Global Health Alert: “விமான நிலையங்கள் உஷார்!” அச்சுறுத்தும் எபோலா வைரஸ்; இந்திய அரசு வெளியிட்ட புதிய அவசர பயண வழிகாட்டு நெறிமுறைகள்; முழு விவரம்!

ஆப்பிரிக்க நாடுகளில் தற்பொழுது எபோலா வைரஸ் (Ebola Virus) பாதிப்பு மீண்டும் மிகத் தீவிரமாகக் கண்டறியப்பட்டு, உலக சுகாதார நிறுவனத்தால் (WHO) சர்வதேச பொதுச் சுகாதார அவசரநிலையாக அறிவிக்கப்பட்டுள்ளது. இதனைத் தொடர்ந்து, இந்தியாவிற்குள் இந்த ஆபத்தான வைரஸ் பரவுவதைத் தடுப்பதற்காக ஒன்றிய அரசு தற்பொழுது அதிரடியான முன்னெச்சரிக்கை நடவடிக்கைகளில் இறங்கியுள்ளது.

மத்திய சுகாதார மற்றும் குடும்ப நல அமைச்சகத்தின் கீழ் இயங்கும் சுகாதாரப் பணிகள் பொது இயக்குநரகம் (DGHS), நாட்டின் அனைத்து சர்வதேச விமான நிலையங்களுக்கும் ஒரு புதிய அவசரப் பயண வழிகாட்டு நெறிமுறையை வெளியிட்டுள்ளது.

வெளியாகியுள்ள அதிகாரப்பூர்வ உத்தரவின்படி, எபோலா வைரஸ் பாதிப்பு அதிகம் உள்ளதாகக் கண்டறியப்பட்டுள்ள காங்கோ (DR Congo), உகாண்டா (Uganda) மற்றும் சூடான் (Sudan) ஆகிய ஆப்பிரிக்க நாடுகளிலிருந்து இந்தியா வரும் பயணிகள் அனைவரும் இனி தீவிரக் கண்காணிப்பிற்கு உட்படுத்தப்படுவார்கள்.

இந்த நாடுகளில் இருந்து நேரடியாகவோ அல்லது பிற நாடுகள் வழியாகவோ (Transit) இந்தியாவிற்கு வரும் பயணிகள், தங்களது குடியுரிமைச் சரிபார்ப்பிற்கு (Immigration Clearance) முன்பாகவே விமான நிலைய மருத்துவக் குழுவிடம் தங்களை முழுமையான பரிசோதனைக்கு உட்படுத்திக் கொள்ள வேண்டும் என்று அறிவுறுத்தப்பட்டுள்ளது.

மத்திய அரசு வெளியிட்டுள்ள புதிய சுகாதாரச் சுற்றறிக்கையில் சர்வதேசப் பயணிகளுக்குச் சில முக்கிய உத்தரவுகள் பிறப்பிக்கப்பட்டுள்ளன:

• அறிகுறிகள் கண்காணிப்பு: சம்பந்தப்பட்ட ஆப்பிரிக்க நாடுகளிலிருந்து வரும் பயணிகளுக்குத் திடீர் காய்ச்சல், உடல் சோர்வு, தலைவலி, தசை வலி, வாந்தி, வயிற்றுப்போக்கு அல்லது உடலில் விவரிக்க முடியாத இரத்தப்போக்கு போன்ற அறிகுறிகள் இருந்தால், உடனடியாக ஏர்போர்ட் ஹெல்த் டெஸ்க்கில் தெரிவிக்க வேண்டும்.

• 21 நாட்கள் தனிமை: இந்தியா வந்தடைந்த 21 நாட்களுக்குள் மேற்கண்ட ஏதேனும் அறிகுறிகள் தென்பட்டால், அவர்கள் தங்களது முந்தைய பயண விவரங்களை மறைக்காமல் உடனடியாக அருகில் உள்ள அரசு மருத்துவ அதிகாரிகளிடம் தெரிவிக்க வேண்டும்.

• விமான நிறுவனங்களுக்கு உத்தரவு: சர்வதேச விமானங்களுக்குள் இதுகுறித்த விழிப்புணர்வு அறிவிப்புகளைச் செய்யவும், சுயவிவரப் படிவங்களை (Self-Declaration Cards) விநியோகிக்கவும் உத்தரவிடப்பட்டுள்ளது.

இந்தியாவில் இதுவரை யாருக்கும் எபோலா வைரஸ் பாதிப்பு கண்டறியப்படவில்லை என்றாலும், முன்னெச்சரிக்கை நடவடிக்கையாக இந்த அவசரப் பாதுகாப்பு வளையம் உருவாக்கப்பட்டுள்ளது. விமான நிலையங்களில் இதற்காகத் தனிமைப்படுத்தப்பட்ட வார்டுகளும், அவசரக்கால ஆம்புலன்ஸ் வசதிகளும் தயார் நிலையில் வைக்கப்பட்டுள்ளன.