சட்டமன்றத்தில் காரசார விவாதம்! முதல்வர் விஜய்க்கு 8 முறை எழுந்து நின்று பிறந்தநாள் வாழ்த்து பாடிய முன்னாள் அமமுக காமராஜ்!: “இனி ஆளுநருடன் மோதல் இல்லை, நட்பின் பாலம்!” மன்னார்குடி தொகுதிக்கு கோரிக்கைகளை அள்ளி வீசி எம்.எல்.ஏ அதிரடி பேச்சு!

தமிழக சட்டப்பேரவையின் தவெக அரசின் முதல் கூட்டத்தொடரின் மூன்றாம் நாள் அமர்வு இன்று விறுவிறுப்பாக நடைபெற்றது. அவையில் காவிரி நதிநீர் விவகாரம் தொடர்பான அரசினர் தீர்மானம் ஏகமனதாக நிறைவேற்றப்பட்டதைத் தொடர்ந்து, நீர்வளத்துறை மற்றும் பொதுப்பணித்துறை அமைச்சர்கள் விவசாயிகளின் சந்தேகங்களுக்கு விரிவான விளக்கங்களை அளித்தனர். இதன் பின்னர், ஆளுநர் உரைக்கு நன்றி தெரிவிக்கும் தீர்மானத்தின் மீதான விவாதம் தொடங்கியது.

8 முறை எழுந்த காமராஜ் – அவையில் சுவாரசியம்: விவாதத்தில் பேசுவதற்காக மன்னார்குடி தொகுதி சட்டமன்ற உறுப்பினர் காமராஜ் அழைக்கப்பட்ட போது, மற்ற உறுப்பினர்களின் குறுக்கீடுகளால் தொடர்ந்து தாமதம் ஏற்பட்டது. எனினும், விடாப்பிடியாகத் தனது உரையைத் தொடங்கிய காமராஜ், “இன்று அவையில் உறுப்பினர்கள் குறுக்கிட்டதால் நான் எழுந்து அமர்வது இது எட்டாவது முறை. எத்தனையோ தடங்கல்கள் வந்தாலும், இன்று தனது 53-வது பிறந்தநாளைக் கொண்டாடும் நமது மாண்புமிகு முதலமைச்சர் அவர்களுக்கு எனது உளமார்ந்த பிறந்தநாள் நல்வாழ்த்துக்களைத் தெரிவித்துக் கொள்கிறேன். அவர் நல்ல உடல்நலத்துடன் நீண்ட ஆயுள் பெற்று மக்கள் தொண்டாற்ற இறைவனைப் பிரார்த்திக்கிறேன்” என நெகிழ்ச்சியுடன் குறிப்பிட்டார்.

ஆளுநர் உரை குறித்துப் பாராட்டு: தொடர்ந்து பேசிய அவர், “கடந்த காலங்களில் ஆளுநர் உரை என்றாலே அவையில் ஒரு பதற்றம் தொற்றிக் கொள்ளும். ஆனால், இந்த முறை தவெக அரசு அமைந்த பிறகு அவை தொடங்கிய உடனே தமிழ்த்தாய் வாழ்த்தும், தேசிய கீதமும் கம்பீரமாக முழங்கியது. ஆளுநர் அவர்களும் மிகுந்த புன்னகையோடு தனது உரையை வாசித்து முடித்தார். ‘புதிய உதயம் தோன்றிய நாள், நாம் இணைந்து பயணிக்கத் தொடங்கியுள்ளோம்’ என ஆளுநர் மாளிகையே செய்திக்குறிப்பு வெளியிட்டுப் பாராட்டியுள்ளது. நம் முதல்வர் நாற்காலியில் அமர்ந்த உடனேயே, அரசுக்கும் ஆளுநர் மாளிகைக்கும் இடையே இருந்த எல்லைக்கோடு அழிக்கப்பட்டு அது நட்பின் பாலமாக மாறிவிட்டது. மத்திய அரசுடன் இணக்கமான உறவைப் பேணி மாநிலத்தை வளர்க்கும் முதிர்ச்சியான அரசியலை முதல்வர் கற்றுக்கொடுத்துள்ளார். இந்த விசில் புரட்சி மூலம் தமிழ்நாட்டில் நல்லாட்சி அமையப் பூர்வாங்க நடவடிக்கைகள் தொடங்கியுள்ளன” என்றார்.

மன்னார்குடி தொகுதி கோரிக்கைகள்: ஆளுநர் உரைக்கு நன்றி தெரிவித்துத் தனது உரையை நிறைவு செய்யும் முன்பாக, தனது மன்னார்குடி தொகுதி சார்ந்த முக்கியக் கோரிக்கைகளைச் சபாநாயகர் வாயிலாக அரசின் கவனத்திற்குக் கொண்டு வந்தார் எம்.எல்.ஏ காமராஜ்.

• 125 ஆண்டுகள் பழமையான மன்னார்குடி நகராட்சிக்கு இதுவரை ஒருங்கிணைந்த நீதிமன்ற வளாகம் இல்லை, அதை உடனடியாக அமைத்துத் தர வேண்டும்.

• விளையாட்டில் ஆர்வம் மிக்க இளைஞர்கள் அதிகம் உள்ள பரவாக்கோட்டை மற்றும் உள்ளிக்கோட்டை பகுதிகளில் புதிய விளையாட்டு அரங்கம் (Stadium) அமைத்துத் தர வேண்டும்.

• நீடாமங்கலம் பேரூராட்சியில் நிலவி வரும் போக்குவரத்து நெரிசலைக் குறைக்க, அங்குப் புதிய பேருந்து நிலையம் அமைக்கப்பட வேண்டும்.

• நீடாமங்கலம் ஊராட்சி ஒன்றியத்தைப் பிரித்து, வடுவூரைத் தலைமையிடமாகக் கொண்டு ஒரு புதிய ஊராட்சி ஒன்றியம் உருவாக்கப்பட வேண்டும்.

இந்தக் கோரிக்கைகளை முதல்வர் விஜய் தலைமையிலான அரசு விரைந்து நிறைவேற்ற வேண்டும் என அவர் கேட்டுக்கொண்டார்.