மகாராஷ்டிராவில் ஷாம்பு, டிடர்ஜென்ட் மற்றும் பாமாயில் ஆகியவற்றை கொண்டு ரசாயன முறையில் செயற்கை பால் தயாரித்து வந்த மிகப்பெரிய நெட்வொர்க்கை உணவு பாதுகாப்புத்துறை அதிகாரிகள் அதிரடியாக முறியடித்துள்ளனர். கடந்த ஜூலை 4 மற்றும் 5 ஆகிய தேதிகளில் புனே, தானே, அகல்யாநகர், சோலாப்பூர், ஜல்னா ஆகிய 5 மாவட்டங்களில் உணவு பாதுகாப்புத் துறை அதிகாரிகள் மற்றும் காவல்துறையினர் இணைந்து நடத்திய அதிரடி சோதனைகளில் சுமார் 1.48 கோடி ரூபாய் மதிப்புள்ள ஷாம்பு, சோப் பவுடர்கள், பாமாயில் மற்றும் ரசாயன எமுல்சிஃபையர்கள் பறிமுதல் செய்யப்பட்டன.
இந்த சோதனையில் 13 பேர் உடனடியாக கைது செய்யப்பட்டுள்ளனர். புனேவைச் சேர்ந்த சுஷாந்த் ஹிங்கே என்பவர் இந்த கும்பலின் தலைவனாக செயல்பட்டதும், சந்தீப் லோதா என்பவர் இவருக்கு ஆலோசகராக இருந்ததும் அம்பலமாகியுள்ளது. இவர்கள் இந்த போலி பாலை அசல் பாலுடன் கலந்து, அதிக லாபத்திற்காக பொதுமக்கள் மற்றும் பால் முகவர்களுக்கு விற்பனை செய்து வந்துள்ளனர். இது ஒரு சாதாரண குற்றமல்ல, குழந்தைகள் மற்றும் முதியவர்களின் ஆரோக்கியத்தை சீரழிக்கும் ஒரு சமூக விரோத கொடூர குற்றம் என்றும், இதில் தொடர்புடையவர்கள் மீது எந்தவித இரக்கமும் காட்டப்படாது என்றும் உணவு பாதுகாப்புத்துறை கமிஷனர் துக்காராம் முண்டே ஆவேசமாக தெரிவித்துள்ளார். தற்போது இந்த போலி பால் நெட்வொர்க் மற்ற மாநிலங்களுக்கும் பரவியுள்ளதா என்ற கோணத்தில் விசாரணை தீவிரமடைந்துள்ளது.
மகாராஷ்டிராவில் இந்த விந்தையான சம்பவம் இப்போது நடந்திருந்தாலும், இதே போன்ற ஒரு ஆபத்தான ரசாயன பால் தயாரிப்பு கும்பல் கடந்த 2025 ஆம் ஆண்டில் தமிழ்நாட்டின் தென்காசியிலும் பிடிபட்டது என்பது குறிப்பிடத்தக்கது. தென்காசி அருகே கெமிக்கல்களை பயன்படுத்தி செயற்கையாக பால் தயாரித்து, தினசரி 1,000 லிட்டருக்கும் அதிகமாக ஹோட்டல்கள் மற்றும் டீக்கடைகளுக்கு சப்ளை செய்து வந்த தம்பதியை உணவு பாதுகாப்புத்துறையினர் மற்றும் போலீசார் அதிரடியாக கைது செய்தனர். வெறும் 50 ரூபாய்க்கு விற்கப்பட்ட இந்த கெமிக்கல் பாலின் மூலம் அவர்கள் ஒரு நாளைக்கு 40,000 ரூபாய்க்கும் மேல் லாபம் பார்த்தது விசாரணையில் தெரியவந்தது. கஞ்சா கடத்துபவர்களின் சொத்துக்களை முடக்குவது போல, இந்த போலி பால் கும்பலின் வங்கி கணக்குகளும் முடக்கப்பட்டன.
