அமெரிக்க அதிபர் டொனால்ட் டிரம்பின் அதிகாரப்பூர்வச் சமூக வலைதளப் பதிவுகளை, பணத்திற்காக வால் ஸ்ட்ரீட் வர்த்தக நிறுவனங்களுக்குச் சில மில்லி விநாடிகளுக்கு முன்பாகவே விற்பனை செய்யும் டிரம்ப் மீடியா நிறுவனத்தின் ‘ட்ரூத் ஏபிஐ’ (Truth API) நடவடிக்கை, சர்வதேச நிதிச் சந்தையிலும் அரசியல் வட்டாரத்திலும் கடுமையான அறநெறி மற்றும் சட்ட ரீதியான கொந்தளிப்பை ஏற்படுத்தியுள்ளது. ஒரு நாட்டின் அதிபர் வெளியிடும் வரிகள், சுங்கக் கட்டணங்கள் மற்றும் பொருளாதாரக் கொள்கைகள் சார்ந்த அறிவிப்புகளை வைத்து ஒரு தனிப்பட்ட நிறுவனம் மாதம் 1,00,000 டாலர் (சுமார் 83 லட்சம் ரூபாய்) கட்டணம் வசூலிப்பது ஜனநாயகத்தின் அடிப்படை வணிக நீதிக்கு முற்றிலும் எதிரானது என்ற காட்டமான விமர்சனங்கள் எழுந்துள்ளன.
இந்த விவகாரத்தில் முதன்மைச் சர்ச்சையாக உருவெடுத்துள்ளது சந்தை சமநிலையின்மைதான். சாதாரணச் சிறு முதலீட்டாளர்களும் சாமானிய பொதுமக்களும் ஒரு அதிபரின் அறிவிப்பை வழக்கமான ஊடகங்கள் வாயிலாகப் படித்துத் தெரிந்துகொள்வதற்குள், பெரும் பணத்தைக் கொடுத்து ‘ட்ரூத் ஏபிஐ’ சந்தா பெற்றுள்ள சர்வதேச உயர் அதிர்வெண் வர்த்தக நிறுவனங்கள் (HFT) அந்த அறிவிப்பின் மூலம் கோடிக்கணக்கில் லாபம் ஈட்டிவிட முடியும். அரசின் முக்கிய முடிவுகள் அனைவருக்கும் ஒரே நேரத்தில் சமமாகச் சென்றடைய வேண்டும் என்ற பங்குச் சந்தை கட்டுப்பாட்டு அமைப்புகளின் (SEC) அடிப்படை விதியை மீறி, பண பலம் படைத்த பெரும் நிறுவனங்களுக்கு மட்டும் அரசாங்கத் தகவல்களை முன்கூட்டியே “விற்பனை” செய்வது அப்பட்டமான சந்தை கையாளுதல் (Market Manipulation) அல்லவா என்ற கேள்வியை நிதிச் சந்தை நிபுணர்கள் எழுப்புகின்றனர்.
மற்றொரு புறம், இதில் வெளிப்படையாகத் தெரியும் கடுமையான ‘நலன்களின் முரண்பாடு’ (Conflict of Interest) பெரும் கவலையை அளிக்கிறது. அமெரிக்க அதிபராக இருக்கும் டிரம்பின் குடும்பமே டிரம்ப் மீடியா நிறுவனத்தின் பெரும்பான்மைப் பங்குகளை வைத்திருக்கிறது. அப்படியிருக்கையில், அதிபர் தனது அதிகாரப்பூர்வக் கணக்கில் போடும் ஒரு பதிவின் மூலம் அவரது சொந்தக் குடும்ப நிறுவனம் கோடிக்கணக்கில் பணம் சம்பாதிப்பது எந்த வகையில் நியாயம்? அதிபர் தனது ஒரு பதிவின் மூலம் குறிப்பிட்ட நிறுவனங்களின் பங்கு மதிப்பை ஏற்றி அல்லது இறக்கி, அதன் மூலம் அவரது நிறுவனத்தின் வாடிக்கையாளர்கள் பலன்டைய வழிவகுத்தால், அது அரசு பதவியைத் தனிப்பட்ட லாபத்திற்காகப் தவறாகப் பயன்படுத்துவதற்குச் சமம் என அமெரிக்க சட்ட வல்லுநர்கள் எச்சரிக்கின்றனர்.
ஒரு நாட்டின் அதிபர் பேசும் ஒவ்வொரு வார்த்தையும் நாட்டின் சொத்து. அதை ஒரு தனியார் ஊடகத் தளம் தனது வர்த்தகக் கணக்கிற்குப் பயன்படுத்தி, ‘தகவல் அறியும் உரிமையை’ பணக்காரர்களுக்கு மட்டும் முன்னுரிமையாக மாற்றுவது ஆபத்தான முன்னுதாரணமாகிவிடும். இந்த நடவடிக்கை நிதிச் சந்தையின் நம்பிக்கையையே சீர்குலைக்கும் எனக் கடுமையான எதிர்ப்புகள் வலுத்து வரும் நிலையில், இது சட்டப்பூர்வமான தரவு விற்பனைதானா அல்லது அரசு அதிகாரத்தைப் பயன்படுத்திச் செய்யப்படும் அதிநவீனச் சுரண்டலா என்ற காரசாரமான விவாதம் உலகளவில் உச்சமடைந்துள்ளது.