உலகப் புகழ்பெற்ற திருமலை ஸ்ரீவேங்கடேஸ்வர சுவாமி திருக்கோயிலில் நடைபெறவுள்ள ஸ்ரீவாரி நவராத்திரி பிரம்மோற்சவத்தை முன்னிட்டு, சாதாரண பக்தர்களின் வேகமான தரிசனத்தை உறுதி செய்யும் நோக்கில் திருமலை திருப்பதி தேவஸ்தானம் (TTD) விரிவான கட்டுப்பாடுகளை அமல்படுத்தியுள்ளது. வரும் அக்டோபர் 11-ஆம் தேதி முதல் அக்டோபர் 20-ஆம் தேதி வரை 10 நாட்களுக்கு அனைத்து விதமான VIP பிரேக் தரிசனங்கள் மற்றும் சிறப்புச் சலுகை தரிசனங்கள் முழுமையாக ரத்து செய்யப்படுவதாக TTD அதிகாரப்பூர்வமாக அறிவித்துள்ளது.
திருப்பதி திருமலையில் ஒவ்வொரு ஆண்டும் புரட்டாசி மாதத்தில் லட்சக்கணக்கான பக்தர்கள் குவிவது வழக்கம். இந்த ஆண்டு நவராத்திரி பிரம்மோற்சவமும் இதே காலத்தில் இணைவதால் ஏற்படும் மிகப்பெரிய கூட்ட நெரிசலைக் கையாள தேவஸ்தானம் இந்த அதிரடி முடிவை எடுத்துள்ளது. இதன் காரணமாக அக்டோபர் 10 முதல் 19-ஆம் தேதி வரை VIP பரிந்துரைக் கடிதங்கள் எதுவும் ஏற்றுக்கொள்ளப்படாது. சட்டப்பூர்வமான புரோட்டோகால் முக்கிய பிரமுகர்களுக்கு மட்டுமே விலக்கு அளிக்கப்படும். மேலும், முதியோர்கள், மாற்றுத்திறனாளிகள், கைக்குழந்தைகளுடன் வரும் பெற்றோர்கள், NRI பக்தர்கள் மற்றும் பாதுகாப்புப் படையினருக்கான சிறப்பு தரிசனப் பிரிவுகளும் இந்த 10 நாட்களுக்கு முழுமையாக நிறுத்தி வைக்கப்பட்டுள்ளன.
இதனிடையே, பக்தர்களின் வசதிக்காக ரூ.300 சிறப்புப் பிரவேச தரிசன டிக்கெட்டுகளை TTD புதன்கிழமை (அக்டோபர் 7) காலை 10 மணிக்குத் தனது அதிகாரப்பூர்வ இணையதளத்தில் வெளியிடவுள்ளது. அக்டோபர் 12, 13, 14, 18, 19 மற்றும் 20 ஆகிய குறிப்பிட்ட பிரம்மோற்சவ நாட்களுக்கு நாள் ஒன்றுக்கு 10,000 டிக்கெட்டுகள் வீதம் ஆன்லைனில் ஒதுக்கீடு செய்யப்படும். பக்தர்களின் பாதுகாப்பான பயணத்தை உறுதி செய்ய, திருப்பதி ரயில் நிலையம் மற்றும் பேருந்து நிலையங்களில் கூடுதல் கட்டணம் வசூலித்த 18 தனியார் வாகனங்கள் பறிமுதல் செய்யப்பட்டு ரூ.1 லட்சம் அபராதம் விதிக்கப்பட்டு போக்குவரத்துத் துறை கடும் நடவடிக்கை எடுத்துள்ளது.