தமிழக அரசியல் களத்தில் தலைவர்கள் பேசும் கருத்துக்கள் சமூக வலைத்தளங்களில் வைரலாவதும், அதற்கு எதிர்ப்புகளும் விமர்சனங்களும் எழுவதும் வழக்கம். ஆனால், வரலாற்றிலேயே முதன்முறையாக செயற்கை நுண்ணறிவுத் தொழில்நுட்பமான ‘ChatGPT’ மென்பொருளைத் தங்கள் அரசியல் செயல்திறனுக்குச் சான்றிதழாகக் காட்டி தேமுதிக பொதுச்செயலாளர் பிரேமலதா விஜயகாந்தும், கட்சியின் பொருளாளர் எல்.கே. சுதீஷும் பேசியுள்ளது தமிழக அரசியல் வட்டாரத்தில் பெரும் சர்ச்சையையும், கிண்டல்களையும் கிளப்பியுள்ளது.
சமீபத்தில் நடைபெற்ற செய்தியாளர்கள் சந்திப்பின் போது பேசிய எல்.கே. சுதீஷ், “இன்றைய நவீன தொழில்நுட்பமான ChatGPT-யில் சென்று தேடிப் பார்த்தால், முதல்முறை சட்டமன்ற உறுப்பினராகப் பொறுப்பேற்றவர்களிலேயே மிகச் சிறந்த முறையில் செயல்பட்டவர் பிரேமலதா விஜயகாந்த் தான் என்று அதுவே பட்டியலிடுகிறது” எனப் பெருமையுடன் குறிப்பிட்டிருந்தார். உடனே அவருக்குப் பதிலளிக்கும் வகையில் பேசிய பிரேமலதா, “டெல்லியில் எத்தனையோ மூத்த நாடாளுமன்ற உறுப்பினர்கள் இருந்தாலும், ChatGPT-யில் தேடிப் பார்த்தால், டெல்லியிலேயே மிகச் சிறந்த முறையில் செயல்பட்ட முதல்முறை எம்.பி எல்.கே. சுதீஷ் தான் என முதலிடம் காட்டுகிறது” என்று பரஸ்பரம் புகழ்ந்து பேசினார்.
செயற்கை நுண்ணறிவுத் தொழில்நுட்பத்தைப் பயன்படுத்தி இருவரும் மாறி மாறி தங்களைப் புகழ்ந்து கொண்ட இந்த வீடியோ காட்சிகள் சமூக வலைத்தளங்களில் வைரலானதைத் தொடர்ந்து, நெட்டிசன்கள் இணையத்தில் இறங்கி சோதனை செய்யத் தொடங்கினர். எம்பி, எம்எல்ஏ-க்களின் செயல்பாடுகளை எந்தவொரு செயற்கை நுண்ணறிவு மென்பொருளும் தரவரிசைப் படுத்த முடியாது என்பதும், ChatGPT என்பது இணையத்தில் உள்ள பொதுத் தகவல்களைத் தொகுத்துத் தரும் ஒரு கருவி மட்டுமே என்பதும் தெரிந்தும், அரசியல் தலைவர்கள் அதனைத் தங்கள் தகுதிக்கான சான்றாகக் காட்டியது பெரும் விமர்சனத்திற்கு உள்ளாகியுள்ளது.
அரசியல் களத்தில் மக்கள் மத்தியில் பெற்ற நற்பெயரைக் கொண்டு அறிக்கை வெளியிடுவதற்குப் பதிலாக, ChatGPT போன்ற ஏஐ செயலிகளைச் சுட்டிக்காட்டி தங்களைத் தாங்களே முதலிடம் என உயர்த்திக் கூறுவது நகைச்சுவையின் உச்சம் என எதிர்க்கட்சியினரும் நெட்டிசன்களும் காரசாரமாக விமர்சித்து வருகின்றனர். நவீன தொழில்நுட்பமான, AI செயலிகள் தரும் பதில்களை உண்மை என நம்பி செய்தியாளர்கள் சந்திப்பிலேயே தேமுதிக தலைவர்கள் பேசியது, அக்கட்சியின் அரசியல் நம்பகத்தன்மையைக் கேள்விக் குறியாக்கியுள்ளதாக விமர்சகர்கள் கருத்து தெரிவித்து வருகின்றனர்.
