உலகப் பொருளாதாரத்தையும், சர்வதேசத் தரைவழி மற்றும் கடல்வழிப் வர்த்தகத்தையும் பெருமளவில் பாதித்து வந்த ஈரான் போர் தற்பொழுது ஒரு வரலாற்றுச் சிறப்புமிக்க திருப்புமுனையை எட்டியுள்ளது. கடந்த சில வாரங்களாகத் திரைமறைவில் தீவிரமாக நடைபெற்று வந்த அமைதிப் பேச்சுவார்த்தைகளின் (Peace Negotiations) பலனாக, போரை முடிவுக்குக் கொண்டு வருவதற்கான பிரம்மாண்ட ஒப்பந்தம் ஒன்று அடுத்த சில மணி நேரங்களில் கையெழுத்தாக உள்ளதாக அமெரிக்கா மற்றும் முக்கிய மத்தியஸ்த நாடான பாகிஸ்தான் அதிகாரப்பூர்வமாக அறிவித்துள்ளன.
இருப்பினும், இந்த ஒப்பந்தம் கையெழுத்தாகும் துல்லியமான நாள் குறித்து அமெரிக்கா மற்றும் ஈரான் நாடுகளுக்கு இடையே சிறிய அளவிலான காலக்கெடு முரண்பாடுகள் நீடித்து வருகின்றன.
அமெரிக்க அதிபர் டொனால்ட் ட்ரம்ப் மற்றும் இப்போரின் முக்கிய மத்தியஸ்தராகச் செயல்படும் பாகிஸ்தான் பிரதமர் ஷெஹ்பாஸ் ஷெரீஃப் (Shehbaz Sharif) ஆகிய இருவருமே இந்த ஒப்பந்தம் ஞாயிற்றுக்கிழமைக்குள் இறுதி வடிவம் பெறும் என்று உறுதியாகத் தெரிவித்துள்ளனர்.
இதுகுறித்து பாகிஸ்தான் பிரதமர் ஷெஹ்பாஸ் ஷெரீஃப் பேசுகையில், “அடுத்த 24 மணி நேரத்திற்குள் அமைதி ஒப்பந்தத்திற்கான இறுதிப் பணிகள் நிறைவடையும் என எதிர்பார்க்கப்படுகிறது. அதைத் தொடர்ந்து சம்பந்தப்பட்ட அனைத்துத் தரப்பினரும் மின்னணு முறையில் (Electronic Signing) உடனடியாக இதில் கையெழுத்திடுவார்கள். இதற்கு அடுத்தபடியாக, தொழில்நுட்ப ரீதியிலான உயர்மட்டப் பேச்சுவார்த்தைகள் அடுத்த வாரம் தொடங்கும்” என்று ஏபி (AP) செய்தி நிறுவனத்திடம் தெரிவித்துள்ளார். பாகிஸ்தான் வெளியுறவு அமைச்சகமும் ஞாயிற்றுக்கிழமை இதற்கான அதிகாரப்பூர்வ நிகழ்வுகள் திட்டமிடப்பட்டுள்ளதை உறுதி செய்துள்ளது.
அமெரிக்கா மற்றும் பாகிஸ்தான் நாடுகள் அவசர அவசரமாகக் காலக்கெடுவை அறிவித்து வரும் வேளையில், ஈரான் தரப்பு இதில் சற்று நிதானமான மற்றும் எச்சரிக்கையான போக்கைக் கடைப்பிடித்து வருகிறது.
இதுகுறித்து ஈரானிய வெளியுறவு அமைச்சகத்தின் செய்தித் தொடர்பாளர் இஸ்மாயில் பாகேய் (Esmaeil Baqaei) பேசுகையில், “அமைதி ஒப்பந்தம் கையெழுத்தாவதற்கான துல்லியமான நேரத்திற்காக நாம் காத்திருக்க வேண்டும். அமெரிக்கா அறிவிப்பது போல இது நாளைக்கே (ஞாயிற்றுக்கிழமை) நடந்துவிடாது. இதற்கு இன்னும் சில நாட்கள் ஆகலாம். எதிர்தரப்பின் தொடர்ச்சியற்ற மற்றும் நிலையற்ற போக்குகள் காரணமாக, இந்த செயல்முறை குறித்துக் கருத்து தெரிவிப்பதில் நாம் எச்சரிக்கையாக இருக்க வேண்டும்” என்று ஐஆர்ஐபி (IRIB) செய்தி நிறுவனத்திடம் குறிப்பிட்டுள்ளார். இருப்பினும், பேச்சுவார்த்தை தொடங்கியதில் இருந்து ஈரான் வெளியிட்டுள்ள மிகவும் சாதகமான அறிக்கை இதுதான் என்பது குறிப்பிடத்தக்கது.
