பொதுமக்களின் கூட்ட நெரிசலைக் குறைக்கவும், மதுபான விநியோகத்தை எளிமைப்படுத்தவும் கடந்த ஆகஸ்ட் 7-ஆம் தேதி முதல் புதிய ஆன்லைன் மதுவிற்பனை முறை அதிகாரப்பூர்வமாக அறிமுகப்படுத்தப்பட்டது.
இப்புதிய முறை தொடங்கப்பட்ட முதல் நாளிலேயே நுகர்வோரிடையே கணிசமான வரவேற்பைப் பெற்றுள்ளது. தொடக்க நாளான ஆகஸ்ட் 7 அன்று மட்டும் ஆன்லைன் வாயிலாக ரூ.11.62 லட்சத்திற்கு மதுபானங்கள் விற்பனை செய்யப்பட்டு சாதனை படைக்கப்பட்டுள்ளது.
இதனைத் தொடர்ந்து, இரண்டாம் நாளான நேற்றும் ஆன்லைன் முன்பதிவு விறுவிறுப்பாக நடைபெற்றது. ஒரே நாளில் 3,000-க்கும் மேற்பட்டோர் ஆன்லைனில் முன்பதிவு செய்த நிலையில், ரூ.9 லட்சத்திற்கு மதுபானங்கள் விற்பனையாகின. இதன் மூலம் ஆன்லைன் முறை அறிமுகப்படுத்தப்பட்ட முதல் இரு நாட்களிலேயே ரூ.20 லட்சத்திற்கும் அதிகமான தொகைக்கு மதுபானங்கள் விற்பனை செய்யப்பட்டுள்ளது குறிப்பிடத்தக்கது.
நேரடி சில்லறை விற்பனை நிலையங்களில் நீண்ட வரிசையில் காத்திருப்பதைத் தவிர்க்க விரும்புவோருக்கு இந்த ஆன்லைன் முன்பதிவு சேவை மிகவும் பயனுள்ளதாக இருப்பதாகப் பயனர்கள் கருத்து தெரிவித்துள்ளனர். வரும் நாட்களில் ஆன்லைன் பயன்பாடு மேலும் அதிகரிக்கும் என எதிர்பார்க்கப்படுகிறது.
