உலக அளவில் அதிவேகமாக வளர்ந்து வரும் செயற்கை நுண்ணறிவு (AI) தொழில்நுட்பம் மனித சமுதாயத்திற்குப் பல்வேறு நன்மைகளை வழங்கி வந்தாலும், அதன் பின்னணியில் ஒளிந்திருக்கும் பேரழிவு ஆபத்துகள் குறித்து மைக்ரோசாப்ட் நிறுவனத்தின் இணை நிறுவனர் பில் கேட்ஸ் மீண்டும் ஒருமுறை உலக நாடுகளை அதிர வைக்கும் எச்சரிக்கையை விடுத்துள்ளார். பிரபல சர்வதேச ஊடகத்திற்கு அளித்த சிறப்புப் பேட்டியில், தீய நோக்கமுடைய நபர்கள் அல்லது சர்வதேச பயங்கரவாத அமைப்புகளின் கைகளில் ஏஐ தொழில்நுட்பம் ஆயுதமாகச் சிக்கினால், அது சுமார் 100 கோடி உயிரிழப்புகளை ஏற்படுத்தக்கூடிய அளவுக்குப் மிக வலிமையான பேராபத்தாக உருவெடுக்கும் என்று அவர் பகிரங்கமாகக் கூறியுள்ளார்.
தொழில்நுட்ப நிறுவனங்கள் தங்களைத் தாங்களே சுயகட்டுப்பாட்டுடன் (Self-regulation) கண்காணித்துக் கொள்ளும் தற்போதைய நடைமுறை எந்த வகையிலும் போதுமானதாக இருக்காது என்பதைச் சுட்டிக்காட்டிய அவர், ஏஐ நிறுவனங்களைக் கண்காணிக்கவும் அதன் தவறான பயன்பாட்டைத் தடுக்கவும் உலக நாடுகளின் அரசுகளும், நாடாளுமன்றங்களும் சட்டப்பூர்வமான கடுமையான விதிமுறைகளை உடனடியாக அமல்படுத்த வேண்டும் என வலியுறுத்தினார். ‘ஓபன் சோர்ஸ்’ (Open-source) முறையில் கிடைக்கும் ஏஐ கருவிகளைப் பயன்படுத்தி ஆபத்தான உயிரியல் ஆயுதங்களை (Bioweapons) வடிவமைப்பது, மருத்துவமனைகள், மின் விநியோகக் கட்டமைப்புகள் மற்றும் நிதி அமைப்புகள் மீது பாரிய சைபர் தாக்குதல்களை நடத்துவது ஆகியவை மனித குலத்திற்கு உடனடி அச்சுறுத்தலாக மாறியுள்ளன.
மேலும், ஏஐ தொழில்நுட்பத்தின் வருகையால் மென்பொருள் மேம்பாடு, வாடிக்கையாளர் சேவை மற்றும் கிடங்குப் பணிகள் (Warehouse Operations) உள்ளிட்ட பல துறைகளில் பணிபுரியும் மில்லியன் கணக்கான தொழிலாளர்களின் வேலைவாய்ப்புகள் கடுமையாகப் பாதிக்கப்படும் அபாயமும் உள்ளது. எவ்வாறாயினும், சரியான மேற்பார்வை மற்றும் சர்வதேச கட்டுப்பாடுகளுடன் ஏஐ பயன்படுத்தப்பட்டால், மருத்துவத் துறையில் புதிய மருந்துகளின் கண்டுபிடிப்பை விரைவுபடுத்தவும், தரமான மருத்துவச் சேவையை உலகெங்கிலும் உள்ள மக்களுக்குக் கொண்டு சேர்க்கவும் இது பெரும் உதவியாக இருக்கும் என்றும் பில் கேட்ஸ் நம்பிக்கை தெரிவித்துள்ளார்.