அலுவலகச் சூழலில் நாம் சக ஊழியர்களுடன் எவ்வளவுதான் நட்பாகப் பழகினாலும், சில தனிப்பட்ட விஷயங்களைப் பகிராமல் இருப்பதே புத்திசாலித்தனம் என்று நிபுணர்கள் எச்சரிக்கின்றனர். கல்லூரிக் காலத்தைப் போல எல்லாவற்றையும் வெளிப்படையாகப் பேசுவது உங்கள் தொழில்முறை வளர்ச்சிக்கும், வேலைக்கும் தேவையற்ற சிக்கல்களை ஏற்படுத்தக்கூடும்.
குறிப்பாக, உங்கள் ஊதியம் மற்றும் படிகள் (Salary) குறித்து சக ஊழியர்களுடன் விவாதிப்பதைத் தவிர்க்க வேண்டும். இது ஊழியர்களிடையே தேவையற்ற ஒப்பீடுகளை உருவாக்கி, நிர்வாகம் அல்லது மனித வளத் துறையுடன் (HR) மோதல் ஏற்பட வழிவகுக்கும். எவ்வளவு நெருங்கிய நண்பராக இருந்தாலும் உங்கள் சம்பள விவரங்களை ரகசியமாக வைப்பதே உங்கள் பணிப்பாதுகாப்பிற்கு நல்லது.
உங்கள் காதல் அல்லது திருமண வாழ்க்கை குறித்த ரகசியத் தகவல்களை அலுவலகத்தில் பகிராமல் இருப்பது மிகவும் அவசியம். அதேபோல, வீட்டில் நிலவும் பிரச்சனைகள் அல்லது உங்கள் தனிப்பட்ட நிதி நெருக்கடிகள் குறித்து மற்றவர்களிடம் புலம்புவது உங்கள் மீதான தொழில்முறை மரியாதையைக் குறைக்கக்கூடும். தேவையற்ற வதந்திகளுக்கு இடம் கொடுக்காமல் இருப்பது உங்கள் நிம்மதியான பணிச்சூழலை உறுதி செய்யும்.
உங்கள் ஓய்வு நேர விருப்பங்களான கேமிங், பார்ட்டி அல்லது நீங்கள் செய்து வரும் பிற இதரத் திட்டங்கள் (Projects) பற்றியும் யாரிடமும் சொல்லத் தேவையில்லை. இத்தகைய தகவல்கள் மற்றவர்களுக்குத் தெரிந்தால், நீங்கள் அலுவலகப் பணிகளில் சரியாகக் கவனம் செலுத்தவில்லை என்ற எண்ணத்தை மேலதிகாரிகளுக்கு உருவாக்கக்கூடும். உங்களின் அனைத்துத் திறமைகளையும் மற்றவர்கள் அறிய வேண்டிய கட்டாயம் இல்லை.
நீங்கள் ஒருவேளை அலுவலகப் பணிக்கு வெளியே பகுதி நேர வேலை (Part-time Work) ஏதேனும் செய்து வந்தால், அதை மற்றவர்களுக்குத் தெரியாமல் ரகசியமாக வைப்பதே நல்லது என்று நிபுணர்கள் கூறுகின்றனர். நீங்கள் வேறொரு வேலையில் ஈடுபடுவது நிறுவனத்திற்குத் தெரிந்தால், அது உங்கள் தற்போதைய வேலைக்கே ஆபத்தாக முடிந்துவிட வாய்ப்புள்ளது.
அலுவலகத்தில் உங்களின் அனைத்துப் பக்கங்களையும் காட்ட வேண்டிய அவசியமில்லை. தொழில்முறை ரீதியாக உங்களை மெருகேற்றிக் கொள்வதோடு, தனிப்பட்ட ரகசியங்களைக் காப்பதன் மூலம் தேவையற்ற அரசியல் மற்றும் சிக்கல்களில் இருந்து தற்காத்துக் கொள்ளலாம். இவை சிறிய விஷயங்களாகத் தெரிந்தாலும், உங்கள் நீண்ட காலப் பணி உயர்வுக்கு மிகவும் அவசியமானவை.
