தமிழ்நாட்டில் சட்டம்-ஒழுங்கும், சமூக நீதியும் சந்தி சிரிக்கின்றன என்று குற்றம்சாட்டியுள்ள அதிமுக பொதுச்செயலாளர் எடப்பாடி பழனிசாமி, முதல்வர் விஜய்யின் நிர்வாகத் திறமையைக் கேள்விக்குள்ளாக்கியுள்ளார். சாத்தான்குளம் பெண் கொலைச் சம்பவம் மற்றும் கோவையில் சாதியப் பாகுபாட்டால் மாணவன் உயிரிழந்தது போன்ற கோரச் சம்பவங்களைச் சுட்டிக்காட்டி அவர் வெளியிட்டுள்ள கடும் கண்டன அறிக்கை, தமிழக அரசியல் களத்தில் பெரும் தீப்பற்ற வைத்துள்ளது.
சமூக வலைதளங்களில் வெளியிட்ட பதிவில், “விஜய் ஆட்சிக்கு வந்ததும் குற்றவாளிகள் தங்களை ‘லியோ தாஸ்’ என நினைத்து வலம் வருகிறார்கள் போல…” என்று கடுமையாகச் சாடியுள்ள எடப்பாடி பழனிசாமி, எல்லாவற்றிலும் சமூகநீதி என்று விளம்பரம் தேடும் ‘ரீல்ஸ் முதல்வர்’ ஆட்சியில் சாதியப் பாகுபாட்டால் அப்பாவி மாணவன் உயிரிழந்துவிட்டதாகக் கொந்தளித்துள்ளார். மேலும், “சாதியப் பாகுபாட்டால் மாணவன் உயிரிழந்திருப்பதற்கு என்ன நடவடிக்கை எடுக்கப்பட்டது? முதல்வர் விஜய் மேடைகளில் பேசும் டயலாக் இப்போது எங்கே போனது?” என்று அடுக்கடுக்கான கேள்விகளை எழுப்பியுள்ளார்.
திரைப்படங்களில் வசனம் பேசுவதற்கும், நிஜ நிர்வாகத்தை வெற்றிகரமாக நடத்துவதற்கும் உள்ள வித்தியாசத்தை ஆளுங்கெல்லி இப்போது உணர்ந்து வருவதாகக் குறிப்பிட்டுள்ள எதிர்க்கட்சிகள், மாநிலத்தில் நாளுக்கு நாள் அதிகரித்து வரும் குற்றச் சம்பவங்களைக் கட்டுப்படுத்தத் தவறிய அரசுக்குக் கண்டனம் தெரிவித்துள்ளன. தவெக அரசு பொறுப்பேற்றது முதல் பொதுமக்களும் எதிர்க்கட்சிகளும் தொடர்ந்து எழுப்பி வரும் பாதுகாப்பு அச்சங்களுக்கு மத்தியில், எடப்பாடி பழனிசாமியின் இந்த நேரடித் தாக்குதல் அரசைக் கடும் நெருக்கடியில் தள்ளியுள்ளது.
வெள்ளித்திரை கைதட்டல்களையும் மேடைப் பேச்சுக்களையும் தாண்டி, சட்டம்-ஒழுங்கைப் பேணிக்காப்பதிலும் மக்களின் உயிரைப் பாதுகாப்பதில்தான் ஒரு அரசின் உண்மையான வெற்றி அடங்கியுள்ளது என்பதைச் சுட்டிக்காட்டும் இந்த விவகாரம், வரவிருக்கும் அரசியல் களத்தில் கடுமையான அனலைக் கிளப்பும் என்பதில் ஐயமில்லை!