தமிழக அரசியல் களத்தில் பெரும் பரபரப்பை ஏற்படுத்தும் வகையில், மதிமுக பொதுச்செயலாளர் வைகோ தனது கட்சியினருக்கு மிக முக்கியமான அறிக்கை ஒன்றை வெளியிட்டுள்ளார்.
அந்த அறிக்கையில், நடந்து முடிந்த 2026 சட்டமன்ற தேர்தலின் போது திமுக தங்களை நடத்திய விதம் மற்றும் தற்போதைய அரசியல் நிலைப்பாடு குறித்து வைகோ பல்வேறு அதிரடி குற்றச்சாட்டுகளையும், உண்மைகளையும் உடைத்துப் பேசியுள்ளார். குறிப்பாக, கடந்த தேர்தலில் மதிமுகவிற்கு வெறும் நான்கு இடங்களை மட்டுமே ஒதுக்கி, அந்த தொகுதிகளிலும் உதயசூரியன் சின்னத்தில் தான் போட்டியிட வேண்டும் என திமுக தங்களை மிகக் கடுமையாக நிர்பந்தித்ததாகவும், இந்த முடிவை தங்கள் மீது திணித்ததாகவும் வைகோ அந்த அறிக்கையில் பகிரங்கமாகக் குறிப்பிட்டுள்ளார்.
மேலும், தாங்கள் முந்தைய கூட்டணியில் இருந்தபோது ஒருவேளை திமுகவையோ அல்லது அரசையோ விமர்சனம் செய்திருந்தால், தங்களை உடனடியாக அந்த கூட்டணியில் இருந்து விலக்கி இருப்பார்கள் என்றும் அவர் சுட்டிக்காட்டியுள்ளார். தனது நீண்ட அரசியல் வாழ்க்கையில் தான் செய்த இரண்டு பெரும் தவறுகள் குறித்தும் இந்த அறிக்கையில் வைகோ மனம் திறந்துள்ளார்.
அதன்படி, கடந்த 2006-ஆம் ஆண்டு கட்சி நிர்வாகிகளின் கடுமையான நிர்பந்தத்திற்கு உடன்பட்டு, அப்போதைய அதிமுக பொதுச்செயலாளரைச் சந்தித்து அந்த கட்சியுடன் கூட்டணி வைத்தது தனது முதல் பெரும் தவறு என்று கூறியுள்ளார். அந்த நிர்பந்தத்திற்கு அடிபணியாமல் தனித்து நின்றிருந்தால் மதிமுக தற்பொழுது பெரும் பொலிவும், வலிவும் பெற்றிருக்கும் என்றும் அவர் வருத்தத்துடன் தெரிவித்துள்ளார்.
இதனைத் தொடர்ந்து, கடந்த 2017-ஆம் ஆண்டில் மத்தியில் இருந்த பாஜகவை எதிர்க்க வேண்டும் என்ற ஒரே நோக்கத்திற்காக திமுகவுடன் உடன்பாடு வைத்துக் கொண்டது தனது அரசியல் வாழ்க்கையின் இரண்டாவது பெரும் தவறு என்றும் வைகோ தனது அறிக்கையில் சுட்டிக்காட்டியுள்ளார்.
தற்போதைய அரசியல் சூழலில் பொதிகை மலையை போல மதிமுக உறுதியாக உள்ளதாகக் குறிப்பிட்டுள்ள அவர், திமுக கூட்டணியில் இருந்து முழுமையாக விலகி, தற்பொழுது தமிழக வெற்றி கழகத்திற்கு (தவெக) ஆதரவு என்ற நிலைப்பாட்டை எடுத்திருப்பது மிகச்சரியான முடிவு என்று அறுதியிட்டுக் கூறியுள்ளார். நமக்கு இனி யாரும் எந்தவித கேடும் செய்ய முடியாது என்று தொண்டர்களுக்கு நம்பிக்கை ஊட்டியுள்ள வைகோவின் இந்த அறிக்கை, தற்பொழுது தமிழக அரசியல் வட்டாரத்தில் பெரும் விவாதப் பொருளாக மாறியுள்ளது.
