சென்னையில் பெண்களுக்கான பிரத்யேக உடற்பயிற்சி கூடத் திறப்பு விழாவில் சென்னை மாநகராட்சி மேயர் பிரியா ஆர்.ராஜன் பங்கேற்காதது பெரும் விவாதப் பொருளாக மாறியுள்ள நிலையில், இதுகுறித்து எழுப்பப்பட்ட கேள்விக்கு உணவு மற்றும் நுகர்பொருள் வழங்கல் துறை அமைச்சர் பி. வெங்கடரமணன் தரப்பில் அதிரடி விளக்கம் அளிக்கப்பட்டுள்ளது. சென்னை மயிலாப்பூர் பகுதியில் உள்ள வார்டு ஒன்றில் பெண்களின் மன அழுத்தத்தைப் போக்கவும், போதை மற்றும் மொபைல் போன் அடிமைத்தனத்தில் இருந்து அவர்களை மீட்டெடுத்து நல்வழிப்படுத்தவும் மாநகராட்சி சார்பில் பிரத்யேக உடற்பயிற்சி கூடம் (Gym) ஒன்று திறக்கப்பட்டுள்ளது. இந்த விழாவின் அழைப்பிதழில் மேயர் பிரியாவின் பெயர் தலைமை தாங்குபவர் வரிசையில் அச்சிடப்பட்டிருந்தும், அவர் விழாவில் கலந்து கொள்ளவில்லை. இதனால் அவருக்கும், அமைச்சர் தரப்பிற்கும் இடையே இன்னும் மோதல் போக்கு நீடிக்கிறதா என்று செய்தியாளர்கள் கேள்வி எழுப்பினர்.
மோதல் போக்கு குறித்து அமைச்சர் பி. வெங்கடரமணன் விளக்கம் செய்தியாளர்களின் இந்தக் கேள்விக்குப் பதிலளித்த அமைச்சர் பி. வெங்கடரமணன், “எங்கள் முதலமைச்சர் தலைமையிலான அரசு மற்றும் நிர்வாகத்தில் எங்களுக்குள் எந்தவித பாராபட்சமும் கிடையாது. அனைத்து துறைகளிலும், அனைத்து இடங்களையும் நாங்க ஒருங்கிணைந்து கலந்து கொண்டு பணிகளைத் தொடர்ந்து ஃபாலோ பண்ணிக்கொண்டுதான் இருக்கிறோம். சில பேர் தங்களின் சில சொந்தக் காரணங்களுக்காக விழாக்களுக்கு வருவதைத் தவிர்த்தால் (Avoid பண்ணிப் போனாங்கன்னா) அதற்கு நாங்கள் பொறுப்பாக முடியாது” என்று நேரடியாகப் பதிலளித்தார். இதன் மூலம் தங்களுக்குள் எந்தவித மோதல் போக்கும் இல்லை என்பதை அவர் தெளிவுபடுத்தியுள்ளார். முன்னதாக விழா தாமதமாகத் தொடங்கியதற்குக் காரணம் கேட்டபோது, அருகில் உள்ள ரபேல் (Raphael) பெண்கள் பள்ளியின் பிரேயர் ஹாலில் நடைபெற்ற விழாவில் 12,000 பெண் குழந்தைகளுக்குப் பரிசு வழங்கும் நிகழ்ச்சியில் பங்கேற்று மாணவர்களுடன் உரையாடியதால் சற்று தாமதமானதாகக் குறிப்பிட்டார்.
வழக்கறிஞர்கள் நியமன லஞ்சப் புகார் ஒரு புனையப்பட்ட கதை தொடர்ந்து செய்தியாளர்கள், தற்போதைய அரசு வழக்கறிஞர்கள் நியமனத்தில் லஞ்சம் பெறப்பட்டதாக எழுந்துள்ள புகார்கள் குறித்துக் கேள்வி எழுப்பினர். அதற்குப் பதிலளித்த அமைச்சர் பி. வெங்கடரமணன், “இந்த புகார்களை எல்லாம் நாம் ஒரு கோர்வையாகப் பார்த்தால் உண்மை புரியும். மாண்புமிகு முதலமைச்சரின் மக்கள் நல செயல்பாடுகளை முடக்க வேண்டும் என்பதற்காகவும், மாநில நிர்வாகம் மற்றும் தமிழக அரசு கொண்டு வரும் நல் முன்னெடுப்புகளைப் பொறுத்துக் கொள்ள முடியாத சில பேர் திட்டமிட்டு இத்தகைய அவதூறுகளைப் பரப்பி வருகிறார்கள். சில நேரங்களில் வழக்கறிஞர்கள் அப்பாயின்மென்டில் காசு வாங்கிவிட்டார்கள் என்பார்கள், சில நேரங்களில் மணல் தட்டுப்பாடு என்பார்கள். இதையெல்லாம் அரசாங்கத்தின் மீது திட்டமிட்டு சுமத்தப்படும் புனையப்பட்ட ஒரு கதையாகத்தான் நாங்கள் பார்க்கிறோம்” என்று மறுத்தார். மக்கள் விரும்பித் தேர்ந்தெடுத்த இந்த ஆட்சி மக்களுக்காக மட்டுமே செயல்படும் என்றும், அவதூறுகளுக்கு மக்கள் தகுந்த பதில் அளிப்பார்கள் என்றும் அவர் கூறினார்.
