சென்னை மாநகராட்சியின் மேயரான ஆர். பிரியா, சமூக வலைதளங்களில் தனது உடலமைப்பு, உடை மற்றும் தனிப்பட்ட தேவைகள் குறித்துத் தொடர்ச்சியாக மேற்கொள்ளப்பட்டு வரும் விமர்சனங்கள் மற்றும் கேலிகளுக்குப் பதிலடி கொடுக்கும் வகையில் தனது அதிகாரப்பூர்வ ‘எக்ஸ்’ (ட்விட்டர்) பக்கத்தில் உருக்கமான பதிவு ஒன்றை வெளியிட்டுள்ளார்.
அவர் தனது பதிவில், “ஏன் எப்போதும் நான் மட்டுமே இலக்கையாக்கப்படுகிறேன்? நான் செய்யும் ஒவ்வொரு சிறிய விஷயமும் சர்ச்சையாக்கப்பட்டு வருகிறது. நான் பர்கர் சாப்பிட்டாலும் அது ஒரு பிரச்சனை; நான் எனது தலைமுடியை வெட்டிக்கொண்டாலும் அது ஒரு பிரச்சனை. எனது ஒவ்வொரு தனிப்பட்ட தேர்வும் கேள்விக்குள்ளாக்கப்பட்டு மதிப்பிடப்படுகிறது. நான் ஒரு பெண் என்பதற்காகவா அல்லது ஒரு குறிப்பிட்ட சமூகத்தைச் சேர்ந்தவள் என்பதற்காகவா இப்படிச் செய்யப்படுகிறது எனச் சில நேரங்களில் எனக்குத் தோன்றுகிறது” எனக் குறிப்பிட்டுள்ளார்.
Why is it always me?
Whatever I do seems to become a controversy. From day one until today, even the simplest things become an issue. If I eat a burger, it’s an issue. If I cut my hair, it’s an issue. Every personal choice I make seems to be questioned and judged.
Sometimes I…— Priya (@PriyarajanDMK) September 26, 2026
மேலும், “பெண்களுக்கு ஆதரவாகப் பேசும் பெண்ணியவாதிகளும், அமைப்புகளும் எனக்கு ஒரு பிரச்சனை வரும்போது எங்கே செல்கிறார்கள் என்று தெரியவில்லை. பொதுவாழ்வில் இருக்கும் பெண்கள் கண்ணியமற்றவர்கள் அல்ல; அவர்கள் மரியாதைக்குக் குறைவானவர்களும் அல்ல. ஒரு பெண் பொதுவாழ்வில் இருக்கிறார் என்பதற்காக அவரது தோற்றம், வாழ்க்கை முறை அல்லது தனிப்பட்ட தேர்வுகளை வைத்து அவரை விமர்சிக்க யாருக்கும் உரிமை இல்லை. ஒவ்வொரு பெண்ணுக்கும் சுயமரியாதையும் தன் விருப்பப்படி வாழும் உரிமையும் உள்ளது. மேயர் என்ற பதவிக்கு அப்பாற்பட்டு ஒரு பெண்ணாக எனக்குரிய மரியாதையை அளிக்குமாறு கேட்டுக் கொள்கிறேன்” என்று அவர் தெரிவித்துள்ளார்.
அண்மைக் காலமாகவே மேயர் பிரியாவின் புகைப்படங்கள் மற்றும் வீடியோக்கள் சமூக வலைதளங்களில் சில கணக்குகளால் கிண்டல் செய்யப்பட்டு ட்ரோல் செய்யப்பட்டு வந்த நிலையில், அவர் வெளியிட்டுள்ள இந்த அறிக்கை சமூக வலைதளங்களில் பெரும் விவாதத்தை ஏற்படுத்தியதோடு, பல தரப்பினரையும் அவரை ஆதரித்துப் பேச வைத்துள்ளது.