தமிழ்நாட்டை மின்னணு மற்றும் தொழில்முறை உற்பத்தியில் சர்வதேச மையமாக உயர்த்தும் நோக்கில், காஞ்சிபுரம் மாவட்டம் பரந்தூர் அருகே உள்ள மதுரமங்கலத்தில் ஒரு புதிய தொழில் புரட்சிக்கான நடவடிக்கைகளைத் தமிழக அரசு தீவிரப்படுத்தியுள்ளது.
நிலம் கையகப்படுத்த அரசாணை வெளியீடு: மதுரமங்கலத்தில் சிப்காட் (SIPCOT) மூலம் புதிய தொழிற்பேட்டை அமைப்பதற்கும், அதற்குத் தேவையான நிலங்களைக் கையகப்படுத்துவதற்கும் தமிழக அரசு நில நிர்வாக ஆணையர் மூலம் அதிகாரப்பூர்வ அரசாணையை (Government Order) வெளியிட்டுள்ளது. முதற்கட்டமாகத் தேவைப்படும் நிலங்களைக் கையகப்படுத்தும் பணிகள் தொடங்கப்பட்டுள்ளதாக அந்த அறிவிப்பில் தெரிவிக்கப்பட்டுள்ளது.
ரூ.175 கோடியில் குறைக்கடத்தி பூங்கா: இந்த மதுரமங்கலம் சிப்காட் தொழிற்பேட்டையின் முதன்மை அம்சமாக, ரூ.175 கோடி மதிப்பீட்டில் “குறைக்கடத்தி மற்றும் மின்னணுப் பொருட்கள் உற்பத்திப் பூங்கா” (Semiconductor Electronics Manufacturing Park) அமைக்கப்படவுள்ளது. இந்த பூங்காவில் அதிநவீன ஆராய்ச்சி மற்றும் மேம்பாட்டு (R&D) மையங்களும், உற்பத்தி வசதிகளும் இடம்பெறவுள்ளன.
5,000 பேருக்கு வேலைவாய்ப்பு: இந்த அதிநவீனச் செமிகண்டக்டர் தொழிற்பூங்காவை அமைப்பதன் மூலம் சுமார் ரூ.2,000 கோடி வரையிலான புதிய தனியார் முதலீடுகளை ஈர்க்க இலக்கு நிர்ணயிக்கப்பட்டுள்ளது. மேலும், இத்திட்டம் முழுமையாகச் செயல்பாட்டுக்கு வரும்போது நேரடியாகவும் மறைமுகமாகவும் 5,000 பேருக்குப் புதிய வேலைவாய்ப்புகள் கிடைக்கும் என்று அரசு வட்டாரங்கள் தெரிவித்துள்ளன.
