கடந்த ஆட்சி காலத்தில் கரூர் வேலுசாமிபுரத்தில் நடைபெற்ற கூட்டத்தில் பாதுகாப்பு குறைபாடுகள் மற்றும் அப்போதைய நிர்வாகத்தின் அலட்சியப் போக்கால் ஏற்பட்ட கொடூர கூட்ட நெரிசலில் சிக்கி 41 பேர் பரிதாபமாக உயிரிழந்தனர். இந்தத் துயரச் சம்பவத்தில் தங்கள் குடும்பத்தின் முதன்மை வாழ்வாதாரமாக இருந்த இளைஞர்களையும், இளம்பெண்களையும் இழந்து தவித்த குடும்பங்களுக்கு உதவிடும் வகையில், தற்போதைய முதலமைச்சர் விஜய் தலைமையிலான தமிழ்நாடு அரசு ஒரு முக்கியக் கொள்கை முடிவை எடுத்தது. அதன்படி, பாதிக்கப்பட்ட குடும்பங்களைச் சேர்ந்த 31 பேருக்கு அரசு பணி நியமன ஆணைகள் வழங்கப்பட்டன.
இந்த நிலையில், பாதிக்கப்பட்ட நபர்களுக்கு வழங்கப்பட்ட அந்த 31 அரசு பணி நியமன ஆணைகளையும் ரத்து செய்து சென்னை உயர்நீதிமன்ற மதுரை கிளை அண்மையில் உத்தரவிட்டது. உயர்நீதிமன்றத்தின் இந்த உத்தரவு பாதிக்கப்பட்ட குடும்பங்கள் மத்தியிலும், அரசு வட்டாரத்திலும் பெரும் பரபரப்பை ஏற்படுத்திய நிலையில், இந்தத் தீர்ப்பை எதிர்த்து உச்சநீதிமன்றத்தில் உடனடியாக மேல்முறையீடு செய்ய முதலமைச்சர் விஜய் தலைமையிலான தமிழ்நாடு அரசு அதிரடியாக முடிவு செய்துள்ளது.
இது குறித்துச் சட்டத்துறை அமைச்சர் நிர்மல் குமார் தெரிவிக்கையில், இந்த வழக்கில் அரசு பணி நியமன ஆணை பெற்ற 30-க்கும் மேற்பட்ட நபர்கள் எதிர்மனுதாரர்களாகச் சேர்க்கப்படவே இல்லை என்று சுட்டிக்காட்டியுள்ளார். பணி நியமன ஆணை பெற்றுள்ள நபர்களின் தரப்பு நியாயங்களையோ அல்லது அவர்களின் வழக்கறிஞர்களின் வாதங்களையோ கேட்காமல் இந்தத் தீர்ப்பு வழங்கப்பட்டுள்ளதால், மதுரை உயர்நீதிமன்றக் கிளையின் தீர்ப்பை உடனடியாக நிறுத்தி வைக்கக் கோரி உச்சநீதிமன்றத்தில் மனு தாக்கல் செய்யப்பட உள்ளது.
கடந்த ஆட்சிக் காலத்தில் அரசுத் துறை அதிகாரிகளும் காவல்துறையினரும் தகுந்த பாதுகாப்பு நடைமுறைகளைச் செய்யத் தவறியதன் காரணமாகவே இந்த உயிரிழப்புகள் நேரிட்டன. எனவே, பாதிக்கப்பட்ட குடும்பங்களின் பொருளாதார நல்வாழ்வைக் கருத்தில் கொண்டு எடுக்கப்பட்ட இந்த அரசு கொள்கை முடிவை நிலைநாட்டவும், அரசு பணி நியமன ஆணை பெற்றவர்களின் வாழ்வாதாரத்தைப் பாதுகாக்கவும் தமிழ்நாடு அரசு மற்றும் பாதிக்கப்பட்டவர்களின் வழக்கறிஞர்கள் சார்பாக உச்சநீதிமன்றத்தில் தீவிர வாதங்கள் முன்வைக்கப்படவுள்ளன.
