இந்தியாவில் வசித்து வரும் மேசி கோன்சால்வ்ஸ் (Macy Gonsalvez) என்ற அமெரிக்கப் பெண், இங்குத் தான் வாழத் தொடங்கிய பிறகு சந்தித்த 5 மிக முக்கிய சுவாரஸ்யமான மற்றும் ஆச்சரியமான விஷயங்கள் குறித்துத் தனது இன்ஸ்டாகிராம் பக்கத்தில் வெளியிட்ட வீடியோ இணையவாசிகளின் கவனத்தை ஈர்த்து தீயாய் பரவி வருகிறது.
மேசி கோன்சால்வ்ஸ் தனது வீடியோவில் குறிப்பிட்ட முதல் விஷயம், இந்தியாவில் கர்ப்ப காலத்தில் குழந்தையின் பாலினத்தைக் கண்டறிய விதிக்கப்பட்டிருக்கும் சட்டப்பூர்வத் தடையாகும். அமெரிக்கா போன்ற மேற்கத்திய நாடுகளில் பிறப்பதற்கு முன்பே குழந்தையின் பாலினத்தை அறிந்துகொள்வது மிகவும் சாதாரண ஒரு விஷயம் என்றபோதிலும், இந்தியாவில் பெண் சிசுக்கொலையைத் தடுப்பதற்காகக் கொண்டுவரப்பட்ட இந்தச் சட்டம் தனக்குப் பெரும் ஆச்சரியத்தைக் கொடுத்ததாக அவர் தெரிவித்துள்ளார்.
அடுத்ததாக, இந்தியர்களின் நள்ளிரவு சமூக வாழ்க்கைப் பழக்கம் குறித்து அவர் சுட்டிக்காட்டியுள்ளார். நண்பர்களுடனோ அல்லது உறவினர்களுடனோ வெளியே செல்ல திட்டமிட்டால், அது இரவு 8:30 அல்லது 9 மணிக்கு மேல்தான் தொடங்குகிறது என்றும், வழக்கமாக இரவு 9:30 மணிக்கெல்லாம் தூங்கச் செல்லும் பழக்கம் கொண்ட தனக்கு இந்த இரவு நேரக் கலாச்சாரம் தொடக்கத்தில் மிகப்பெரிய சவாலாக இருந்ததாகவும் கூறியுள்ளார்.
மூன்றாவதாக, இந்திய வீடுகளில் பயன்படுத்தப்படும் வாட்டர் ஹீட்டர் அமைப்பைப் பற்றிப் பேசியுள்ளார். குளிப்பதற்கு 10 முதல் 15 நிமிடங்களுக்கு முன்பே சுவிட்சைப் போட்டு நீரைக் காயவைக்க வேண்டிய சூழல் தனக்குப் புதிதாக இருந்தது என்று விளக்கியுள்ளார்.
நான்காவதாக, இந்தியாவில் அசுர வேகத்தில் இயங்கி வரும் பிளிங்கிட், செப்டோ போன்ற இன்ஸ்டன்ட் டெலிவரி செயலிகளை அவர் வெகுவாகப் பாராட்டியுள்ளார். மளிகைப் பொருட்கள் முதல் உணவக உணவுகள் வரை எதுவாக இருந்தாலும் ஆர்டர் செய்த 10 முதல் 15 நிமிடங்களுக்குள் வீட்டு வாசலுக்கே வந்து சேர்வது உலகிலேயே இங்கு மட்டும்தான் சாத்தியம் என்று வியந்து கூறியுள்ளார்.
ஐந்தாவதாக, அமெரிக்காவில் கனவிலும் நினைக்க முடியாத மலிவான கட்டணத்தில் இந்தியாவில் சமையல் கலைஞர்கள், தூய்மைப் பணியாளர்கள் மற்றும் குழந்தைகளைப் பராமரிப்பாளர்கள் தினமும் வீட்டிற்கே வந்து வேலை செய்வது தமக்குக் கிடைத்த மிகப்பெரிய வரப்பிரசாதம் என்று மகிழ்ச்சியுடன் பகிர்ந்துள்ளார்.
இந்த வீடியோ வைரலானதைத் தொடர்ந்து, பல வெளிநாடுவாழ் இந்தியர்கள் இந்த வசதிகளைத் தாங்கள் மிகவும் மிஸ் செய்வதாகக் கருத்து தெரிவித்து வருகின்றனர். அதேநேரத்தில், இந்தியாவில் கிடைக்கும் மிகவும் மலிவான மற்றும் தரமான மருத்துவ வசதிகளையும் (Affordable Healthcare) மேசி தனது பட்டியலில் சேர்த்திருக்க வேண்டும் என்று பல பயனீட்டாளர்கள் சுட்டிக்காட்டி விவாதித்து வருகின்றனர்.
