இந்திய உணவுகளின் தனித்துவமான சுவைக்கும், மணத்திற்கும் உலக அளவில் எப்போதும் பெரும் வரவேற்பு உண்டு. இதனை மெய்ப்பிக்கும் வகையில், பிரபல சர்வதேச உணவு வழிகாட்டி இணையதளமான TasteAtlas வெளியிட்டுள்ள “உலகின் சிறந்த 100 சிக்கன் உணவுகள்” பட்டியலில் இந்தியாவின் 6 பாரம்பரிய உணவுகள் இடம்பிடித்துச் சாதனை படைத்துள்ளன.
உலகம் முழுவதும் உள்ள உணவுப் பிரியர்களின் வாக்குகள் மற்றும் நிபுணர்களின் கருத்துக்களின் அடிப்படையில் இந்தப் பட்டியல் தயாரிக்கப்பட்டுள்ளது. இதில் இந்தியாவின் பெருமையான பட்டர் சிக்கன் (Butter Chicken) சர்வதேச அளவில் 6-வது இடத்தைப் பிடித்து அசத்தியுள்ளது. இதனைத் தொடர்ந்து, வெளிநாட்டினரால் அதிகம் விரும்பப்படும் தந்தூரி சிக்கன் 22-வது இடத்தையும், தென்னிந்தியாவின் காரசாரமான சிக்கன் 65 27-வது இடத்தையும் பெற்றுள்ளன.
பட்டியலில் இடம்பெற்ற பிற உணவுகள் குறித்துப் பார்க்கையில், முர்க் டிக்கா 53-வது இடத்தையும், கொல்கத்தாவின் புகழ்பெற்ற தெருவோர உணவான சிக்கன் கதி ரோல் 70-வது இடத்தையும் பிடித்துள்ளன. மேலும், நறுமணமிக்க முர்க் ரெசாலா 96-வது இடத்தைப் பிடித்து இந்தப் பட்டியலில் இணைந்துள்ளது.
இந்திய உணவு கலாச்சாரம் உலக அரங்கில் தொடர்ந்து அங்கீகரிக்கப்பட்டு வருவது இந்திய சமையல் கலைஞர்கள் மற்றும் உணவுப் பிரியர்களிடையே பெரும் மகிழ்ச்சியை ஏற்படுத்தியுள்ளது. ஏற்கனவே கடந்த காலங்களில் பல்வேறு இந்திய உணவுகள் இந்தப் பட்டியலில் இடம்பிடித்துள்ள நிலையில், தற்போது ஒரே நேரத்தில் 6 சிக்கன் உணவுகள் டாப் 100 பட்டியலில் இணைந்திருப்பது குறிப்பிடத்தக்கது.
