Shockwaves in Global Energy Market! Iran Shuts Strait of Hormuz! “கப்பல்கள் சிறைபிடிப்பு? கச்சா எண்ணெய் விலை உயரும் அபாயம்!” இஸ்ரேல் தாக்குதலுக்கு ஈரான் ராணுவம் பகிரங்க பதிலடி! இந்தியாவிற்கு பாதிப்பா?

மத்திய கிழக்கு பிராந்தியத்தில் நிலவி வரும் கடுமையான போர்ச் சூழலுக்கு மத்தியில், உலக நாடுகள் அனைத்தும் எந்த ஒரு நிகழ்வு நடந்துவிடக் கூடாது என்று பயந்தார்களோ, அது தற்பொழுது நடந்துவிட்டது. சர்வதேச கச்சா எண்ணெய் போக்குவரத்தின் மிக முக்கிய நுழைவுப் பாதையாகக் கருதப்படும் ‘ஹார்முஸ் ஜலசந்தி’ பகுதியை மீண்டும் முழுமையாக மூடப்போவதாக ஈரானின் கூட்டு ராணுவ கட்டளை அமைப்பான ‘கத்தாம் அல்-அன்பியா’ தற்பொழுது அதிரடியாக அறிவித்துள்ளது.

கடந்த சில நாட்களுக்கு முன்புதான் அமெரிக்கா மற்றும் ஈரானுக்கு இடையே வரலாற்றுச் சிறப்புமிக்க ‘இஸ்லாமாபாத் புரிந்துணர்வு ஒப்பந்தம்’ கையெழுத்தானது. இந்த 60 நாள் தற்காலிக அமைதி ஒப்பந்தத்தின் காரணமாக, கச்சா எண்ணெய் ஏற்றிச் செல்லும் அனைத்து சர்வதேசக் கப்பல்களும் எவ்வித கூடுதல் கட்டணமுமின்றி இப்பாதையைக் கடந்து பயணித்து வந்தன. இதன் மூலம் இந்தியா உள்ளிட்ட நாடுகளுக்குத் தங்கு தடையின்றி கச்சா எண்ணெய் இறக்குமதியாகி, பெட்ரோல், டீசல் மற்றும் எல்.பி.ஜி சிலிண்டர்களின் தட்டுப்பாடு நீங்கும் என்றும், விலை உயர்வு கட்டுப்படுத்தப்படும் என்றும் பெரிதும் எதிர்பார்க்கப்பட்டது.

ஆனால், லெபனானில் இஸ்ரேல் தொடர்ந்து நடத்தி வரும் வான்வழித் தாக்குதல்கள் மற்றும் தெற்கு லெபனான் பகுதியில் இருந்து இஸ்ரேல் ராணுவம் வெளியேற மறுப்பது ஆகியவை இந்த அமைதி ஒப்பந்தத்தை அமெரிக்காவும் இஸ்ரேலும் மீறியுள்ளதைக் காட்டுவதாக ஈரான் குற்றம் சாட்டியுள்ளது. இதன் காரணமாகவே, ஒப்பந்தத்தின் முதல் விதியை அவர்கள் மீறிவிட்டதாகக் கூறி, ஜலசந்தியை மூடுவதாக ஈரான் ராணுவம் இந்த அதிரடி முடிவை எடுத்துள்ளது.

ஈரானின் இந்த திடீர் நடவடிக்கையால் பல லட்சம் பேரல் கச்சா எண்ணெய்களை ஏற்றிக்கொண்டு உலக நாடுகளுக்குப் புறப்படவிருந்த நூற்றுக்கணக்கான பிரம்மாண்ட கப்பல்கள் அங்கே கடலிலேயே தேங்கி நிற்கும் இக்கட்டான சூழல் உருவாகியுள்ளது. உலகளாவிய கடல்வழி கச்சா எண்ணெய் போக்குவரத்தில் சுமார் 20 முதல் 25 சதவீத பங்கினைக் கொண்டுள்ள இந்த ஹார்முஸ் ஜலசந்தி வழியாகத்தான் தினமும் தோராயமாக 2 கோடி பேரல் கச்சா எண்ணெய் கொண்டு செல்லப்படுகிறது. அதுமட்டுமின்றி, கத்தார் மற்றும் ஐக்கிய அரபு அமீரகம் ஆகிய நாடுகளில் இருந்தான திரவ இயற்கை எரிவாயு ஏற்றுமதியும் இப்பாதை வழியாகவே நடைபெறுகிறது.

எனவே, இந்த முக்கிய எரிசக்திப் போக்குவரத்து மையப்பகுதி தற்பொழுது முடக்கப்பட்டுள்ளதால், சர்வதேசச் சந்தையில் பிரெண்ட் கச்சா எண்ணெய் விலை வரலாறு காணாத அளவிற்கு மிகக் கடுமையாக உயரக்கூடும் என்று பொருளாதார வல்லுநர்கள் எச்சரிக்கின்றனர். இந்தத் திடீர் திருப்பம் மத்திய கிழக்கு பிராந்தியத்தில் போர்ச் சூழலை மேலும் தீவிரப்படுத்தியுள்ளதுடன், இந்தியப் சந்தையிலும் பெட்ரோல், டீசல் மற்றும் வணிகப் பொருட்களின் விலையில் பெரும் தாக்கத்தை ஏற்படுத்தும் என்ற அச்சத்தை நுகர்வோர் மத்தியில் ஏற்படுத்தியுள்ளது.