மத்திய இடைநிலைக் கல்வி வாரியம் (CBSE) 10-ஆம் வகுப்பு தேர்வு எழுதிய மாணவர்களுக்கான விடைத்தாள் மறுமதிப்பீடு (Re-evaluation) மற்றும் மதிப்பெண் சரிபார்ப்புக்கான (Verification of Marks) அதிகாரப்பூர்வ ஆன்லைன் இணைப்பைச் செயல்பாட்டிற்குக் கொண்டுவந்துள்ளது. தங்களின் மதிப்பெண்களில் திருப்தி இல்லாத மாணவர்கள் அல்லது விடைத்தாள்களை மீண்டும் ஆய்வு செய்ய விரும்பும் மாணவர்கள், சிபிஎஸ்இ வாரியத்தின் அதிகாரப்பூர்வ இணையதளமான cbse.gov.in மூலமாக ஆன்லைனில் விண்ணப்பிக்கலாம்.
மறுமதிப்பீட்டுச் செயல்முறை மூன்று முக்கியக் கட்டங்களாக நடைபெறுகிறது:
- மதிப்பெண் சரிபார்ப்பு (Verification of Marks): விடைத்தாளில் வழங்கப்பட்ட மதிப்பெண்கள் சரியாகக் கூட்டப்பட்டுள்ளதா, அனைத்து வினாக்களுக்கும் மதிப்பெண் வழங்கப்பட்டுள்ளதா என்பதைப் பரிசோதிக்க பாடத்திற்கு ரூ.300 கட்டணமாக நிர்ணயிக்கப்பட்டுள்ளது.
- விடைத்தாள் நகல் பெறுதல் (Scanned Copy of Answer Book): மதிப்பெண் சரிபார்ப்பிற்கு விண்ணப்பித்த மாணவர்கள் மட்டுமே, தங்கள் விடைத்தாளின் நகலைப் பெறத் தகுதியானவர்கள்.
- வினா வாரியாக மறுமதிப்பீடு (Re-evaluation of Specific Questions): பெறப்பட்ட விடைத்தாள் நகலை ஆய்வு செய்த பிறகு, குறிப்பிட்ட வினாவிற்கு வழங்கப்பட்ட மதிப்பெண்ணில் சந்தேகம் இருந்தால், ஒரு வினாவிற்கு ரூ.100 செலுத்தி மறுமதிப்பீடு செய்ய விண்ணப்பிக்கலாம்.
விண்ணப்பிக்கும் மாணவர்கள் சிபிஎஸ்இ இணையதளத்தில் ‘Verification/Re-evaluation Portal’ என்ற லிங்கை கிளிக் செய்து, தங்களது தேர்வு ரோல் எண் (Roll Number), பள்ளி எண் (School Number) மற்றும் மைய எண் (Centre Number) ஆகிய விபரங்களை உள்ளீடு செய்து விண்ணப்பிக்க வேண்டும். ஆன்லைன் மூலம் மட்டுமே கட்டணம் செலுத்த முடியும் என்பதால், விண்ணப்பித்த பின் கட்டண ரசீதை பதிவிறக்கம் செய்து வைத்துக்கொள்வது அவசியமாகும். குறிப்பிட்ட காலக்கெடுவுக்குள் மட்டுமே இந்த வசதி செயல்படும் என்பதால் மாணவர்கள் விரைந்து விண்ணப்பிக்குமாறு அறிவுறுத்தப்படுகிறார்கள்.
