தமிழகத்தில் புதிய கல்வி ஆண்டு தொடங்கி, அனைத்துப் பள்ளிகளும் தற்பொழுது சுறுசுறுப்பாக இயங்க ஆரம்பித்துள்ளன. இந்தச் சூழலில், புதிய மாணவர் சேர்க்கை மற்றும் சேர்க்கைக் கட்டணம் என்ற பெயரில் சில தனியார் பள்ளிகள் பெற்றோர்களிடம் இருந்து கூடுதல் கட்டணங்களை வசூலிப்பதாகப் பல்வேறு புகார்கள் எழுந்த வண்ணம் உள்ளன. இதற்குக் முற்றுப்புள்ளி வைக்கும் வகையிலும், பள்ளி நிர்வாகத்தில் வெளிப்படைத்தன்மையைக் கொண்டு வரும் வகையிலும் தமிழ்நாடு அரசு தற்பொழுது ஒரு மிக முக்கிய அதிரடி உத்தரவைப் பிறப்பித்துள்ளது.
இந்த புதிய உத்தரவின்படி, தமிழகத்தில் உள்ள அனைத்துத் தனியார் பள்ளிகளும் தங்களது கட்டண விபரங்களை மறைக்காமல் பொதுவெளியில் அறிவிக்க வேண்டும் எனப் பள்ளிக் கல்வித்துறை மிகக் கடுமையான உத்தரவை பிறப்பித்துள்ளது.
தமிழக அரசின் புதிய அரசாணையின்படி, மாநிலத்தில் செயல்பட்டு வரும் அனைத்துத் மெட்ரிகுலேஷன், சிபிஎஸ்இ (CBSE) உள்ளிட்ட அனைத்துத் தனியார் சுயநிதிப் பள்ளிகளும், தங்களது பள்ளியில் ஒவ்வொரு வகுப்பு வாரியாக (Class-wise) வசூலிக்கப்படும் துல்லியமான கல்வி கட்டண விபரங்களை தங்களது அதிகாரப்பூர்வ இணையதளத்தில் (Official Website) கட்டாயமாக வெளியிட்டு விளம்பரப்படுத்த வேண்டும்.
பெற்றோர்கள் எந்தவொரு நேரத்திலும் தங்களது பிள்ளைகளுக்கான கட்டண விபரங்களை ஆன்லைன் மூலம் எளிதாகப் பார்த்துத் தெரிந்து கொள்ளும் வகையில் இந்த நடவடிக்கை எடுக்கப்பட்டுள்ளது. இதன் மூலம் பள்ளிகள் மறைமுகக் கட்டணங்கள் எதையும் பெற்றோர்களிடம் இருந்து வசூலிக்க முடியாது என்பது குறிப்பிடத்தக்கது.
இணையதளம் மட்டுமின்றி, புதிய சேர்க்கைக்காகப் பள்ளிகள் மாணவர்களுக்கு வழங்கும் சேர்க்கை விண்ணப்பப் படிவத்திலும் (Admission Application Form) ஒரு மிக முக்கிய மாற்றத்தை அரசு கொண்டு வந்துள்ளது.
இனி வரும் காலங்களில் தனியார் பள்ளிகள் வழங்கும் விண்ணப்பப் படிவத்திலேயே அந்தந்த வகுப்புக்குரிய கல்வி கட்டணம் எவ்வளவு என்ற விபரம் மிகத் தெளிவாக அச்சடிக்கப்பட்டு வழங்கப்பட வேண்டும்.
கைப்பட எழுதியோ அல்லது மறைமுகமாகவோ எந்தவொரு கட்டண விபரத்தையும் பெற்றோர்களிடம் வாய்மொழியாகக் கூறக் கூடாது.
அரசு நிர்ணயித்த கட்டணக் குழுவின் விதிமுறைகளைப் பின்பற்றித் தான் இந்த கட்டண விபரங்கள் அச்சிடப்பட்டுள்ளனவா என்பதைப் பள்ளிக் கல்வித்துறை அதிகாரிகள் தீவிரமாகக் கண்காணிக்க உள்ளனர்.
தமிழக அரசின் இந்த அதிரடி உத்தரவு ஏழை மற்றும் நடுத்தரப் பெற்றோர்கள் மத்தியில் மிகப்பெரிய வரவேற்பைப் பெற்றுள்ளது. பல பள்ளிகள் தங்களது கட்டண விபரங்களை வெளியில் சொல்லாமல் சேர்க்கையின் போது கூடுதல் தொகையைக் கேட்டு வற்புறுத்துவதாக இருந்த புகார்களுக்கு இதன் மூலம் தீர்வு கிடைக்கும் என எதிர்பார்க்கப்படுகிறது.
இந்த உத்தரவை மீறி, இணையதளத்தில் கட்டண விபரங்களை வெளியிடாத அல்லது விண்ணப்பப் படிவத்தில் கட்டணத்தை அச்சிடாமல் வழங்கும் தனியார் பள்ளிகள் மீது சட்டப்பூர்வமாகக் கடுமையான நடவடிக்கைகள் எடுக்கப்படும் எனப் பள்ளிக் கல்வித்துறை எச்சரித்துள்ளது. மேலும், பெற்றோர்கள் இது போன்ற கட்டணக் கொள்ளை குறித்த புகார்களை மாவட்டக் கல்வி அலுவலகங்களில் நேரடியாகத் தெரிவிக்கலாம் என்றும் அறிவிக்கப்பட்டுள்ளது.
