தமிழக அரசியல் களத்தில் தமிழக வெற்றி கழகத் தலைவர் விஜய்யின் அதிகாரப்பூர்வ வருகைக்குப் பிறகு, திரையுலகில் மீண்டும் ஒரு அரசியல் அலையும், அதிகாரத்தைப் பிடிக்கும் ஆசையும் அலைமோதி வருகிறது. முன்னணி தமிழ் சினிமா நட்சத்திரங்கள் பலர் திடீரென மேடைகளில் அரசியல் பேசுவதும், மறைமுக அரசியல் சாடல்களில் ஈடுபடுவதும் தமிழக ஊடக வட்டாரங்களில் பரபரப்பான விவாதத்தைக் கிளப்பியுள்ளது.
சமீபகாலமாக முன்னணி நடிகர் தனுஷின் நகர்வுகள் திரையுலகைத் தாண்டி அரசியல் வட்டாரத்திலும் உற்றுநோக்கப்பட்டு வருகின்றன. தனது புதிய ரசிகர் அமைப்பு அல்லது அரசியல் சார்ந்த கட்சிப் பதிவு நடவடிக்கைகளுக்காக அவர் தலைநகர் டெல்லி வரை சென்று சட்ட ஆலோசனைகளில் ஈடுபட்டதாக நம்பத்தகுந்த அரசியல் வட்டாரங்கள் தெரிவிக்கின்றன.
மற்றொருபுறம், நடிகர் சிவகார்த்திகேயன் தனது ரசிகர் நற்பணி மன்றக் கூட்டங்களில் பங்கேற்று, “எல்லோரும் நன்றாகப் படியுங்கள், குடும்பத்தைப் பாருங்கள், ஒழுக்கத்தைப் பேணுங்கள்” என அறிவுரைகளை வழங்கி வருகிறார். இது பார்ப்பதற்குச் சாதாரண அறிவுரை போலத் தெரிந்தாலும், அஜித்தின் மன்றக் கலைப்பு பாணியையும், தொண்டர்களை மறைமுகமாகக் கட்டுப்பாட்டில் வைத்துத் தன் பின்னணியில் பெரிய மக்கள் பலத்தைத் திரட்டும் அரசியல் வியூகத்தின் ஒரு பகுதியாகவும் பார்க்கப்படுகிறது.
இவர்கள் இருவரையும் தாண்டி, நடிகர் விஜய் சேதுபதியின் பேச்சுக்கள் மிகப்பெரிய புயலைக் கிளப்பியுள்ளன. பிரபல தொலைகாட்சி நிகழ்ச்சியான ‘பிக்பாஸ்’ மேடையில் போட்டியாளர் ஒருவரைச் சுட்டிக்காட்டி அவர் பேசிய கருத்துக்கள், நேரடியாகக் தவெக தலைவரையே குறிவைத்து அடிக்கப்பட்டதாக விமர்சனங்கள் எழுந்துள்ளன. “தலைவனுக்கான எந்தத் தகுதியும் இல்லாமல் வாய்க்கு வந்த வார்த்தைகளையெல்லாம் அள்ளி வீசிவிட்டு, கடைசியில் எதிர்க்கட்சிகள் மீது பழிபோடுவது நல்லதல்ல” என விஜய் சேதுபதி பேசியது, எதிர்க்கட்சியின் பின்னணியில் நடந்த அரசியல் தூண்டுதலா என்ற கேள்வியையும் எழுப்பியுள்ளது.
கருணாநிதி மற்றும் ஜெயலலிதா என்ற இரு பெரும் ஆளுமைகள் களத்தில் இல்லாத இந்தச் சூழலில், கோடம்பாக்கத்து ஹீரோக்கள் அனைவரும் தங்களுக்குமான அரசியல் எதிர்காலத்தைத் தீர்மானிக்க அடுத்தடுத்துக் களமிறங்கி வருவது தமிழக அரசியலை மேலும் சூடேற்றியுள்ளது.