தமிழக அரசியல் களத்தில் தேர்தல் காய்ச்சல் மற்றும் கூட்டணி மறுசீரமைப்புகள் வேகம் எடுத்துள்ள நிலையில், முன்னாள் முதலமைச்சர் ஓ. பன்னீர்செல்வத்தின் மகனும் முன்னாள் எம்பியுமான பி. ரவீந்திரநாத் எடுத்துள்ள புதிய அரசியல் முடிவு மாபெரும் அதிர்வலைகளை ஏற்படுத்தியுள்ளது.
திமுக கூட்டணியில் அங்கம் வகித்தும், தங்களுக்கு எதிர்பார்க்கப்பட்ட முக்கியப் பதவிகளோ அல்லது போதிய அரசியல் அங்கீகாரமோ வழங்கப்படவில்லை என்ற கடும் அதிருப்தியில் ரவீந்திரநாத் இருந்து வந்ததாகக் கூறப்படுகிறது. இதன் காரணமாக, திமுக தலைமையின் மீதுள்ள அதிருப்தியால் அவர் தமிழக வெற்றி கழகத்தில் (தவெக) இணைய முடிவு செய்துள்ளதாகத் தகவல்கள் கசிந்துள்ளன.
தமிழகத்தில் உருவாகியுள்ள புதிய அரசியல் சூழலில், இளைஞர்களைக் கவர்ந்து வரும் தவெகவே தங்களின் எதிர்கால அரசியலுக்குச் சரியான தளமாக இருக்கும் எனக் கருதும் ரவீந்திரநாத், தனது தந்தை ஓ. பன்னீர்செல்வத்தையும் தவெக பக்கம் நகருமாறு தீவிரமாக வலியுறுத்தியதாகத் தெரிகிறது. “திமுகவில் நமக்கான எதிர்காலம் கேள்விக்குறியாகவே உள்ளது; எனவே தவெகவில் இணைவதே சரியான அரசியல் நகர்வாக இருக்கும்” எனத் தந்தையிடம் அவர் கூறியதாகப் பேச்சுக்கள் உலா வருகின்றன.
இருப்பினும், அவசரப்பட்டு எந்த முடிவும் எடுக்க வேண்டாம் என்றும், தற்போதைய சூழலில் அரசியல் நகர்வுகளை உன்னிப்பாகக் கவனித்துச் சிறிது காலம் பொறுத்திருக்குமாறும் ரவீந்திரநாத்தை ஓபிஎஸ் சமாதானப்படுத்தியதாகக் கூறப்படுகிறது. தவெகவின் அசுர வளர்ச்சியை நோக்கி அடுத்தடுத்த முக்கியப் புள்ளிகள் படையெடுக்கத் தொடங்கியுள்ள வேளையில், ஓபிஎஸ் குடும்பத்திலிருந்தே வெளிப்பட்டுள்ள இந்த அரசியல் அதிருப்தி திமுக கூட்டணிக் கட்சிகள் மத்தியிலும், தேனி மாவட்ட அரசியல் வட்டாரத்திலும் பெரும் ரணகளத்தை உருவாக்கியுள்ளது.
