நீட் வினாத்தாள் கசிவு மற்றும் தேசிய அளவிலான போட்டித் தேர்வு முறைக்கேடு விவகாரத்தில், மத்திய கல்வி அமைச்சர் தர்மேந்திர பிரதானின் ராஜினாமாவை உடனடியாக ஏற்க வேண்டும் என்றும், தவறினால் இந்த விவகாரம் பிரதமர் மோடியின் பதவிக்கே ஆபத்தாக முடியும் என்றும் காக்ரோச் ஜனதா கட்சியின் (CJP) தலைவர் அபிஜித் தீப்கே பகிரங்கமாக எச்சரித்துள்ளார்.
நாடெங்கும் பெரும் கொந்தளிப்பை ஏற்படுத்தியுள்ள நீட் மற்றும் பிற போட்டித் தேர்வு குளறுபடிகளைக் கண்டித்து, டெல்லி ஜந்தர் மந்தரில் ஆயிரக்கணக்கான இளைஞர்கள் மற்றும் மாணவர்கள் பங்கேற்கும் தொடர் போராட்டங்கள் தீவிரமடைந்து வருகின்றன. இப்போராட்டத்திற்குத் தலைமை தாங்கி வரும் காக்ரோச் ஜனதா கட்சியின் நிறுவனர் அபிஜித் தீப்கே செய்தியாளர்களிடம் பேசுகையில், மத்திய அரசையும் பிரதமர் நரேந்திர மோடியையும் மிகக் காட்டமாகச் சாடினார்.
“பிரதமர் மோடி அவர்களே, தர்மேந்திர பிரதானின் ராஜினாமாவை நீங்கள் உடனடியாக ஏற்றுக்கொள்ள வேண்டும் என மீண்டும் மீண்டும் வலியுறுத்துகிறேன். இல்லையெனில், இந்த பிரச்சனை தர்மேந்திர பிரதானின் ராஜினாமாவோடு மட்டும் நின்றுவிடாது; உங்கள் சொந்த ராஜினாமாவைக் கோரும் அளவுக்கு மிகப்பெரிய அரசியல் போராட்டமாக உருவெடுக்கும்” எனத் தெரிவித்தார்.
மேலும் தனது உரையைத் தொடர்ந்த அவர், “நாட்டின் கோடிக்கணக்கான மாணவர்களின் எதிர்காலத்தையும் வாழ்க்கையையும் விட, திறமையற்ற மற்றும் முற்றிலும் தோல்வியடைந்த ஒரு அமைச்சர் உங்களுக்கு முக்கியமில்லை. நாட்டின் இளைஞர்களை விட தோல்வியடைந்த அமைச்சரையே நீங்கள் பாதுகாக்க நினைக்கிறீர்கள் என்றால், வரவிருக்கும் தேர்தல்களில் இந்தியாவில் உள்ள எந்தவொரு குடிமகனும் உங்களுக்கு வாக்களிக்க மாட்டார்கள் என்பதை நினைவில் கொள்ளுங்கள்” என மிகக் காரசாரமான எச்சரிக்கையை விடுத்தார்.
சமீபத்தில் ஜந்தர் மந்தரில் போராட்டத்தில் ஈடுபட்ட சோனம் வாங்சுக் கைது செய்யப்பட்டது மற்றும் மாணவர்கள் மீது நடத்தப்பட்ட தடியடி சம்பவங்கள் ஆகியவை மத்திய அரசின் சர்வாதிகாரப் போக்கையே காட்டுவதாக அவர் குற்றம்சாட்டினார். அரசாங்கம் தேர்வு முறைகேடுகளுக்கு தீர்வு காண்பதை விட்டுவிட்டு, அமைதியான முறையில் போராடும் மாணவர்களின் குரலை ஒடுக்கவே முயல்கிறது என்றும் அவர் சாடினார்.
வினாத்தாள் கசிவு விவகாரத்தில் வேகமான விசாரணை மற்றும் சிறப்பு நீதிமன்றங்கள் அமைப்பது தொடர்பான மத்திய அரசின் அறிவிப்புகளை “கண் துடைப்பு நாடகம்” என நிராகரித்துள்ள சிஜேபி இயக்கம், மத்திய கல்வி அமைச்சர் தனது பதவியை ராஜினாமா செய்யும் வரை அல்லது பிரதமர் அவரை நீக்கும் வரை இந்த போராட்டம் நாடு முழுவதும் தீவிரமாகத் தொடரும் எனத் திட்டவட்டமாக அறிவித்துள்ளது.
