முதலமைச்சர் விஜய் தலைமையிலான தவெக அரசை வீழ்த்த எம்.எல்.ஏ-க்களிடம் ரூ.35 கோடி குதிரை பேர ஊழல் மற்றும் கொலை மிரட்டல் விடுக்கப்பட்ட வழக்கில், தற்பொழுது யாரும் எதிர்பாராத ஒரு புதிய அதிரடி திருப்பமாக மாற்றுக்கட்சி பிரமுகர் ஒருவர் கூண்டோடு சிக்கியுள்ளார். உத்தங்கரை தொகுதி தவெக சட்டமன்ற உறுப்பினர் டாக்டர் என். இளையராஜாவை மிரட்டிய வழக்கில், நாடார் பாதுகாப்பு பேரவையின் தலைவரும், அதிமுக பிரமுகருமான சீனிவாசன் என்பவரைச் சென்னை திருவல்லிக்கேணி தனிப்படை போலீசார் அதிரடியாகக் கைது செய்துள்ளனர்.
காவல்துறையினர் நடத்திய முதற்கட்ட விசாரணையில், இந்த மெகா சதியின் முக்கியக் குற்றவாளியான ஐபிடிஎஸ் (IPDS) திருநாவுக்கரசுடன் இந்த சீனிவாசனுக்கு மிக நெருக்கமான மற்றும் ரகசியத் தொடர்பு இருந்தது ஆவணப்பூர்வமாக உறுதி செய்யப்பட்டுள்ளது. தவெக எம்.எல்.ஏ-விடம் சபாநாயகருக்கு எதிராக வாக்களிக்கத் திருநாவுக்கரசு போனில் பேரம் பேசி மிரட்டிய அதே காலகட்டத்தில், அவரோடு இந்த சீனிவாசனும் தொடர்ச்சியாக ஆலோசனைகளை மேற்கொண்டு வந்த அதிர்ச்சித் தகவல்கள் தற்பொழுது வெளிச்சத்திற்கு வந்துள்ளன.
கைது செய்யப்பட்டுள்ள இந்த நாடார் பாதுகாப்பு பேரவை தலைவர் சீனிவாசன், ஏற்கனவே பல்வேறு குற்ற வழக்குகளில் தொடர்புடைய ஒரு நபர் என்றும் காவல்துறையினர் தரப்பில் கூறப்படுகிறது. தவெக அரசை எப்படியாவது கவிழ்க்க வேண்டும் என்ற நோக்கில், இந்த அரசியல் தரகர்களுடனும், பிற முக்கியப் புள்ளிகளுடனும் சேர்ந்து சீனிவாசன் பின்னணியில் இருந்து காய் நகர்த்தியதாகத் தனிப்படை போலீசார் சந்தேகிக்கின்றனர்.
ஏற்கனவே இந்த வழக்கில் திருநாவுக்கரசு, நரேஷ் உள்ளிட்ட 9 பேர் அடுத்தடுத்து கைது செய்யப்பட்டுத் தீவிர விசாரணைக் வளையத்திற்குள் கொண்டு வரப்பட்டுள்ளனர். இந்தச் சூழலில், அரசியல் பின்னணி கொண்ட அதிமுக பிரமுகர் சீனிவாசன் தற்பொழுது நேரடியாகக் கைது செய்யப்பட்டுள்ளது, இந்த வழக்கின் தீவிரத்தை மேலும் சில மடங்கு உயர்த்தியுள்ளது. இந்த குதிரை பேர சதியின் பின்னணியில் வேறு எந்தெந்த முக்கிய அரசியல் கட்சித் தலைவர்களுக்குத் தொடர்பு இருக்கிறது என்ற கோணத்தில் போலீசார் தங்களது அடுத்தகட்ட கிடுக்கிப்பிடி விசாரணையை முடுக்கிவிட்டுள்ளனர்.
