ஐடி துறையில் முன்னணி நிறுவனமான காக்னிசண்ட் (Cognizant Technology Solutions), தனது உலகளாவிய செயல்பாடுகளில் பெரும் மாற்றங்களைச் செய்யத் திட்டமிட்டுள்ளது. இதன் ஒரு பகுதியாக, உலகம் முழுவதும் சுமார் 15,000 ஊழியர்களைப் பணிநீக்கம் செய்ய அந்நிறுவனம் முடிவு செய்துள்ளதாகத் தகவல்கள் வெளியாகியுள்ளன.
இந்தியாவில் அதிக பாதிப்பு:
காக்னிசண்ட் நிறுவனத்தில் உலகம் முழுவதும் மொத்தம் 3.57 லட்சம் பேர் பணியாற்றி வருகின்றனர். இதில் இந்தியாவில் மட்டும் சுமார் 2.50 லட்சம் பேர் பணிபுரிகின்றனர் என்பது குறிப்பிடத்தக்கது. தற்போதைய அறிவிப்பின்படி, பணிநீக்கம் செய்யப்படும் 15,000 ஊழியர்களில் பெரும்பகுதியினர் இந்தியாவைச் சேர்ந்தவர்களாக இருப்பார்கள் என அஞ்சப்படுகிறது. இது இந்திய ஐடி ஊழியர்களிடையே பெரும் கலக்கத்தை ஏற்படுத்தியுள்ளது.
6 மாதச் சம்பளம் இழப்பீடு:
வேலையிழக்கும் ஊழியர்களுக்கு ஓரளவிற்கு ஆறுதல் அளிக்கும் வகையில், அந்நிறுவனம் ஒரு முக்கிய முடிவை எடுத்துள்ளது. அதன்படி, பணிநீக்கம் செய்யப்படும் ஊழியர்களுக்கு 6 மாதச் சம்பளத்தை இழப்பீடாக (Severance Pay) வழங்கக் காக்னிசண்ட் திட்டமிட்டுள்ளது.
ஐடி சந்தையில் நிலவும் மந்தநிலை மற்றும் நிறுவனத்தின் லாப விகிதத்தை உயர்த்தும் நோக்கில் இந்த அதிரடி நடவடிக்கைகள் மேற்கொள்ளப்படுவதாகத் தெரிகிறது. இந்த அறிவிப்பு வரும் நாட்களில் அதிகாரப்பூர்வமாக நடைமுறைக்கு வரும் என எதிர்பார்க்கப்படுகிறது.
