சுதந்திரப் போராட்ட வீரர் மாவீரர் தீரன் சின்னமலையின் நினைவு தினத்தை முன்னிட்டு திருச்சியில் உள்ள அவரது திருவுருவச் சிலைக்குத் தமிழக அரசின் சார்பில் மாலை அணிவித்து மரியாதை செலுத்தப்பட்டது. இந்நிகழ்வில் கலந்துகொண்ட மாவட்டப் பொறுப்பு அமைச்சரான ரமேஷ், செய்தியாளர்களைச் சந்தித்து பல்வேறு அரசியல் கேள்விகளுக்குப் பதிலளித்தார். அப்போது, தற்போதைய முதல்வர் தனித்து விடப்பட்டுள்ளதாக மு.க.ஸ்டாலின் கூறிய குற்றச்சாட்டு குறித்துக் கேட்கப்பட்டதற்கு, உண்மையிலேயே இங்கு யார் தனித்து விடப்பட்டுள்ளார்கள் என்பதை அவரிடம் மைக் நீட்டிக் கேட்டாலே தெரியவரும் என்று பதிலடி கொடுத்தார்.
சட்டமன்றத்தில் பேசிக்கொண்டிருந்த ஸ்டாலின், இன்று சட்டமன்ற நிகழ்வுகளை வீட்டிலிருந்தே பார்க்கக்கூடிய அளவுக்குத் தனித்து விடப்பட்டுள்ளார் என்பதே உண்மை என்றும், அதனை மக்கள் நன்றாக அறிவார்கள் என்றும் அமைச்சர் ரமேஷ் விமர்சித்தார். மேலும், இடைத்தேர்தலுக்காக வெறியோடு காத்திருப்பதாகத் நாம் தமிழர் கட்சி ஒருங்கிணைப்பாளர் சீமான் கூறியது குறித்துப் பேசியவர், கடந்த 15 ஆண்டுகளாக அவர் பயிற்சி மட்டுமே எடுத்து வருவதாகக் கிண்டல் செய்தார். வெறுப்பு அரசியலையும் தனிநபர் விமர்சனங்களையும் கைவிட்டு நோக்கத்தோடு செயல்பட்டால் உள்ளாட்சித் தேர்தலில் ஓரிரு இடங்களில் வெல்ல வாய்ப்புள்ளது என்றும் அவர் அறிவுறுத்தினார்.
தொடர்ந்து, கோயில் நிர்வாகங்களில் நடக்கும் முறைகேடுகள் மற்றும் லஞ்சப் புகார்கள் குறித்த கேள்விக்கு விடையளித்த அமைச்சர், தவறு நிரூபிக்கப்பட்டால் யாராக இருந்தாலும் பாரபட்சமின்றி நடவடிக்கை எடுக்கப்படும் எனக் உறுதியளித்தார். இந்து சமய அறநிலையத்துறையில் கடந்த ஆட்சிக் காலத்தில் நடைபெற்ற முறைகேடுகள் மற்றும் ஆக்கிரமிப்புகள் குறித்து ஆய்வு செய்யப்பட்டு வருவதாகவும், விரைவில் அதுகுறித்த வெள்ளை அறிக்கை வெளியிடப்பட்டுத் தனிக்குழுக்கள் அமைத்துக் கோயில் சொத்துக்கள் பாதுகாக்கப்படும் என்றும் அவர் தெரிவித்தார்.
