் பதிவாளர் (கல்விப் பிரிவு) அதிகாரப்பூர்வமாகத் தெரிவித்துள்ளார்.
நடப்பு கல்வியாண்டில் செல்லுபடியாகும் சிஒஇடி பிஜி (CUET PG 2026) நுழைவுத்தேர்வு மதிப்பெண்களைக் கொண்டுள்ள மாணவர்கள் மட்டுமே இந்த முதுநிலை மற்றும் பட்டயப் படிப்புகளுக்கு விண்ணப்பிக்கத் தகுதியானவர்கள் ஆவர். இதுவரை விண்ணப்பிக்காத மற்றும் முந்தைய கட்டங்களில் தங்களது ஆன்லைன் விண்ணப்பப் பதிவை முழுமையாக முடிக்காத மாணவர்கள் இந்த நீட்டிக்கப்பட்ட கால அவகாசத்தைப் பயன்படுத்திப் பல்கலைக்கழகத்தின் அதிகாரப்பூர்வ இணையதளப் பக்கத்திற்குச் சென்று தங்களது பதிவுகளை உடனே பூர்த்தி செய்து கொள்ளலாம்.
