நாகர்கோவில் காசிக்கு மகளிர் நீதிமன்றம் விதித்த ஆயுள் தண்டனையை சென்னை உயர்நீதிமன்ற மதுரை கிளை நேற்று அதிரடியாக உறுதி செய்து தீர்ப்பளித்துள்ளது. இந்த வழக்கின் தீவிரத்தைக் கருத்தில் கொண்டு காசியின் மேல்முறையீட்டு மனுவை நீதிபதிகள் முற்றிலும் நிராகரித்துள்ளனர்.
கன்னியாகுமரி மாவட்டம் நாகர்கோவில் கணேசபுரம் பகுதியைச் சேர்ந்த காசி (27), சமூக வலைத்தளங்கள் மூலமாகப் பல பெண்களைத் திட்டமிட்டு ஏமாற்றி, அவர்களுடன் பழகி ஆபாச புகைப்படங்கள் மற்றும் வீடியோக்களை எடுத்துள்ளார். பின்னர் அந்த அந்தரங்கப் பதிவுகளை வைத்தே பாதிக்கப்பட்ட பெண்களை மிரட்டி பல லட்சம் ரூபாய் பணம் மற்றும் நகைகளைப் பறித்ததாகக் கடந்த 2020ஆம் ஆண்டு வழக்குப்பதிவு செய்யப்பட்டது. பெரும் பரபரப்பை ஏற்படுத்திய இந்த வழக்கை சிபிசிஐடி (CB-CID) போலீசார் தீவிரமாக விசாரித்து வந்தனர்.
இந்த வழக்கை விசாரித்த நாகர்கோவில் விரைவு மகளிர் நீதிமன்றம், கடந்த 2023ஆம் ஆண்டு ஜூன் மாதம் காசிக்கு ஆயுள் தண்டனையும், 1.10 லட்சம் ரூபாய் அபராதமும் விதித்து அதிரடி தீர்ப்பளித்தது. இந்தத் தண்டனையை எதிர்த்தும், தனக்கு வழங்கப்பட்ட சிறைத் தண்டனையைக் குறைக்கக் கோரியும் காசி தரப்பில் சென்னை உயர்நீதிமன்ற மதுரை கிளையில் மேல்முறையீட்டு மனுத் தாக்கல் செய்யப்பட்டது.
இந்த மேல்முறையீட்டு மனுவை, விசாரித்த நீதிபதிகள் என்.ஆனந்த் வெங்கடேஷ் மற்றும் கே.கே.ராமகிருஷ்ணன் அடங்கிய அமர்வு, கீழ் நீதிமன்றம் விதித்த ஆயுள் தண்டனையை முழுமையாக உறுதி செய்து உத்தரவிட்டது. டிஜிட்டல் தொழில்நுட்பம் வளர்ந்துள்ள இந்த நவீன காலத்தில், பெண்கள் தங்களின் அந்தரங்கப் புகைப்படங்களையோ அல்லது வீடியோக்களையோ மின்னணு ஊடகங்கள் மூலம் யாருடனும் பகிர்ந்து கொள்ளக் கூடாது என்று நீதிபதிகள் இந்த தீர்ப்பின் போது மிகவும் உருக்கமாக எச்சரித்துள்ளனர்.
சமூக வலைத்தளங்கள் மூலம் நடக்கும் இத்தகைய சைபர் குற்றங்கள் மற்றும் ஏமாற்று வேலைகளுக்கு இந்த தீர்ப்பு ஒரு மிகச்சிறந்த பாடம் என்று சட்ட வல்லுநர்கள் கருத்து தெரிவித்துள்ளனர். காசி சாகும் வரை சிறையிலேயே இருக்க வேண்டும் என்பதை உறுதி செய்துள்ள இந்த இறுதி தீர்ப்பு, பாதிக்கப்பட்ட பெண்களின் குடும்பத்தினர் மத்தியிலும், சமூக ஆர்வலர்கள் மத்தியிலும் தற்பொழுது பெரும் வரவேற்பைப் பெற்றுள்ளது.
