திமுக எம்.எல்.ஏ மார்கண்டேயனைக் கைது செய்வதற்குச் சபாநாயகரின் அனுமதி பெறத் தேவையில்லை என்று தமிழ்நாடு சட்டப்பேரவைச் சபாநாயகர் ஜே.சி.டி. பிரபாகர் திட்டவட்டமாகத் தெரிவித்துள்ளார். சட்டமன்ற உறுப்பினரைக் கைது செய்வதற்கான நடைமுறைகள் மற்றும் சட்டப்பேரவை விதிகள் குறித்து எழுப்பப்பட்ட கேள்விகளுக்குப் பதிலளிக்கும் வகையில் அவர் இந்த முக்கிய விளக்கத்தை அளித்துள்ளார்.
மார்கண்டேயன் எம்.எல்.ஏ கைது செய்யப்பட்டது தொடர்பாகக் காவல்துறையினரிடமிருந்து தனக்குச் செய்திக் குறிப்பு வந்துள்ளதாகக் குறிப்பிட்ட சபாநாயகர் ஜே.சி.டி. பிரபாகர், தனது அனுமதியோடுதான் ஒரு உறுப்பினரைக் கைது செய்ய வேண்டும் என்ற விதி ஏதும் இல்லை என்று தெளிவுபடுத்தினார். சட்டப்பேரவையின் அமைப்பு எல்லைக்குள் கைது நடவடிக்கை மேற்கொள்ளும்போது மட்டுமே பேரவைத் தலைவரின் அனுமதி கட்டாயமாகும் என்று அவர் சுட்டிக்காட்டினார்.
சட்டப்பேரவை விதிகள் 291 மற்றும் 292-ன் படி, பேரவை வளாகத்திற்கு வெளியே ஒரு உறுப்பினரைக் கைது செய்யும்போது அதுகுறித்த தகவலைப் பேரவைத் தலைவருக்குத் தெரியப்படுத்தினால் போதுமானது என்று கூறிய அவர், கைது செய்வதற்கு முன் அனுமதி பெற வேண்டும் என விதியில் குறிப்பிடப்படவில்லை என்றார். மேலும், மார்கண்டேயன் பேசிய பேச்சால் மக்கள் மத்தியில் பெரும் வருத்தமும் கொந்தளிப்பான சூழலும் நிலவுவதாகக் குறிப்பிட்ட சபாநாயகர், அவர் மீதான புகாரை எழுத்துப்பூர்வமாகத் தாக்கல் செய்தால் பேரவை விதிமுறைகளின்படி தகுந்த நடவடிக்கை எடுக்கப்படும் என்றும் தெரிவித்தார்.
