தமிழகம் முழுவதும் உள்ள பள்ளி மாணவர்களுக்கான நீண்ட கோடை விடுமுறை தற்பொழுது நிறைவடைந்துள்ளது. இதனைத் தொடர்ந்து, இன்று ஜூன் 4 ஆம் தேதி வியாழக்கிழமை முதல் அனைத்துப் பள்ளிகளும் புதிய கல்வி ஆண்டிற்காக அதிகாரப்பூர்வமாகத் திறக்கப்பட்டுள்ளன. நீண்ட நாட்களுக்குப் பிறகு தங்களது நண்பர்களை நேரில் காணும் ஆர்வத்துடனும், புதிய வகுப்புகளுக்குச் செல்லும் உற்சாகத்துடனும் மாணவ, மாணவிகள் இன்று காலை முதல் தங்களது பள்ளிகளுக்கு வரத் தொடங்கினர்.
பள்ளிக்கு முதல் நாளில் வருகை தரும் குழந்தைகளை ஊக்கப்படுத்தும் வகையில், தமிழகத்தின் பெரும்பாலான பள்ளிகளில் ஆசிரியர்கள் வாசலிலேயே நின்று மாணவர்களுக்குப் பூங்கொத்துகள் மற்றும் இனிப்புகள் வழங்கி இன்முகத்துடன் வரவேற்றனர்.
பள்ளிகள் திறக்கப்பட்ட முதல் நாளான இன்று, அரியலூர் மாவட்டத்தில் உள்ள ஒரு அரசுப் பள்ளியில் அரங்கேறிய நெகிழ்ச்சியான சம்பவம் ஒன்று தற்பொழுது சமூக வலைத்தளங்களில் பலரது கவனத்தையும் ஈர்த்து வருகிறது. விடுமுறை முடிந்து பள்ளிக்குத் திரும்பிய சிறுவன் ஒருவன், வகுப்பறைக்குள் செல்ல மறுத்து அழுதுகொண்டே ஆசிரியைக்கு ஒரு மிரட்டலான நிபந்தனையை விதித்தான்.
“எனக்கு ஹோம் ஒர்க் (Homework) எதுவும் தரக்கூடாது, அப்படித் தரமாட்டேன் என்று சொன்னால் தான் நான் வகுப்பறைக்கு வருவேன்” என்று அந்த சிறுவன் அழுதபடி கண்டிஷன் போட்ட காட்சி அங்கிருந்தவர்களைப் புன்னகைக்க வைத்தது. இதையடுத்து, அந்த ஆசிரியை சற்றும் கோபப்படாமல், அந்த சிறுவனைத் தட்டிக்கொடுத்து, சமாதானப்படுத்தி மிகவும் அன்போடு வகுப்பறைக்குள் அழைத்துச் சென்றார். இந்த நெஞ்சுருக வைக்கும் வீடியோ தற்பொழுது இணையத்தில் வேகமாகப் பரவி வருகிறது.
புதிய கல்வி ஆண்டின் முதல் நாளில் அடி எடுத்து வைக்கும் தமிழக மாணவச் செல்வங்களுக்குத் தமிழக முதல்வர் விஜய் தனது அதிகாரப்பூர்வ எக்ஸ் (X) தளப் பக்கத்தில் நெகிழ்ச்சியான வாழ்த்துச் செய்தியைப் பகிர்ந்துள்ளார்.
இந்தக் கல்வி ஆண்டின் முதல் நாளை, புதிய நம்பிக்கையோடு தொடங்கும் என் அன்பிற்குரிய மாணவச் செல்வங்களுக்கு மனமார்ந்த வாழ்த்துகள்.
கல்விதான் உங்கள் எதிர்காலத்தை ஒளிமயமாக்கும் சக்தி. உயரிய கனவுகளை வளர்த்துக் கொள்ளுங்கள், அதற்கேற்ப கடினமாக உழையுங்கள். பள்ளிக்குச் செல்லும் ஒவ்வொரு…
அவரது அதிகாரப்பூர்வ பதிவில், “இந்தக் கல்வி ஆண்டின் முதல் நாளை, புதிய நம்பிக்கையோடு தொடங்கும் என் அன்பிற்குரிய மாணவச் செல்வங்களுக்கு மனமார்ந்த வாழ்த்துகள். கல்விதான் உங்கள் எதிர்காலத்தை ஒளிமயமாக்கும் சக்தி. உயரிய கனவுகளை வளர்த்துக் கொள்ளுங்கள், அதற்கேற்ப கடினமாக உழையுங்கள். பள்ளிக்குச் செல்லும் ஒவ்வொரு நாளும் உங்கள் வாழ்க்கையில் முன்னேற்றமாக இருக்கட்டும். மகிழ்ச்சியாக கற்றுக்கொள்ளுங்கள், வெற்றி உங்களைத் தேடி வரும்!” என்று முதல்வர் விஜய் தனது வாழ்த்துகளைத் தெரிவித்துள்ளார்.
பள்ளிகள் திறக்கப்பட்ட முதல் நாளான இன்று, பாடப்புத்தகங்கள் விநியோகம் மற்றும் வகுப்பறை ஒழுங்குமுறைகள் போன்ற முதற்கட்ட பணிகள் தொய்வின்றி நடைபெற்று வருவதாகப் பள்ளிக் கல்வித்துறை வட்டாரங்கள் தெரிவித்துள்ளன.
