இந்தியாவில் உள்ள கோடிக்கணக்கான தனியார் மற்றும் பொதுத்துறை நிறுவன தொழிலாளர்களின் எதிர்காலப் பாதுகாப்பு நிதியைக் கையாளும் இபிஎஃப்ஓ (EPFO) அமைப்பில், மத்திய தொழிலாளர் மற்றும் வேலைவாய்ப்பு அமைச்சகம் தற்பொழுது வரலாற்றுச் சிறப்புமிக்க ஒரு மிகப்பெரிய சீர்திருத்தத்தை அரங்கேற்றியுள்ளது. கடந்த 1952 ஆம் ஆண்டு முதல் நடைமுறையில் இருந்த பழமையான இபிஎஃப் திட்டங்கள் மற்றும் 1995 ஆம் ஆண்டின் ஓய்வூதியத் திட்டங்களை ஒட்டுமொத்தமாக ரத்து செய்துவிட்டு, அதற்குப் பதிலாக முற்றிலும் நவீனமயமாக்கப்பட்ட “இபிஎஃப் திட்டம் 2026” (Employees’ Provident Funds Scheme, 2026), “இபிஎஸ் திட்டம் 2026” மற்றும் “இடிஎல்ஐ திட்டம் 2026” ஆகிய புதிய கட்டமைப்புகளை ஜூன் 29, 2026 முதல் அதிரடியாக அமலுக்குக் கொண்டு வந்துள்ளது.
சமூக பாதுகாப்பு குறியீடு 2020-ன் (Code on Social Security, 2020) கீழ் கொண்டு வரப்பட்டுள்ள இந்த புதிய மாற்றங்களில், பொதுமக்களை நேரடியாகக் கவரும் மற்றும் அதிகாரிகளை அதிர வைக்கும் மிக முக்கியமான அம்சம் “20 நாட்கள் கிளைம் விதிமுறை” ஆகும். இனிமேல் பிஎஃப் சந்தாதாரர்கள் தங்களது பிஎஃப் பணத்தை எடுப்பதற்கோ, ஓய்வூதியத்தை நிர்ணயம் செய்வதற்கோ அல்லது காப்பீட்டுப் பலன்களைப் பெறுவதற்கோ விண்ணப்பித்தால், அந்த விண்ணப்பம் சரியாக இருக்கும் பட்சத்தில், சரியாக 20 நாட்களுக்குள் இபிஎஃப்ஓ அதனை முழுமையாகச் செட்டில் செய்ய வேண்டும் என்று புதிய சட்டம் கடுமையான டெட்லைனை விதித்துள்ளது.
ஒருவேளை, தகுந்த காரணம் இல்லாமல் ஒரு சந்தாதாரரின் விண்ணப்பம் 20 நாட்களுக்கு மேல் தாமதப்படுத்தப்பட்டால், அதற்குப் பொறுப்பான இபிஎஃப்ஓ கமிஷனருக்கு (EPFO Commissioner) 12 சதவீத நிலையான ஆண்டு அபராத வட்டி விதிக்கப்படும். இந்த அதிரடித் திட்டத்தின் சிறப்பம்சமே, அந்த அபராத வட்டித் தொகையானது சம்பந்தப்பட்ட அதிகாரியின் சொந்தச் சம்பளத்தில் இருந்து நேரடியாகப் பிடித்தம் செய்யப்பட்டு, பாதிக்கப்பட்ட சந்தாதாரருக்கு வழங்கப்படும் என்பது தான்.Variable முறையில் இருந்த அபராதங்களை மாற்றி, இப்படி ஒரு நேரடிப் பொறுப்பு முறையைக் கொண்டு வந்திருப்பது ஊழியர்கள் மத்தியில் பெரும் வரவேற்பைப் பெற்றுள்ளது.
இந்த புதிய 2026 டிஜிட்டல் முறைக்கு மாறுவதற்காக உறுப்பினர்கள் தங்களது பான் கார்டு (PAN) மற்றும் வங்கி கணக்கு விபரங்களைச் சரியாக இணைத்திருக்க வேண்டும் என்று அறிவுறுத்தப்பட்டுள்ளது. அதே நேரத்தில், பழைய 1952 திட்டத்தின் கீழ் இருந்த தற்போதைய உறுப்பினர்கள் யாரும் புதிய பதிவு எதையும் செய்யத் தேவையில்லை; அவர்களது கணக்குகளும் சேமிப்பு வரலாறும் தானாகவே 2026 திட்டத்திற்குள் எந்தவித தடையுமின்றி மாற்றப்படும் என்றும் மத்திய அரசு தெளிவுபடுத்தியுள்ளது. மேலும், ஊழியர்கள் மற்றும் நிறுவனங்கள் செலுத்தும் பங்களிப்புத் தொகையான 12 சதவீத விகிதத்தில் எந்தவித மாற்றமும் செய்யப்படவில்லை என்பதால், இந்த புதிய டிஜிட்டல் மாற்றங்கள் மற்றும் கடுமையான 20 நாள் விதிகள் வரும் நாட்களில் பிஎஃப் பணத்தைப் பெறுவதை மிக எளிமையாக்கும் என எதிர்பார்க்கப்படுகிறது.
