ஐபிஎல் 2026 சீசன் விறுவிறுப்பான இறுதிக்கட்டத்தை எட்டியுள்ள நிலையில், சென்னை சூப்பர் கிங்ஸ் (CSK) அணி லீக் சுற்றில் தனது சொந்த மைதானமான சேப்பாக்கத்தில் விளையாட இன்னும் ஒரே ஒரு போட்டி மட்டுமே மீதமுள்ளது. நாளை (மே 18) நடைபெறும் இந்த முக்கியமான ஆட்டத்தில் சிஎஸ்கே அணி, சன்ரைசர்ஸ் ஹைதராபாத் (SRH) அணியை எதிர்கொள்கிறது. இப்போட்டி இரு அணிகளின் பிளே-ஆஃப் வாய்ப்பிற்கும் எவ்வளவு முக்கியமோ, அதைவிட தோனி ரசிகர்களுக்கு உணர்வுபூர்வமாக மிக முக்கியமான ஒன்றாக மாறியுள்ளது.
ஏனெனில், நடப்பு சீசனில் தற்போதைய காயம் காரணமாக தல தோனி இதுவரை ஒரு போட்டியில் கூட பேட்டிங் செய்ய களம் இறங்கவில்லை. இதனால் நாளை சேப்பாக்கத்தில் நடக்கும் ஆட்டத்தில் தோனியை பேட்டிங்கில் பார்க்க முடியுமா என்ற ஏக்கம் ரசிகர்களிடம் உச்சகட்டத்தை எட்டியுள்ளது.
இதற்கிடையே, சிஎஸ்கே ரசிகர்களைப் பேரதிர்ச்சியில் ஆழ்த்தும் வகையில் ஒரு செய்தி இணையத்தில் காட்டுத்தீயாகப் பரவி வருகிறது. நாளை சேப்பாக்கம் மைதானத்தில் நடக்கும் போட்டியே தோனி சென்னையில் விளையாடும் கடைசிப் போட்டியாக இருக்கும் என்றும், ஆட்டம் முடிந்தவுடன் அவர் தனது அதிகாரப்பூர்வ ஐபிஎல் ஓய்வு முடிவை அறிவிக்க அதிக வாய்ப்புகள் உள்ளதாகவும் கிரிக்கெட் வட்டாரங்களில் பேசப்பட்டு வருகிறது.
தோனியின் இந்த திடீர் ஓய்வு குறித்த செய்திகள் சமூக வலைதளங்களில் ட்ரெண்டாகி வரும் வேளையில், இது ரசிகர்களிடையே பெரும் கவலையையும் விவாதங்களையும் கிளப்பியுள்ளது.
இந்த விவகாரம் குறித்து பிரபல கிரிக்கெட் வர்ணனையாளரும் ஆய்வாளருமான ஹர்ஷா போக்லே ஊடக விவாத நிகழ்ச்சி ஒன்றில் சுவாரசியமான கருத்து ஒன்றை முன்வைத்துள்ளார். சிஎஸ்கே மற்றும் ஹைதராபாத் அணிகளுக்கு இடையேயான போட்டியில் ஒரு பெரிய சர்ப்ரைஸ் காத்திருக்க வாய்ப்புள்ளதாக அவர் குறிப்பிட்டுள்ளார்.
“நாளை சேப்பாக்கம் மைதானத்தில் ஒரே ஒரு போட்டி மட்டுமே மீதமுள்ளது. ஒட்டுமொத்த மைதானமும் மஞ்சள் நிறமாக மாறும் என்பதில் சந்தேகமில்லை. அதே நேரத்தில், ரசிகர்களை முற்றிலும் ஆச்சரியத்தில் ஆழ்த்தும் வகையில் ஏதேனும் ஒரு அதிரடி முடிவு அல்லது ஒரு ‘ஹிட்ச்காக்கின் சஸ்பென்ஸ் பாணி’ (Hitchcockian appearance) என்ட்ரி தோனியிடம் இருந்து வெளிவந்தால், அதில் வியப்படைவதற்கு எதுவும் இல்லை” என்று ஹர்ஷா போக்லே பகுப்பாய்வு செய்துள்ளார். தோனி எப்போதுமே தனது முடிவுகளை யாருக்கும் தெரியாமல் திடீரென அறிவிப்பவர் என்பதால், ஹர்ஷா போக்லேவின் இந்த கருத்து ரசிகர்களின் இதயத் துடிப்பை எகிற வைத்துள்ளது.
