தமிழ்நாடு மாநில வாணிபக் கழகம் (டாஸ்மாக்) மூலம் ஆன்லைன் வாயிலாக மதுபானங்களை விற்பனை செய்யத் திட்டமிடப்பட்டு வரும் முடிவிற்கு எதிர்ப்பு தெரிவித்துச் சென்னை உயர்நீதிமன்றத்தில் புதிய பொதுநல வழக்கு ஒன்று தொடரப்பட்டுள்ளது.
வழக்கறிஞர்கள் சமூக நீதி பேரவையின் தலைவர் சார்பில் தாக்கல் செய்யப்பட்டுள்ள இந்த மனுவில், ஆன்லைன் மூலமாக மதுபானங்களை விற்பனை செய்வது சமூகத்தில் பல்வேறு சீரழிவுகளுக்கு வழிவகுக்கும் என்று தெரிவிக்கப்பட்டுள்ளது. முக்கியமாக, 21 வயதுக்குட்பட்ட சிறுவர்களும், இளைஞர்களும் எவ்வித சிரமமும் இன்றி எளிதாக மதுபானங்களைப் பெற்றுப் பயன்படுத்தும் அபாயகரமான சூழல் இதனால் உருவாகும் என மனுதாரர் தரப்பில் சுட்டிக்காட்டப்பட்டுள்ளது.
மேலும், மதுப் பழக்கத்தை ஊக்குவித்து அதன் மூலம் அரசு தனது வருவாயைப் பெருக்கிக் கொள்ள முயற்சிப்பதாக மனுவில் கடுமையான குற்றச்சாட்டு முன்வைக்கப்பட்டுள்ளது. இந்திய அரசியலமைப்புச் சட்டத்தின்படி, படிப்படியாக மதுவிலக்கை அமல்படுத்த வேண்டிய பொறுப்பும், கடமையும் மாநில அரசுக்கு உள்ளது. ஆனால், அதற்கு முற்றிலும் முரணான வகையில் ஆன்லைன் மூலம் மதுவை வீடுகளுக்கே விநியோகம் செய்யும் நடைமுறையைக் கொண்டுவர முனைவது சட்டப் பிரிவுகளுக்கு எதிரானது என்றும் அந்த மனுவில் குறிப்பிடப்பட்டுள்ளது.
ஆன்லைன் மது விற்பனைத் திட்டத்திற்குத் தடை விதிக்க வேண்டும் என்றும், இந்த முடிவைக் கைவிட அரசுக்கு உத்தரவிட வேண்டும் என்றும் கோரப்பட்டுள்ள இந்த வழக்கு, விரைவில் உயர்நீதிமன்றத்தில் விசாரணைக்கு வரவுள்ளது.
