தேசிய தேர்வு முகமை (NTA) மருத்துவப் படிப்புகளுக்கான நீட் (NEET UG – 2026) தேர்வு குறித்த மிக முக்கியமான அறிவிப்பை வெளியிட்டுள்ளது. இதன்படி, நாடு முழுவதும் உள்ள மருத்துவக் கல்லூரிகளில் சேருவதற்கான இந்த நுழைவுத் தேர்வு வரும் மே மாதம் 3-ம் தேதி நடைபெற உள்ளது. இதற்கான ஹால் டிக்கெட்கள் (Admit Cards) வரும் ஏப்ரல் 26-ம் தேதி அதிகாரப்பூர்வமாக இணையதளத்தில் வெளியாகும் என அறிவிக்கப்பட்டுள்ளது.
மாணவர்களின் நலனைக் கருத்தில் கொண்டு, இந்த ஆண்டு தேர்வு மையங்களை ஒதுக்குவதில் NTA அதிரடி மாற்றங்களைச் செய்துள்ளது. 99.2 சதவீத மாணவர்களுக்கு அவர்கள் விண்ணப்பத்தில் குறிப்பிட்டிருந்த முதல் விருப்பத்தின் அடிப்படையிலேயே தேர்வு மையங்கள் அமைந்துள்ள நகரங்கள் ஒதுக்கப்பட்டுள்ளன. இதன் மூலம் மாணவர்கள் நீண்ட தூரம் பயணம் செய்வதைத் தவிர்க்க முடியும் எனத் தேசிய தேர்வு முகமை தெரிவித்துள்ளது.
தேர்வு மைய நகரங்கள் குறித்த தகவல்கள் ஏற்கனவே மாணவர்களுக்குத் தெரிவிக்கப்பட்டுள்ள நிலையில், முறையான ஹால் டிக்கெட் வரும் 26-ம் தேதி முதல் பதிவிறக்கம் செய்யக் கிடைக்கும். மாணவர்கள் தங்களது பதிவு எண் மற்றும் பிறந்த தேதியைப் பயன்படுத்தி NTA-வின் அதிகாரப்பூர்வ இணையதளத்தில் இதனைப் பெற்றுக்கொள்ளலாம்.
கடைசி நேரப் பதற்றத்தைத் தவிர்க்க, ஹால் டிக்கெட் வெளியான உடனேயே அதனைப் பதிவிறக்கம் செய்து, அதில் குறிப்பிட்டுள்ள தேர்வு மைய முகவரி மற்றும் வழிகாட்டுதல்களைச் சரிபார்த்துக் கொள்ளுமாறு அறிவுறுத்தப்பட்டுள்ளது. இந்த ஆண்டு சுமார் 20 லட்சத்திற்கும் அதிகமான மாணவர்கள் இந்தத் தேர்வை எழுத உள்ளதால், தேர்வு மையங்களில் பலத்த பாதுகாப்பு மற்றும் கண்காணிப்பு ஏற்பாடுகள் செய்யப்பட்டுள்ளன.
