சர்வதேசப் பொருளாதாரப் போட்டியில் கடல்வழிப் பாதைகளில் உருவாகும் நெருக்கடிகளைச் சமாளிக்க, இந்தியாவிற்குப் புதிய தரைவழி ரயில் பாதையை அமைப்பதற்கான மாற்றுத் திட்டத்தை ரஷ்யா தீவிரமாகப் பரிசீலித்து வருகிறது.
கருங்கடல் மற்றும் சர்வதேச ரீதியாக மிக முக்கியப் போக்குவரத்துப் பாதையான ஹார்முஸ் நீரிணை (Strait of Hormuz) பகுதிகளில் நிலவும் பாதுகாப்பு அச்சுறுத்தல்கள், திடீர் நடுக்கடல் தடங்கல்கள் மற்றும் புவிசார் அரசியல் பதற்றங்கள் காரணமாகக் கடல்வழிச் சரக்குப் போக்குவரத்து அடிக்கடி பாதிக்கப்பட்டு வருகிறது. இந்த ஆபத்துகளைத் தவிர்க்கும் பொருட்டு, மாஸ்கோவிலிருந்து இந்தியாவிற்கு நேரடியாக நிலவழியாகவே சரக்குகளைக் கொண்டு சேர்க்கும் பிரம்மாண்ட ரயில் பாதையைத் தொடங்க ரஷ்ய அரசு திட்டமிட்டுள்ளது.
இந்தத் திட்டம் குறித்துப் பேசியுள்ள ரஷ்யத் துணைப் பிரதமர் மராட் குஸ்னுலின், மத்திய ஆசிய நாடுகள், ஈரான், ஆப்கானிஸ்தான் மற்றும் பாகிஸ்தான் ஆகிய நாடுகளின் நிலப்பரப்பு வழியாக இந்தியாவை இணைக்கும் வகையிலான புதிய ரயில் போக்குவரத்து சாத்தியக்கூறுகள் குறித்து ரஷ்யா ஆராய்ந்து வருவதாகத் தெரிவித்துள்ளார்.
இந்தியாவிற்கு மாற்று வர்த்தக வழித்தடங்களை உருவாக்க மாஸ்கோ தொடர்ந்து முயன்று வரும் நிலையில், இந்த தரைவழி ரயில் இணைப்பு நடைமுறைக்கு வந்தால் இரு நாடுகளுக்கு இடையேயான வர்த்தக நேரம் மற்றும் செலவு கணிசமாகக் குறையும் என எதிர்பார்க்கப்படுகிறது.
அதேவேளையில், இந்த ரயில் பாதை அமைக்கப்பட்டாலும், ரஷ்யாவின் மாஸ்கோவில் தொடங்கி பசிபிக் பெருங்கடல் கரையோரம் உள்ள விளாடிவோஸ்டாக் வரை செல்லும் உலகின் மிக நீண்ட நேரடி ரயில்வே பாதையான டிரான்ஸ்-சைபீரியன் இரயில்வேயே (Trans-Siberian Railway – 9,289 கி.மீ) தொடர்ந்து உலகின் முதன்மை நீண்ட ரயில் பாதையாக நீடிக்கும் என்பது குறிப்பிடத்தக்கது.