அதிமுக பொதுச்செயலாளர் எடப்பாடி பழனிசாமி, தனது சொந்த மாவட்டமான சேலத்தில் நேற்று (வெள்ளிக்கிழமை) சங்ககிரி, வீரபாண்டி, ஓமலூர் மற்றும் மேட்டூர் ஆகிய தொகுதிகளில் சூறாவளிப் பிரச்சாரம் மேற்கொண்டார். தேர்தல் களம் சூடுபிடித்துள்ள நிலையில், தொகுதி மறுவரையறை (Delimitation) குறித்து முதலமைச்சர் ஸ்டாலின் திட்டமிட்டுத் தவறான தகவல்களைப் பரப்பி வருவதாகக் கடுமையாகச் சாடிய அவர், திமுகவின் “போலி வாக்கு வங்கி” அரசியல் குறித்தும் அடுக்கடுக்கான புகார்களை முன்வைத்தார்.
தொகுதி மறுவரையறை – உண்மையான தரவுகள்: “தொகுதி மறுவரையறை செய்யப்பட்டால் தமிழகத்தின் பிரதிநிதித்துவம் குறையும் என ஸ்டாலின் மக்களிடையே தேவையற்ற பயத்தை உருவாக்குகிறார். ஆனால், நாடாளுமன்றத்தில் மத்திய அரசு ஏற்கனவே இது குறித்து மிகத் தெளிவான விளக்கத்தை அளித்துள்ளது. அதன்படி, தொகுதி மறுவரையறைக்குப் பின் தமிழகத்தின் நாடாளுமன்றத் தொகுதிகளின் எண்ணிக்கை தற்போதுள்ள 39-லிருந்து 59-ஆக உயரும். இதன் மூலம் நாட்டின் ஒட்டுமொத்த பிரதிநிதித்துவத்தில் மாநிலத்தின் பங்கு 7.18%-லிருந்து 7.23%-ஆக அதிகரிக்கும். உண்மை நிலை இவ்வாறு இருக்கையில், தேர்தல் ஆதாயத்திற்காகத் தவறான பிம்பத்தை திமுக கட்டமைக்கிறது” என்று எடப்பாடி பழனிசாமி தரவுகளுடன் விளக்கமளித்தார். மேலும், கருணாநிதி எடுத்த முந்தைய முடிவுகளால்தான் மூப்பனார் போன்ற தலைவர்கள் பிரதமர் ஆக முடியவில்லை என்றும், ஏபிஜே அப்துல் கலாம் அவர்களுக்கு இரண்டாம் முறை வாய்ப்பு கிடைக்கவிடாமல் தடுத்தது திமுக தான் என்றும் அவர் குற்றம் சாட்டினார்.
போலி வாக்கு வங்கி அம்பலம்: ஓமலூரில் நடைபெற்ற மாபெரும் பொதுக்கூட்டத்தில் பேசிய எடப்பாடி பழனிசாமி, திமுகவின் தேர்தல் வெற்றிகளுக்குப் பின்னால் இருக்கும் மர்மத்தை உடைத்தார். “சிறப்புத் தீவிர வாக்காளர் பட்டியல் திருத்தத்தின் (SIR) மூலம் திமுக-வின் போலி வாக்கு வங்கி தற்போது முழுமையாக முடக்கப்பட்டுள்ளது. இறந்தவர்களின் பெயரில் ஓட்டுப் போட்டு வெற்றி பெற்று வந்த கலாச்சாரம் இனி முடிவுக்கு வரும். குறிப்பாக முதலமைச்சர் ஸ்டாலின் போட்டியிடும் கொளத்தூர் தொகுதியில் மட்டும் சுமார் ஒரு லட்சம் போலி வாக்குகள் நீக்கப்பட்டுள்ளன. மற்ற தொகுதிகளில் 10 ஆயிரம் முதல் 15 ஆயிரம் வரை போலி வாக்குகள் அகற்றப்பட்டுள்ளன. ஸ்டாலினின் உண்மையான வாக்கு வங்கி இப்போது காலியாகிவிட்டது” என்று ஆவேசமாகத் தெரிவித்தார்.
டாஸ்மாக் மற்றும் நிர்வாகச் சீர்கேடு: தமிழகத்தில் தற்போது சுமார் 6,000 டாஸ்மாக் கடைகள் இயங்கி வருவதாகவும், நாளொன்றுக்கு சராசரியாக 1.5 கோடி மதுபாட்டில்கள் விற்கப்படுவதாகவும் அவர் புகார் கூறினார். இதில் முறையான விசாரணை நடத்தப்பட்டால் மிகப்பெரிய ஊழல் வெளிவரும் என எச்சரித்த அவர், திமுக அரசு குடும்ப நலனில் மட்டுமே அக்கறை காட்டுவதாகச் சாடினார். “மத்தியில் பதவி வகித்தபோது திமுக தனது குடும்ப உறுப்பினர்களுக்காக மட்டுமே அதிகாரத்தைப் பயன்படுத்தியது. தமிழகத்திற்கு எந்தவொரு பெரிய திட்டத்தையோ அல்லது கூடுதல் நிதியையோ கொண்டு வரவில்லை. அரசு ஊழியர்களுக்கு அளித்த பழைய ஓய்வூதியத் திட்ட வாக்குறுதியையும் காற்றில் பறக்கவிட்டுவிட்டனர். விவசாயிகளுக்கான முக்கிய திட்டங்களை முடக்கி வைத்துள்ள இந்த அரசுக்கு மக்கள் வரும் தேர்தலில் தகுந்த பாடம் புகட்டுவார்கள்” என்று கூறி தனது உரையை நிறைவு செய்தார்.
