நாட்டையே உலுக்கி வரும் ‘டிஜிட்டல் அரெஸ்ட்’ (Digital Arrest) மற்றும் போலி காவல் துறை அதிகாரிகளாக நடித்து அரங்கேற்றப்படும் சைபர் மோசடிகளுக்கு எதிராக, இந்திய உச்சநீதிமன்றம் மிகக் கடுமையான சட்டப் பிரம்பை எடுத்திருக்கிறது. தலைமை நீதிபதி சூர்யா காந்த், நீதிபதிகள் ஜோய்மால்யா பாக்சி மற்றும் வி. மோகனா ஆகியோர் அடங்கிய அமர்வு, “வங்கிகளின் அலட்சியம் மற்றும் கே.ஒய்.சி (KYC) சரிபார்ப்புத் தவறுகளால் சைபர் மோசடி நடந்திருப்பது நிரூபிக்கப்பட்டால், பாதிக்கப்பட்ட வாடிக்கையாளர்களுக்குச் சம்பந்தப்பட்ட வங்கிகளே முழு நஷ்டஈட்டையும் வழங்க வேண்டும்” என்று அதிரடியாக உத்தரவிட்டுள்ளது.
“ஜனநாயக நாட்டில் வாட்ஸ்அப் அல்லது வீடியோ காலில் கைது செய்கிறோம் என்று சொன்னால் எப்படி நம்புகிறீர்கள்? போனைத் தூக்கிச் சுவரில் அடியுங்கள், அந்த கைதே முடிந்துவிடும்!” என்று தலைமை நீதிபதி சூர்யா காந்த் காட்டம் தெரிவித்த அதே வேளையில், அரசின் போஸ்ட்-மார்ட்டம் (Post-Mortem) அறிக்கைகளை நிராகரித்து வங்கியியல் அமைப்பின் அடிப்படைப் பொறுப்பைத் தோலுரித்துள்ளார். பணம் பறிபோன பிறகு அறிக்கை சமர்ப்பிப்பதால் எந்தப் பயனும் இல்லை; சந்தேகத்திற்குரிய பரிவர்த்தனை நடக்கும்போதே அந்தப் பணப்பரிமாற்றத்தைத் தடுத்து நிறுத்தி (Withholding Transactions), அருகிலுள்ள காவல் நிலையத்திற்குத் தானியங்கி முறையில் எச்சரிக்கை அனுப்பும் தொழில்நுட்பக் கடமை வங்கிகளுக்கு இருக்கிறது என்பதை நீதிமன்றம் தெளிவுபடுத்தியுள்ளது.
மத்திய உள்துறை அமைச்சகத்தின் கீழ் இயங்கும் ‘I4C’ அமைப்பின் தரவுகளின்படி, நடப்பு ஆண்டில் மட்டும் 21,900-க்கும் மேற்பட்ட டிஜிட்டல் அரெஸ்ட் புகார்கள் பதிவாகி, சுமார் ரூ.800 கோடிக்கு மேலான மக்களின் உழைப்புச் சுரண்டப்பட்டுள்ளது. டெல்லியில் ரூ.2.10 கோடி, கோழிக்கோட்டில் ரூ.1.35 கோடி, கர்நாடகாவில் பயங்கரவாதக் குற்றச்சாட்டு எனக் கூறி ரூ.1.31 கோடி எனப் போலி கணக்குகள் (Mule Accounts) மூலம் கோடிக்கணக்கில் பணம் கைமாறியுள்ளது. ரிசர்வ் வங்கியின் புதிய ‘KYC திருத்த வழிகாட்டுதல்கள் 2026’ (KYC Amendment Directions 2026) வரும் நவம்பர் 30-க்குள் அறிவிக்கப்பட்டு, டிசம்பர் 31 முதல் அமலுக்கு வரவுள்ள சூழலில், வங்கிகள் தங்கள் அலட்சியப் போக்கை விட்டுவிட்டு, வாடிக்கையாளர்களின் பணத்திற்குப் பொறுப்பேற்கும் சட்டக் கடமைப்பாட்டை உச்சநீதிமன்றம் இப்போது கட்டாயமாக்கியுள்ளது.