கார்ப்பரேட் நிறுவனங்கள் என்றாலே வேலைப்பளு, டார்கெட் என ஊழியர்களை அழுத்தி வைக்கும் இடமாகப் பார்க்கப்படும் நிலையில், டெல்லியைச் சேர்ந்த ஒரு நிறுவனம் தனது ஊழியர்களுக்கு வழங்கியுள்ள ‘அன்னையர் தின’ (Mother’s Day) பரிசு இணையதளங்களில் நெகிழ்ச்சியை ஏற்படுத்தியுள்ளது.
StepUp Strategy-யின் மாஸ்டர் பிளான்!
டெல்லியைத் தலைமையிடமாகக் கொண்டு இயங்கும் StepUp Strategy என்ற மார்க்கெட்டிங் நிறுவனம், இந்த ஆண்டு அன்னையர் தினத்தைக் கொண்டாடத் தனது ஊழியர்களுக்கு ஒரு அற்புதமான சலுகையை அறிவித்துள்ளது. அந்த அறிவிப்பின்படி, ஊழியர்கள் அனைவரும் தங்களது தாயுடன் நேரத்தைச் செலவிட 3 நாட்கள் சம்பளத்துடன் கூடிய விடுமுறை (Paid Leave) வழங்கப்பட்டுள்ளது.
ரூ.10,000 போனஸ் பரிசு!
வெறுமனே விடுமுறை மட்டும் வழங்காமல், அம்மாவுக்குப் பிடித்தமான பரிசு வாங்க அல்லது அவருடன் வெளியே சென்று உணவருந்த ஏதுவாக, ஒவ்வொரு ஊழியருக்கும் ரூ.10,000 ரொக்கப்பணம் போனஸாக வழங்கப்பட்டுள்ளது. அந்த நிறுவனத்தின் நிறுவனரான பிரீத்திகா மேத்தா (Pritika Mehta) இது குறித்துத் தனது சமூக வலைதளப் பக்கத்தில் பகிர்ந்துள்ளார்.
“நமது வாழ்க்கையின் தூணாக இருக்கும் அம்மாக்களுடன் தரமான நேரத்தைச் செலவிடுவது மிகவும் அவசியம். வேலைப்பளுவுக்கு இடையில் அவர்கள் நமக்காகச் செய்த தியாகங்களை நாம் மறந்துவிடக்கூடாது. அதற்காகவே இந்தச் சிறிய முயற்சி” என அவர் தெரிவித்துள்ளார்.
இணையத்தில் குவியும் பாராட்டுக்கள்
இந்த அறிவிப்பு வெளியான சில நிமிடங்களிலேயே இது வைரலாகத் தொடங்கியது. “எங்கள் கம்பெனியிலும் இது போன்ற அறிவிப்புகளை வெளியிட்டால் எவ்வளவு நன்றாக இருக்கும்”, “சிறந்த நிறுவன கலாச்சாரத்திற்கு இதுவே சான்று” எனப் பலரும் தங்களது கருத்துகளைப் பகிர்ந்து வருகின்றனர். ஊழியர்களின் நலனில் அக்கறை காட்டும் இதுபோன்ற நிறுவனங்கள் மற்ற கார்ப்பரேட் நிறுவனங்களுக்கு ஒரு முன்னுதாரணமாகத் திகழ்கின்றன என்பதில் சந்தேகமில்லை.