மேலும், அண்மையில் தமிழக-கர்நாடக எல்லையான ஓசூர் வழியாக பெங்களூருக்கு உரிமம் மற்றும் குளிர்சாதன வசதிகள் இன்றி கொண்டு செல்லப்பட்ட ஆயிரக்கணக்கான லிட்டர் சந்தேகத்திற்குரிய பாக்கெட் பால்களையும் அதிகாரிகள் பறிமுதல் செய்து சோதித்து வருகின்றனர். இதனால் தமிழக நுகர்வோர்களும் தங்களுக்கு வரும் பால் குறித்து மிகுந்த விழிப்புடன் இருக்க வேண்டியது அவசியமாகிறது. நாம் அன்றாடம் வாங்கும் பால் அசல் பாலா அல்லது ரசாயனம் கலந்த செயற்கை பாலா என்பதை வீட்டிலேயே சில எளிய சோதனைகள் மூலம் மிக எளிதாகக் கண்டறிய முடியும்.
முதலாவதாக, பாலில் டிடர்ஜென்ட் அல்லது சோப் பவுடர் கலந்திருக்கிறதா என்பதை அறிய, 5 மிழி பாலுடன் சம அளவு தண்ணீரை சேர்த்து ஒரு பாட்டிலில் போட்டு நன்றாக குலுக்க வேண்டும். அதில் அதிகப்படியான தடிமனான நுரை வந்து, அது நீண்ட நேரம் கரையாமல் அப்படியே இருந்தால், அதில் டிடர்ஜென்ட் கலந்திருப்பது நூறு சதவீதம் உறுதியாகும். இரண்டாவதாக, பாலில் தடிமனுக்காக ஸ்டார்ச் எனப்படும் மாவுச்சத்து சேர்க்கப்பட்டுள்ளதா என்பதை அறிய, சிறிதளவு பாலை நன்றாக கொதிக்க வைத்து ஆறவைத்து, அதில் சில துளிகள் அயோடின் சொல்யூஷனை சேர்க்க வேண்டும். அந்த பால் உடனடியாக நீல நிறமாக மாறினால், அதில் மாவுச்சத்து சேர்க்கப்பட்டுள்ளது என்று அர்த்தம். மேலும், அசல் பால் இயற்கையான வெள்ளை நிறத்தில் இருக்கும், ஆனால் செயற்கை பால் சிறிது நேரம் வைத்திருக்கும் போது லேசான மஞ்சள் நிறமாக மாறத் தொடங்கும். அசல் பாலை கைகளில் தேய்க்கும் போது வழுவழுப்புத் தன்மை இருக்காது, ஆனால் கெமிக்கல் பால் சோப்புத் தண்ணீர் போல கைகளில் வழுவழுப்பாக இருக்கும்.
பொதுமக்கள் தங்களின் அன்றாடப் பாதுகாப்பிற்காக சில முக்கியமான முன்னெச்சரிக்கை நடவடிக்கைகளைப் பின்பற்ற வேண்டும். எப்போதும் நம்பகமான, அரசு அங்கீகாரம் பெற்ற அல்லது முறையான உணவு பாதுகாப்பு உரிமம் (FSSAI) பெற்ற நிறுவனங்களின் பால் பாக்கெட்டுகளை மட்டுமே வாங்க வேண்டும். மிகவும் மலிவான விலையில் விற்கப்படும் லூஸ் பால்களை வாங்குவதைத் தவிர்ப்பது நல்லது. பாக்கெட் பாலின் காலாவதி தேதியை எப்போதும் சரிபார்க்க வேண்டும். குழந்தைகளுக்குப் பால் கொடுப்பதற்கு முன்பு அதன் சுவை மற்றும் மணத்தில் ஏதேனும் மாற்றம் தெரிகிறதா என்பதைப் பார்க்க வேண்டும். பொதுமக்கள் தங்களுக்கு விநியோகிக்கப்படும் பாலில் ஏதேனும் ரசாயன வாசனை அல்லது சோப்புத் தன்மை போன்ற கலப்படம் இருப்பதாகச் சந்தேகித்தால், பயப்படாமல் உடனடியாக தமிழக உணவு பாதுகாப்புத்துறையின் 94440 42322 என்ற அதிகாரப்பூர்வ வாட்ஸ்அப் எண்ணிற்கு புகார் அளிக்கலாம் என்று அதிகாரிகள் கேட்டுக்கொண்டுள்ளனர்.
