கிராமப்புற பொருளாதாரத்தை வலுப்படுத்தவும், இயற்கை விவசாயத்தை மாநிலம் முழுவதும் பரவலாக்கவும் உத்தரப்பிரதேச அரசு ஒரு புதிய மற்றும் வரலாற்றுச் சிறப்புமிக்க முடிவை எடுத்துள்ளது. மாநிலத்தில் உள்ள விவசாயிகளிடம் இருந்து பசுவின் சிறுநீரை (கோமூத்திரம்) நேரடியாகக் கொள்முதல் செய்யும் முன்னோடித் திட்டத்தை முதல்வர் யோகி ஆதித்யநாத் தலைமையிலான அரசு அதிகாரப்பூர்வமாகத் தொடங்கியுள்ளது. இந்த புதிய திட்டத்தின் கீழ், விவசாயிகளிடம் இருந்து ஒரு லிட்டர் கோமூத்திரம் 10 ரூபாய் என்ற நிர்ணயிக்கப்பட்ட விலையில் வாங்கப்படுகிறது.
உத்தரப்பிரதேச மாநிலம் புலந்தஷாஹர் மாவட்டத்தில் உள்ள சியானா தாலுகாவிற்கு உட்பட்ட நர்சைனா கிராமத்தில் இந்த திட்டம் முதன்முதலாகப் பரீட்சார்த்த முறையில் தொடங்கப்பட்டுள்ளது. தற்போது புலந்தஷாஹர் மாவட்டத்தைச் சேர்ந்த சுமார் 15 கிராமங்கள் இந்த முன்னோடித் திட்டத்தின் கீழ் இணைக்கப்பட்டுள்ளன. இக்கிராமங்களில் இருந்து நாள்தோறும் சராசரியாக 500 லிட்டர் பசு சிறுநீர் சேகரிக்கப்பட்டு வருகிறது. இவ்வாறு சேகரிக்கப்படும் கோமூத்திரமானது இயற்கை உரங்கள், பூச்சிக்கொல்லிகள் மற்றும் பல்வேறு விவசாயப் பயன்பாடுகளுக்கான மூலப்பொருளாகப் பயன்படுத்தப்பட உள்ளது.
விவசாயத்திற்குப் பயனளிப்பது மட்டுமின்றி, கிராமப்புற வாழ்வாதாரத்தை மேம்படுத்துவதிலும் இத்திட்டம் முக்கிய பங்கு வகிக்கிறது. இத்திட்டத்தின் மூலம் சுமார் 300 கிராமப்புறப் பெண்கள் நேரடியாகப் பங்குதாரர்களாக இணைக்கப்பட்டு, அவர்களுக்கு நிலையான சுயவேலைவாய்ப்பு உறுதி செய்யப்பட்டுள்ளது. இரசாயன உரங்களின் பயன்பாட்டைக் குறைத்து, இயற்கை சார்ந்த வேளாண்மையை ஊக்கப்படுத்தும் அதேவேளையில், கால்நடை வளர்ப்போருக்குக் கூடுதல் வருவாய் ஈட்டித் தரும் இந்த முயற்சிக்கு மாநில மக்களிடையே பெரும் வரவேற்பு கிடைத்து வருகிறது.