இந்த ஒப்பந்தம் குறித்து அமெரிக்க அதிபர் டொனால்ட் ட்ரம்ப் தனது ‘ட்ரூத் சோஷியல்’ (Truth Social) சமூக வலைதளப் பக்கத்தில் ஒரு அதிரடியான பதிவை வெளியிட்டுள்ளார். அதில், “அமைதி ஒப்பந்தம் திட்டமிட்டபடி நாளை கையெழுத்தாக உள்ளது. அது கையெழுத்தான அடுத்த கணமே, உலக வர்த்தகத்தின் மிக முக்கியப் பாதையான ஹோர்முஸ் ஜலசந்தி (Strait of Hormuz) மீண்டும் அனைத்து நாடுகளின் பயன்பாட்டிற்கும் உடனடியாகத் திறந்துவிடப்படும்” என்று குறிப்பிட்டுள்ளார்.
போரின் ஆரம்பக் கட்டத்திலிருந்தே உலகிற்குச் செல்லும் கச்சா எண்ணெய் மற்றும் இயற்கை எரிவாயு போக்குவரத்தின் இதயமாக விளங்கும் இந்த ஹோர்முஸ் ஜலசந்தியை ஈரான் தனது முழுக் கட்டுப்பாட்டிற்குள் கொண்டு வந்து, பிற கப்பல்களுக்குக் கட்டணம் வசூலித்து வந்தது. அமெரிக்கா இதற்குத் தொடர்ந்து எதிர்ப்பு தெரிவித்து வந்த நிலையில், ட்ரம்பின் இந்த அறிவிப்பு உலக விளையாட்டு மற்றும் வர்த்தகச் சந்தையில் பெரும் நிம்மதியை ஏற்படுத்தியுள்ளது.
ராய்ட்டர்ஸ் (Reuters) செய்தி நிறுவனம் வெளியிட்டுள்ள புதிய தகவல்களின்படி, இந்த முன்மொழியப்பட்ட புதிய அமைதி ஒப்பந்தத்தின் கீழ் சில முக்கிய நிபந்தனைகள் இருதரப்பிலும் ஏற்றுக்கொள்ளப்பட்டுள்ளன:
-
சொத்துக்கள் விடுதலை: ஈரான் நாட்டின் முடக்கப்பட்ட பல பில்லியன் டாலர் மதிப்புள்ள சர்வதேசச் சொத்துக்களை அமெரிக்கா உடனடியாக விடுவிக்கும். மேலும் ஈரானின் கச்சா எண்ணெய் ஏற்றுமதி மீதான பொருளாதாரத் தடைகளையும் தளர்த்தும்.
-
அணுசக்தி கட்டுப்பாடுகள்: இதற்குப் பகரமாக ஈரான் ஹோர்முஸ் ஜலசந்தியை முழுமையாகத் திறக்க வேண்டும். மேலும் அடுத்த 60 நாட்களுக்குள் ஈரானின் அணுசக்தித் திட்டங்களை முழுமையாக முடக்குவது, செறிவூட்டப்பட்ட யுரேனியம் இருப்புகளை அழிப்பது மற்றும் சர்வதேச ஆய்வாளர்களின் நீண்ட காலக் கண்காணிப்பை ஏற்பது போன்ற தொழில்நுட்பப் பேச்சுவார்த்தைகளுக்கு ஈரான் உட்பட வேண்டும்.
-
போர் இழப்பீடு: இந்த ஒப்பந்தத்தில் ஈரானுக்கான போர் இழப்பீடுகள் மற்றும் ஏவுகணைத் திட்டங்கள் குறித்த விவாதங்களும் உள்ளதாகக் கூறப்படும் நிலையில், அமெரிக்க உயர் அதிகாரி ஒருவர் அதை மறுத்துள்ளார்.
சர்வதேச அளவில் பெரும் பதற்றத்தை ஏற்படுத்திய இப்போரின் அமைதி ஒப்பந்தம் இறுதிப் பாதையை எட்டியுள்ளதால், ஒட்டுமொத்த உலக நாடுகளின் பார்வையும் தற்பொழுது வாஷிங்டன் மற்றும் டெஹ்ரான் நோக்கித் திரும்பியுள்ளது.
