இந்திய கிரிக்கெட் கட்டுப்பாட்டு வாரியத்தின் (BCCI) மிக முக்கியமான மற்றும் உலகப் புகழ்பெற்ற வர்த்தகத் தொடரான இந்திய பிரீமியர் லீக் (IPL) தொடரை உருவாக்கிய முன்னாள் கமிஷனர் லலித் மோடி, பல ஆண்டுகால மௌனத்திற்குப் பிறகு ஒரு மிகப்பெரிய அதிர்ச்சித் தகவலை வெளியிட்டுள்ளார். தான் கிரிக்கெட் நிர்வாகத் துறையிலிருந்து நிரந்தரமாக விலகியதற்கும், இந்தியாவை விட்டு வெளியேறியதற்கும் பின்னால் இருந்த உண்மையான காரணத்தை அவர் தற்பொழுது வெளிப்படுத்தியுள்ளார். இந்தியாவின் மிக முக்கிய தேடப்படும் குற்றவாளியான நிழலுலக தாதா தாவுத் இப்ராகிம் மற்றும் அவனது ‘டி கம்பெனி’ (D-Company) சிண்டிகேட் தனக்குக் கொடுத்த தொடர் கொலை மிரட்டல்களே இதற்குக் காரணம் என லலித் மோடி ஏஎன்ஐ (ANI) செய்தி நிறுவனத்திற்கு அளித்த பிரத்யேக பேட்டியில் தெரிவித்துள்ளார்.
நவீன கிரிக்கெட்டின் மிகப்பெரிய வணிகப் பின்னணியில் மறைந்திருந்த இந்த நிழலுலக அச்சுறுத்தல்கள், ஒட்டுமொத்த விளையாட்டு மற்றும் அரசியல் வட்டாரங்களில் தற்பொழுது பெரும் புயலைக் கிளப்பியுள்ளது.
லலித் மோடியின் கூற்றுப்படி, சர்வதேச அளவில் கிரிக்கெட் போட்டிகளை மையமாகக் கொண்டு இயங்கும் சட்டவிரோத சூதாட்ட சந்தையை (Satta Bazaar) தாவுத் இப்ராகிம் பல ஆண்டுகளாகத் தனது கட்டுப்பாட்டில் வைத்துள்ளான். ஐபிஎல் தொடர் தொடங்கப்பட்ட ஆரம்பக் காலங்களில், ஒரு போட்டிக்கு சுமார் 2 பில்லியன் டாலராக இருந்த இந்த சட்டவிரோத சூதாட்ட வணிகம், தற்பொழுது ஒரு போட்டிக்கு 4 பில்லியன் டாலர் (சுமார் 33,000 கோடி ரூபாய்) என்ற அசாத்திய நிலைக்கு உயர்ந்துள்ளதாக அவர் குறிப்பிட்டுள்ளார். போட்டிகளில் ‘ஸ்பாட்-பிக்ஸிங்’ (Spot-Fixing) எனப்படும் குறிப்பிட்ட ஓவர்கள் அல்லது பந்துகளைச் சூதாட்டக்காரர்களுக்குச் சாதகமாக மாற்றுவதற்கு அண்டர்வேர்ல்ட் தரப்பிலிருந்து லலித் மோடிக்கு நூற்றுக்கணக்கான மில்லியன் டாலர்கள் லஞ்சமாக ஆஃபர் செய்யப்பட்டுள்ளது.
ஆனால், அதற்குத் தான் உடன்பட மறுத்ததோடு, சந்தேகத்திற்குரிய நபர்களை மைதானங்களுக்குள் வராதவாறு கடுமையான நடவடிக்கைகளை எடுத்ததால், மாஃபியா குழுக்களின் நேரடிப் பகைக்குத் தான் ஆளாக நேரிட்டதாக மோடி விவரித்துள்ளார்.
தன் மீது நடத்தப்பட்ட கொடூரமான தாக்குதல் திட்டங்கள் குறித்துப் பேசிய லலித் மோடி, தாவுத் இப்ராகிம் தன்னைத் தீர்த்துக்கட்ட மூன்று முறை வெவ்வேறு நாடுகளில் ஸ்கெட்ச் போட்டதாகக் கூறியுள்ளார். மும்பையில் உள்ள அவரது இல்லத்திற்கு வெளியே நடந்த துப்பாக்கிச் சூடு, 2009 ஆம் ஆண்டு தென்னாப்பிரிக்காவின் கேப் டவுன் நகரில் நடந்த போட்டி மற்றும் மாண்டினீக்ரோ நாட்டில் தீட்டப்பட்ட கொலைச் சதி என மூன்று முறையும் சர்வதேசப் பாதுகாப்பு முகமைகளின் துரித நடவடிக்கையால் தான் உயிர் பிழைத்ததாக அவர் நெகிழ்ச்சியுடன் தெரிவித்துள்ளார். இதன் காரணமாகவே மும்பை காவல்துறை தனக்கு ‘Z’ பிரிவு பாதுகாப்பை வழங்கியிருந்ததையும் அவர் நினைவு கூர்ந்தார்.
இந்த அச்சுறுத்தல்கள் அத்துடன் நின்றுவிடாமல், லண்டனின் பிரபலமான ஸ்லோன் ஸ்ட்ரீட்டில் வைத்துத் தனது மகனை அண்டர்வேர்ல்ட் ஆட்கள் கடத்தியதாகவும், இந்தத் தகவலை இதுவரை தான் யாரிடமும் பகிர்ந்துகொண்டதில்லை என்றும் லலித் மோடி முதன்முறையாக உடைத்துள்ளார்.
லண்டனில் ஒரு இடைத்தரகர் மூலம் நள்ளிரவு 3:30 மணிக்கு அழைக்கப்பட்ட அவசரக் கூட்டம் ஒன்றில், சாட்டிலைட் போன் வழியாகத் தாவுத் இப்ராகிம் நேரடியாகத் தன்னிடம் பேசியதாக லலித் மோடி குறிப்பிட்டுள்ளார். பழைய பகைகளை மறந்துவிட்டு, அண்டர்வேர்ல்ட் முதலீட்டாளர்களுக்கு ஐபிஎல் தொடரில் ஒரு புதிய பிரான்சைஸ் (IPL Franchise) அணியை ஒதுக்க வேண்டும் என தாவுத் தனக்குக் கட்டளையிட்டதாகக் கூறியுள்ளார்.
அதற்கும் தான் இணங்காத சூழலில், தனது குடும்பத்தினரின் பாதுகாப்பை உறுதி செய்ய வேண்டுமானால் கிரிக்கெட் நிர்வாகத்தை விட்டு முழுமையாக விலக வேண்டும் என்ற நிபந்தனையின் அடிப்படையிலேயே தான் ஒட்டுமொத்த கிரிக்கெட் உலகிலிருந்தும் நிரந்தரமாக விலகியதாக லலித் மோடி தற்பொழுது பகிரங்கமாக ஒப்புக்கொண்டுள்ளார்.
