உலகின் முன்னணி ஆடம்பர விளையாட்டு கார் தயாரிப்பு நிறுவனமான ஃபெராரி (Ferrari), ஆட்டோமொபைல் வரலாற்றில் புதிய மைல்கல்லை எட்டியுள்ளது. அமெரிக்காவின் கலிபோர்னியா மாகாணத்தில் நடைபெற்ற புகழ்பெற்ற ஏலத்தில், ஃபெராரி நிறுவனத்தின் முதலாவது முழு மின்சார காரான (All-Electric Vehicle) ‘LUCE’ மாடலின் முதல் தயாரிப்பு வடிவம் சுமார் ரூ.382 கோடிக்கு ($40 Million) விற்பனையாகி சாதனை படைத்துள்ளது.
கடந்த ஆண்டு ஃபெராரியால் பிரத்யேகமாக வடிவமைக்கப்பட்ட ‘டேடோனா எஸ்பி3’ (Daytona SP3) மாடல் கார், ஏலத்தில் சுமார் ரூ.249 கோடிக்கு ($26 Million) விற்பனையானதே இதுவரை மிக அதிக விலையாக இருந்தது. தற்போது அந்த சாதனையை ‘LUCE’ மாடல் முறியடித்து, ஏலத்தில் மிக அதிக விலைக்கு விற்பனையான புதிய கார் என்ற வரலாற்று பெருமையைப் பெற்றுள்ளது. ‘சாசிஸ் 0’ (Chassis 0) என்ற வரிசை எண் கொண்ட இந்த முதல் பிரத்யேக கார், ஃபெராரியின் ‘டெய்லர் மேட்’ (Tailor Made) திட்டத்தின் கீழ் வாடிக்கையாளரின் விருப்பத்திற்கு ஏற்ப வடிவமைக்கப்பட்ட தனித்துவமான அம்சங்களைக் கொண்டுள்ளது.
இந்த அதிநவீன மின்சார கார் 1,035 குதிரைத்திறன் (bhp) ஆற்றலை வெளிப்படுத்தக்கூடியது மற்றும் முழுமையாக சார்ஜ் செய்தால் 530 கிலோமீட்டருக்கும் அதிகமான தூரம் பயணிக்கும் திறன் கொண்டது. இந்த வரலாற்றுச் சிறப்புமிக்க ஏலத்தின் மூலம் கிடைக்கப்பெற்ற முழுத் தொகையும் கல்விசார் தொண்டு நடவடிக்கைகளுக்காகப் பயன்படுத்தப்படும் என ஃபெராரி அறக்கட்டளை தெரிவித்துள்ளது. சுற்றுச்சூழல் பாதுகாப்பு மற்றும் நவீன தொழில் நுட்பத்தின் இணைப்பாக உருவாகியுள்ள இந்த மின்சார கார், சொகுசு வாகனச் சந்தையில் மிகப்பெரிய வரவேற்பைப் பெற்றுள்ளது.
